penç
/-è-/-é-/
penç
[FO]
-
adi.
che al à consistence, densitât:
e jere une fumate cussì penze di no viodi lontan doi pas, un frêt di cricâ (Amedeo Giacomini, Tal ospedâl);
un plat fumant di mignestre di fasûi, biele penze e sostanziose (Margherita Timeus, Mignestre di fasûi, la ricete definitive);
il mercuri al è un metal licuit une vore penç (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât);
un sirocâl al faseve colâ lis fueis prin da la ore e un nûl penç, scûr, al pesave su lis cjasis (Pieri Somede dai Marcs, Sant Simon: 28 di Otubar 1917)
Sin. fis
-
(fig.)
ancje riferît ae densitât o intensitât di cualchi cualitât tant che il colôr, la mancjance di lûs e v.i.:
il scûr al devente plui penç (Meni Ucel, Otavari a Madone);
il so zigo al jemplà di bessôl la cjase, al travanà la gnot penze difûr (Dino Virgili, Pôre tal nuie…)
Sin. fis
, colm
-
s.m.
consistence, densitât:
un lamp di cuant in cuant al sbregave par un moment il penç di chê coltre [di nûi] (Plume di ingjustri, Une corse cuintri il timp)
-
adi.
che al è grues o che al à une cierte profonditât:
mûrs plens di cjalin cussì pençs che cul siroc al coreve jù in riui lustris fin par tiere (Pieri Menis, Il cuader de none);
une fantate pitost bocone, cun ocjâi pençs di miope (Alan Brusini, Gian Paolo Linda, I forescj);
une crodie di ardiel penze cuatri dêts (Arturo Feruglio, Viaç a Vignesie)
Sin. grues
, alt1
, font1
-
di cdn., cun plui cjar o plui gras di ce che si calcole normâl:
Tu sês ingrassade, Vigje! Tu ti fasis penze, mi pâr! (Maria Forte, Varc di confin)
Sin. grues
, gras
, pesant
-
s.m.
part gruesse o bondante:
scovâ il penç de cragne (Josef Marchet, Lis predicjis dal muini)
Sin. grues
-
adi.
che al pare ben dal frêt:
Nedo al butave sudôr come un malât dentri de divise di pano penç (Gianni Gregoricchio, Trê feminis)
Sin. fis
, grues
, cjalt
-
adi.
fat di elements tacâts a strent fra di lôr:
Il bosc al è imens e pens, là a son bûs dulà che nissun al pos cjatâni (Pier Paolo Pasolini, I Turcs tal Friûl)
Sin. fis
, folt
-
dongje di tancj altris elements de stesse sorte:
o sin lâts a finîle te cjase di Jacum dal Poç sierade tes cjanis penzis dal palût (Maria Forte, Cjase di Dalban)
-
ancje in funz. di av.:
si jere inacuart che al neveave penç (Maria Forte, La tiere di Lansing)
-
part fisse di elements:
scuindisi tal penç dai boscs (Sandri Di Suald, Salvans, aes lidrîs di un mît)
-
adi.
(fig.)
caraterizât de presince fisse di alc:
o soi malât ancje jo di mâl di tradizion, ma no di chê basse, penze di ignorance e di stupide invidie (Pieri Piçul, Vieri e gnûf)
Sin. fis
, plen
, colm
, incolm
-
adi.
(fig.)
che al à pês, impuartance, consecuencis seriis:
'Sine e veve capît che al veve di sei alc di penç, par vie che le veve viodude dute in conturbie (Roberto Ongaro, Il muc);
finît di interpelâju su lis robis plui penzis, lôr par solit i domandavin il disturp ma lui nol voleve mai un centesim (Antoni Beline, Pre Pitin)
Sin. grues
-
s.m.
element plui impuartant, plui critic, plui problematic e v.i.:
il penç di ce che a domandavin i 529 predis al è stât fat, magari cui bêçs o in gracie de disgracie dal taramot (Antoni Beline, A vincjecinc agns de mozion dal clero dal 1967)
-
adi.
(fig.)
cjamât di tension o di une cierte atmosfere che si capìs dal contest:
a chestis peraulis i tignì daûr un zito penç (Gianni Gregoricchio, Trê feminis);
in cierts moments, tes riunions, e jere une atmosfere cussì penze che si podeve taiâle cul curtìs (Max Mauro, Un Friûl difarent: i 90 mhz di Onde Furlane)
-
adi., av.
dificil di digjerî:
miôr no mangjâ penç di sere
-
(fig.)
cun contignût o forme dificile o pesante:
un romanç penç
-
adi.
che nol plâs, che al da fastidi:
de cusine al vignive un odôr di frit e di brocui che al faseve l'aiar cussì penç che al pareve di podê taiâlu cul fîl tant che la polente (Roberto Ongaro, Il muc)
Sin. grivi
, puçon
, trist
-
adi.
(fig.)
pôc fin, pôc elegant:
li pinii dai fassalets butâts sù in cima il cjâf colm di streci, a zovavin a dâi un estru galandin e gjavât, cussì che a nal nasseva mai da confondali cu li Tramuntini penzi ta li cotali di lana nera e i grimâi justa sgrisulâts di blanc (Novella Cantarutti, La femina di Marasint)
Sin. grês
, ordenari