largjece
/-gjè-/
lar|gje|ce
[CO]
-
s.f.
estension lineâr di alc dal so pont plui a diestre a chel plui a çampe:
la Tresemane gnove si po dî che scomence cuntune curve insensibil fûr di Cjavriis, e travierse Padier, e po e continue fûr par fûr, simpri di chê largjece, simpri vualive e simpri drete fin a Trasesin (Giovanni Gortani, Lant jù pe Tresemane);
la nestre [ponte di lance] e comparìs come di medie dimension; lungjece cul bossul 22 cm, chê de lame 18; largjece de lame 3,2 (Lucio Perès, Une lance longobarde cjatade a Baracêt)
Cfr. estension
, dimension
, diametri
, larc
-
s.f.
(fig.)
bondance tal dâ o tal furnî:
te conte, che pûr e à une cierte largjece di particolârs, no comparìs il tiermin benandant (Sandri Carrozzo, Benandants e fenomens siamanics te leterature dal Friûl)
Sin. bondance
, gjenerositât
-
s.f.
(fig.)
il jessi viert, tolerant, pront a confrontâsi:
ce esempli di disinterès, di dissipline, di largjece di ideis che a dan al popul i conseîrs di minorance che a son simpri contraris a chei de maiorance (Josef Marchet, Barufis)