viert
/-è-/
viert
[FO]
-
p.pass., adi.
viôt vierzi
, viôt vierzisi
Var. aviert
, daviert
-
adi.
che nol è sierât, che al è in posizion o in situazion di lassâ passâ, jentrâ, jessî, cjapâ, gjavâ e v.i.:
al jentrà in cjase e al lassà la puarte vierte (Dino Virgili, La aghe da pît la cleve);
Zuan al jere pront, dret in pîts, cul libri neri viert (Riedo Pup, Zuan Gjeremie)
-
tignût larc, distirât, no sierât:
un grant Crist cui braçs vierts (Pieri Somede dai Marcs, Co une vôs e clame);
si stufisi une vore a stâ fers, cu la ombrenone vierte, te ploie (Arturo Feruglio, Viaç a Vignesie);
so fi le à cjatade tal doman, li, te cjamare, lungje, distirade, frede, cui voi vierts sul sofit (Pieri Menis, Une cotule pal dì de sagre)
-
(fig.)
pront a cjalâ, a sintî, a capî e v.i.:
chei furlans che a son stâts pal mont cui voi vierts e cuntun fregul di sâl te coce, a son cun nô o ancjemò plui indenant di nô (Josef Marchet, La regjon in pericul);
une orele le tignive ancje vierte ai discors disordenâts che a fasevin i ospits (Meni Ucel, Culturis)
-
adi.
taiât, ferît, rot o sim.:
viodi i muarts e i ferîts che ju strissinavin indaûr […] Tôs di Mulinis cu la schene vierte che respirant al faseve bufulis di sanc grandis tant che zeis (Alan Brusini, I ribei)
-
adi., s.m.
larc e cence ostacui, barieris o limitazions:
une lampade e iluminave la bancjine dulà che si jere fermât il tren, in campagne vierte (Franco Marchetta, Light my Fire);
la grande place ur parè maraveose, vierte al cîl tant che une cape di mariperle (Agnul di Spere, Te grande place)
Sin. larc
, libar
, slargjât
, vast
-
libar, no intun contignidôr, intun ambient o intun spazi sierât:
ae flame vierte dal fogolâr a balin ombris neris sù pal mûr daûr de schene (Dino Virgili, La Gnot dai Sants)
-
adi.
di vistît, massime di vistît di femine, che al à une viertidure largje, spec. sul pet:
al à la muse scure parcè che si fasarà sigurementri lis lampadis, al à la cjamese di Gianfranco Ferrè vierte sul devant (Checo Tam, Un carantan)
-
adi.
che si pues passâi:
la nestre tiere e deventà nome un stradon viert pes corsis sfolmenadis dai Barbars (Josef Cjargnel, La caroce di aur di Sant Martin)
Sin. praticabil
-
adi.
(fig.)
no finît, no decidût, no definitîf e v.i.:
pes causis civîls al covente plui timp e duncje a son inmò viertis (Christian Romanin, Amato De Monte: Il Friûl, patrie des bataiis di civiltât)
-
adi.
(fig.)
di cdn. o dal so caratar, che al è disponibil al dialic e a jentrâ in confidence cun chei altris:
al veve cjapade la ande di lâ ogni dì a saludâ la siore, simpri vivarose e sclete tal visâsi di robis vieris e cussì vierte tal afiet par lui (Alan Brusini, Par stradis lungjis)
-
adi.
(fig.)
che nol scuint, che nol plate nuie:
i discors a deventarin plui vierts, cence piniis o voluçs pôc sincîrs (Maria Forte, Cjase di Dalban)
Sin. clâr
, esplicit
, evident
, palês
, pandût
-
adi.
(fig.)
pront a dâ bon acet, a judâ, ospitâl:
"Va contente Anzuline, e visiti che cheste cjase e reste simpri vierte par te…" (Maria Forte, Cjase di Dalban)
-
pront a acetâ cence prejudizis:
o vin cirût di fat, di pandi une idee che o vevin in comun: une Patrie vierte a dutis lis personis e a ducj i aspiets dal furlanisim, cence preclusions (Dree Venier, Un mandi);
une citât moderne, vierte ae culture e al bon vivi (Angelo Floramo, Cuintristorie dal Nûfcent 1980-1990)
-
adi.
di ambient, che al è in vore, sedi in gjenerâl, che in orari che al fâs servizi al public:
o voi subit in municipi che al jere inmò viert; mi ven incuintri il cursôr (Pieri Somede dai Marcs, A è lade cussì…);
la mostre e je vierte il miercus des 9 di matine a une dopomisdì (Erika Adami, Une bombe colorade tal mieç dai confets);
su la fornâs, par comoditât dai fornasîrs, e jere une «zarde» vierte dut l'an (Pieri Menis, Lis çuculis dal Gjigjo)
-
adi.
(fig.)
di puest, riunion, manifestazion e v.i., li che il public al pues jentrâ cence paiâ e cence vê un invît o un permès speciâl:
la partecipazion ai incuintris e je vierte ai socis. La cuote associative pal 2015 e je di 20 euros (Erika Adami, «In file» cui eretics dal Friûl)
-
adi.
[TS]
fon.
di vocâl, articolade cuntune viertidure dal canâl fonatori plui grande che no lis vocâls clamadis sieradis:
la oposizion e je restade tes vocâls mediis sieradis, derivadis di une alte curte o di une medie lungje, e viertis, derivadis des mediis curtis (Sandri Carrozzo, Gramatiche fonetiche furlane)
Sin. larc
-
adi.
[TS]
ling.
di silabe, che e finìs cuntune vocâl:
inte silabe finâl vierte la lungjece fonologjiche si realize concretementri dome in cualchi varietât (Franco Finco, Fonetiche e fonologjie dal furlan centrâl)
Sin. libar
-
s.m.
spazi no sierât:
i fruts a passin une zornade tal viert (Oscar Puntel, Aventuris tal mieç dal bosc);
al jere fûr, tal viert, un splaçut, cuntun pâr di taulis, e si sin cjatâts intune dozene di nô (Lelo Cjanton, «Il paradîs al è chest!» Clausiet, il paîs dai spiritâts)
Polirematichis e espressions idiomatichis
Proverbis:
- a vuelin trê robis par salvâsi: bon voli, buine gjambe e puarte vierte
- fin che al è viert il granâr di crist, cui che no si inzegne al è trist
- fin che al è viert il solâr di Crist, cui che no si inzegne al è trist
- par salvâsi a vuelin trê robis: bon voli, buine gjambe e puarte vierte
- une femine e à vierte la sepulture par cuarante dîs daspò dal part