Dizionari de Lenghe Furlane

larc  larc  [FO]

1. adi. che al è avonde o une vore grant te dimension largjece, vâl a dî te dimension che no je ni lungjece ni altece:  i flums imburîts e salvadis cul gravâr largjonon a ûs il Tiliment, o come chei strents e plens di aghe cuiete come la Livence (Josef Cjargnel, Il Friûl al è nassût cussì); la strade e scomençave a lâ in rive jù e si tignive simpri plui dongje dal flum e e jere avonde largje (Agnul di Spere, In Friûl, nossere); un cjapelat cu lis alis largjissimis (Zuan Luîs Filli, Il diau sul Studeniz); Sant Zuan. Na glisiona largja largja, un paisut strent strent (Pier Paolo Pasolini, Peneladis)
   Sin. ampli¹
   
   1. che al à une cierte misure in chê dimension:  ruedonis largjis di cercli une cuarte (Dino Virgili, La aghe da pît la cleve)
2. adi. che al è grant in gjenerâl, in dutis lis dimensions, che al à tant puest:  il tinel, larc e plen di mobilie, al someave pront a scjafoiâti di baroc, tapêts e coltrinis (Carlo Tolazzi, La salamandrie tal fûc)
   Sin. ampli¹ , grant , vast , viert
   
   1. (ancje fig.) che al cjape o che si môf cjapant spazi, che al rive lontan:  Linùs al vendeve lis sôs telis suntun marcjât une vore larc e al veve magazens siei ancje a Napoli, a Cadiç e a Costantinopoli (Adrian Cescje, Liniis di storie sociâl e economiche dal Friûl 1500 - 1800); e jere pâs largje su lis braidis e la cube dal cîl alte e scuride (Maria Forte, La gnot di Radeschi)
   2. grant di numar:  la television e à une funzion prioritarie parcè che a pet dal analfabetisim te lenghe furlane de plui part dai furlans, e rive a cjapâ un public larc (Erika Adami, La lenghe furlane tai mieçs di comunicazion)
      Sin. grant , numerôs , bondant , alt¹
3. adi. che al à puest a disposizion, che al sta comut:  "Ti fasìno plui puest?" "Nol covente, o soi za larc ca"
   Sin. comut , asiât¹
4. adi. tignût viert, lontan di alc altri, spec. di elements che a van insiemi e che a podaressin stâ dongje tra di lôr o dongje di alc altri:  al lave mostrant la sô marcjanzie cui braçs larcs (Meni Ucel, I colaçs)
   Sin. slargjât , viert
5. adi. (fig.) pront a dâ, gjenerôs:  "I contadins no son mai di "datimis"" e diseve jê ridint "no son mai larcs…" (Maria Forte, Cjase di Dalban); a era ladina di cour e largja tal dâ via (Novella Cantarutti, Se i tu mi voul, tu mi voul)
   Sin. gjenerôs , ladin¹ , liberâl , magnanim
6. adi. (fig.) di alc di imateriâl, che al cjape dentri, che al tocje tancj elements, argoments e v.i.:  dâ al Friûl une forme di autonomie plui largje che no aes altris regjons talianis (Josef Marchet, Cuarde e savon); i unics riferiments ae lenghe furlane in tescj normatîfs […] a vevin caratar incidentâl o ben a jerin di tutele de lenghe tune suaze plui largje di promozion culturâl (Donato Toffoli, Relazion dal Grup di lavôr "Planificazion linguistiche"); si sintive distacât dal presint e al viodeve lis robis intune prospetive plui alte e plui largje (Carlo Sgorlon, Prime di sere)
   Sin. bondant , grant , grues , penç , ampli¹ , slargjât
7. adi. (fig.) che no si ferme al significât leterâl:  Crist nus à insegnât a domandâ ogni dì il pan che nus covente, te plui largje acezion (Antoni Beline, Sant Jacum, là che al finìs il mont)
   Sin. ampli¹
8. s.m. estension frontâl, dimension che no je ni la altece, ni la lungjece:  su la cjarte gjeografiche la isule e someave une sclese di ongule […] che e faseve 30 Km di larc par 15 di lunc (Fabian Ros, Eivissa mon amour)
   Sin. largjece
9. s.m. spazi viert e libar, spec. rispiet a alc che al siere ator o a alc che pal rest al è stret:  al veve scuviert che là che i sterps a lassavin un spêl di larc, il teren al jere dut sflorît di piçulis rosis blancjis (Franca Mainardis, La liende dal riûl); si cjatà te sale di spiete: un larc jenfri dôs riis di cjamaris tal mieç dal repart là che e tacave la chirurgjie dai umigns (Amedeo Giacomini, Tal ospedâl)
   Sin. slarc
   
   1. (fig.) cundizion di libertât, di viertidure:  cualchi sodisfazion, si à di cjatâle […] par no che ta la anime e nassi la voie di scjampâ a tirâ flât intal larc (Josef Marchet, Lis predicjis dal muini)
10. s.m. [TS] agr. striche di tiere jenfri doi filârs:  un larc dal cjamp (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    Sin. mitât , plagne , plane , peçâl , fîl
11. s.m. mâr viert, mâr lontan de rive:  vevin scoviart un on che vogava al larc intuna barcja (Ranieri Mario Cossâr, Gnot di Sant Silvestri)

Polirematichis e espressions idiomatichis

• a la largje loc.av.
• a larc loc.av.
• a lis largjis loc.av.
• a lunc e a larc loc.av.
• ae largje loc.av.
• aes largjis loc.av.
• al larc loc.av.
• fâ larc loc.v.
• fâsi larc loc.v.
• in lunc e in larc loc.av.
• tignîsi a la largje loc.v.
• zirâ al larc loc.v.
• zirâ pal larc loc.v.

Proverbis:

• il rimiedi pai cais e je la scarpe largje
• larc di bocje, strent di borse
• larc di bocje, strent di man
• tal larc al sta il pôc e il trop