cjalt
cjalt
[FO]
-
adi.
che al à temperadure alte o plui alte di chê ambientâl o corporâl, che al da une sensazion di calôr:
al sintive la bisugne di parâ jù alc di cjalt che i comedàs il stomi ancjemò savoltât (Amedeo Giacomini, Tal ospedâl);
une fetute di polente cuntune slepute di formadi e une scudiele di mignestre cjalde cuntune taçute di vin lis cjatave simpri (Pieri Somede dai Marcs, Caritât);
e implenave la vascje di aghe cjalde, di sâl profumât, e e faseve il bagn (Carlo Sgorlon, Ombris tal infinît);
anidride carboniche, che invezit e contribuìs a stratignî la lûs dal Soreli, fasint deventâ la atmosfere plui cjalde come se e fos une cuvierte trasparente (Dario Bianchini Giaiotti, Fulvio Stel, Clime e incuinament: prime l'ûf o la gjaline?);
a paritât di cuote o di pression l'aiar frêt al è plui fis, ven a stâi plui pesant, di chel cjalt (Stefano Micheletti, Marcellino Salvador, Notis di meteorologjie pal Friûl - Vignesie Julie)
Cfr. imbuît
, bulint
, in bore
, infogât
-
che al fâs cressi la temperadure, che al da sensazion di calôr:
il soreli al deventave simpri plui luminôs e cjalt (Agnul di Spere, Il puint de ledre)
-
di un lûc o un moment o un timp, caraterizât di temperadure dal aiar alte, che e da sensazion di calôr:
une gnot cjalde di Istât cui zupets che a cisavin sù pai lens, e pe vite nome voie di distirâsi (Alan Brusini, Il svindic di Rosute);
dopo cene, te cusine cjalde, dute lustre, cun chel macet di garofui su la vetrine, si stave ben (Pieri Menis, Nadâl ancje par Gjelmin)
-
[CO, TS]
tecn., mec., eletr.
di aparât a combustion, a incandessence, a pression e v.i., che al è a temperadure alte par vê funzionât:
meti a cuei il pan tal for za cjalt;
i avions di une volte no jerin sigûrs se no partivin cul motôr cjalt;
leìnt il brevet american dal Malignani al somearès che la operazion di introduzion di fosfar e arsenic inte ampole e fos fate di Turo a filament cjalt e duncje in ambient dulà che si veve trasmission dal calôr par convezion e iradiament (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
-
dal cuarp o di une part al cuarp, che al à temperadure plui alte dal normâl o plui alte di cualchidun altri che le tocje:
vê il cerneli cjalt di fiere;
Lise dal Moro e sintì une man cjalde che e cjapà la sô man e le tirà di chê bande (Pieri Menis, La maghe no fale);
no le veve lassade un moment, al veve simpri balât cun jê, tignintle strente dongje di se tant che e sintive vicin il so respîr cjalt, il bati dal so cûr, il profum de sô zoventût (Pieri Menis, Chei di Muraie)
-
di cuarp, muart cussì di pôc che al à ancjemò la temperadure di vîf:
ducj i predis de foranie a jerin dacuardi che Ganis al leve in paradîs cjalt dome a tignîsi in canoniche pre Pitin (Antoni Beline, Pre Pitin);
a robavin intune cjase dulà che il paron al jere un cadavar ancjemò cjalt (Carlo Sgorlon, Ombris tal infinît)
-
adi.
di vistiari, che al pare ben dal frêt:
un capot cjalt;
un pâr di cjalçuts cjalts di lane
-
in funzion averbiâl, cun vistîts par parâsi dal frêt:
cun chê criùre chi si à di vistîsi cjalts
-
adi.
di persone, che e à un temperament vîf, massime tes manifestazions di afiet:
si vin fats une vorute di nemîs, ma ancje di amîs cjalts e sigûrs (Josef Marchet, Alo, indenant!)
Sin. afetuôs
, apassionât
, cordiâl
, espansîf
, fiestôs
, franc
, ninin
, viert
, vîf
-
di alc, che al comuniche afiet, sintiment, familiaritât e v.i.:
la Ulive no rivave a ufrîi che un amôr cence plui novitât, cence plui sturniment, ancje se cjalt e bon come i mûrs di cjase (Maria Forte, La tiere di Lansing);
lis ostariis gnovis, i ristorants fins a stan vignint sù modernis, pulîts, funzionâi fin che si vûl, ma cu la antighe filusumie cjalde e familiâr dai locâi furlans (Riedo Pup, I furlans e la ostarie)
Sin. afetuôs
, cordiâl
, fiestôs
, ninin
-
adi.
plen di voie, ancje di presse par alc:
"Si sposìn subit e o decidìn di lâ vie." "Ma ce ti esal vignût tal cjâf, ah, Rine, cuant che tu tu jeris cjalde di stâ ca a ogni cost?" (Alviero Negro, La cjase);
i sfuarçs par distudâ la lenghe a son vignûts dopo. A son vignûts di ogni bande: […] de bande de stampe nazionaliste che e jere cjalde di netâ ducj i cincuante mil dialets talians (Josef Marchet, La nestre lenghe)
Sin. bramôs
, seneôs
-
che si entusiasme o che al cjape passion pes robis, che al met fuarce e vivôr in ce che al fâs:
[il patriarcje Marquart] al induvinà lis intenzions di Vignesie e al fo un dai plui cjalts fautôrs di chê leghe cuintri di jê che, tra il 1378 e il 1381, e fasè plui di une volte disbassâ il cjâf ae Regjine dai Mârs (Josef Marchet, Cuintristorie dal Friûl fin sot la Italie)
Sin. ferbint
, fogôs
, infogât
, passionât
, passionôs
, viament
-
che al à une braùre fuarte:
pûr cjalt di sei furlan […] par fevelâ di robis plui impuartantis, di materiâi e di traspuarts e di bêçs, al jere passât a fevelâ par talian (Agnul di Spere, Visâsi di chel puint radio)
-
adi.
fat cun partecipazion, cun convinzion:
il dibatiment al fo cjalt e scombatût, fra ostruzionisims, iniziativis di lobbying inviadis di associazions e moviments des minorancis (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât);
il Bide al doveve vê une preiere cussì cjalde e cussì fuarte tai voi che il vecjo Mucjin nol olsâ a dîi di no (Maria Forte, Il Bide di Miot)
Sin. animât
, vîf
, vivarôs
-
adi.
(fig.)
di un puest o di un timp, caraterizâts di tante ativitât o ancje di lotis, vueris, di tensions sociâls, di contrast politic, e v.i.:
lis zonis plui cjaldis dal front;
al sucedeve che magari o jerin impegnâts a prontâ lis notiziis par lâ in onde e, massime la sabide, che al jere il dì plui cjalt, e fos altre int che e vignive li par discuti di alc o nome par fâ un zîr (Max Mauro, Un Friûl difarent: i 90 mhz di Onde Furlane)
Sin. critic
-
adi.
(fig.)
di argoment, situazion e simii, che al è sintût pe sô atualitât o pe sô gravitât:
une des cuistions plui cjaldis, ven a stâi chê dal scuintri jenfri proprietaris e contadins sul valôr dai lavôrs fats dai fituâi par miorâ i cjamps, e ven sierade intal 1503 cuntune sentence a pro dai possidents (Carli Pup, Il Friûl de Joibe Grasse dal 1511);
e su la gjestion de sanitât tal teritori, di ce si isal discutût? Al è un teme cjalt ancje pal Friûl: ise vignude fûr cualchi formule gnove? (Dree Venier, Fabio Pizzul: Un furlan il prin… a Milan)
Sin. urgjent
-
adi.
(fig.)
une vore resint o che si riferìs a alc sucedût di pôc:
lis dimissions dal sindic a son une notizie cjalde di vuê;
ricuarts ancjemò cjalts (Maria Forte, Cjase di Dalban)
Sin. crei
, fresc1
, gnûf
-
adi.
di colôr, che al fâs part de serie dal ros e dal zâl o che ju à come components predominants:
lis fueis de vît che si rimpinave pal mûr e si slungjave vie pal fîl di fier parsore la scjale, a colavin sgrosolant, zalis, rossis, nosele. Al svariave tal ultin colôr cjalt, Otubar (Maria Forte, Varc di confin)
-
adi.
di sun e spec. de vôs, bas ma vîf:
chê vôs cjalde i cresseve la confusion, ma al saveve di cedi, … di volê cedi (Maria Forte, La tiere di Lansing)
Sin. pastôs
, profont
-
adi.
di mascje di animâl, in calôr:
la cjice e je cjalde (Giulio Andrea Pirona, Ercole Carletti, Giovanni Battista Corgnali, Il Nuovo Pirona);
la cjice e va cjalde (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
-
s.m.
temperadure alte:
no si durmive nie parcè che tes casermutis di Cjaurêt di dì a saran stâts cuarante grâts di cjalt (Alan Brusini, I ribei);
ducj a scoltavin cence mot di cei, tal cjalt de flame che e sclopetave dal çoc di agacie (Maria Forte, Cjase di Dalban);
di Istât i vûl il cjalt e di Invier il frêt. A ogni stagjon il so (Carlo Sgorlon, Prime di sere)
Sin. canicule1 ipon.
, fogaç ipon.
, scjafoiaç ipon.
, scjaldadice ipon.
, scotôr ipon.
, stofaç ipon.
-
periodi dal an cu lis temperaduris plui altis:
a jerin ducj sentâts di fûr, su la stradele a cjapâ il fresc. Che il cjalt, chest an, al è rivât adore, e je a pene passade la Sense! (Laurin Zuan Nardin, Daringad)
-
s.m.
puest, situazion dulà che la temperadure e je avonde alte o alte:
ma jentrait, vignît tal cjalt (Carlo Sgorlon, Ombris tal infinît);
dopo cene, mandade la mularie a durmî, tes lungjis gnots di Invier, i grancj in file, tal cjalt des stalis plenis di bestiis che a polsin rumiant… (Pieri Menis, Sul agâr)
-
s.m.
sensazion di calôr:
vê un cjalt di scjafoiâsi;
murî di cjalt
-
sensazion di calôr par vie di emozions:
par un moment al pensà a so pari Dalban, e chel pinsîr i impià cjalt te muse (Maria Forte, Cjase di Dalban);
Madin si sintive un tuf di cjalt sù pe vite [a viodi Sunte], e po al stave a cjalâle su la barconele adalt intant che jê e lave vie pe stradute fintremai che e voltave daûr dal bosc (Dino Virgili, Come tornâ fruts)
-
s.m.
voie, brame, ancje capriçose e irazionâl o sensuâl:
chê altre dì, tu sês stade ferme cun lui su la place, ce confidencis… […] ce cjalts ti vegnino sù a la to etât…? (Pieri Somede dai Marcs, La buteghe dal barbîr)
Sin. voie
, brame
, gri
, pice
, sbisie
, gole
-
s.m.
(fig.)
partecipazion emotive, sensazion, atmosfere di stâ ben cun chei altris:
i fîs di siôr Simon no vevin nissun dafâ cun chê braide, che no jere mai jentrade tal lôr sanc cu la fadie o cul cjalt di un afiet (Maria Forte, La tiere di Lansing)
Polirematichis e espressions idiomatichis
Proverbis:
- bisugne bati il fier cuant che al è cjalt
- ce che al pare il frêt al pare ancje il cjalt
- che al sedi cjalt che al sedi frêt, cui che al à di bevi al à simpri sêt
- cuant che al è cjalt a vegnin lis moscjis
- cui che al è scotât ta la aghe cjalde al à pôre di chê frede
- cul cjalt dai bleons no si fâs boli la cite
- cul cjalt dal jet no si scjalde la cite
- il cjalt dai bleons nol fâs boli il pignat
- il cjalt dai bleons nol fâs boli la cite
- il jet cjalt al fâs la mignestre frede
- man frede, cûr cjalt
- ni il cjalt ni il frêt il lôf no ju à mangjâts
- ni il cjalt ni il frêt nissun no ju à mangjâts
- ni il frêt ni il cjalt nissun no ju à mangjâts
- si nas cjalts e si mûr frêts
- tal cjalt dut fûr che la glace