Dizionari de Lenghe Furlane

comut  /cò-/  co|mut  [AF]

1. adi. che al fâs stâ ben, cul spazi, cul timp, cu la forme, cun dut ce che al covente par stâ ben:  al faseve scarpis bielononis, lustris, comudis, pratichis, resistentis a la ploie e al soreli e parfin a la nêf (Laurin Zuan Nardin, Il cjaliâr); la nestre cjasute modeste, ma sigure, ma comude, ma adatade aes nestris cundizions e dibisugnis (Josef Marchet, Ancje cheste e je fate)
   
   1. che al è avonde grant:  la gjachete mi è masse comude (Giulio Andrea Pirona, Ercole Carletti, Giovanni Battista Corgnali, Il Nuovo Pirona); larc, comut o pûr stret, / nissun al fâs di mancul / di tignî cont dal jet (Zaneto, Il jet)
   2. s.m. puest, situazion, cundizion li che si sta ben:  sistemâsi tal comut
2. adi. che al sta ben intun ciert lûc o intune cierte situazion:  Lissandri, sentât comut tal piçul ufici, al veve saceât lis primis curiositâts di Stiefin e po i veve contât dut il rest (Franca Mainardis, Il sium di Lissandri)
   
   1. che al è sentât o fer intune cierte posizion:  (al jeve par inviâsi) "Che al stedi comut, sâr mestri, o mangjìn tor une noaltris!" (Pieri Piçul, Vieri e gnûf)
3. adi., s.m. che, cui che al fâs lis robis cun calme, cuant che i va ben a lui
4. adi. in funz. di av., cence dificoltâts, cence fastidis:  il malât al sarès vuarît comut (Maria Forte, Il Bide di Miot)
5. adi. che al conven, che al da un tornecont:  une pratiche di rinunziâ a pensâ, un usâsi a dî bausiis comudis invezit che veretâts critichis (Sandri Carrozzo, Vuere e pâs - Il conflit linguistic in Friûl jenfri vuere cidine e pâs bausarie)
6. s.m. ce che al conven, che al zove, ancje in maniere egoistiche:  cuatri buteghîrs che di simpri a vevin fat nome i lôr comuts (Alan Brusini, Alpin jo mame!); vin pensât in cumon, / par comut des carocis e de int, / ste gnot di imbastî un puint / sul pas del Nadison (Pieri Çorut, Il Strolic furlan par l'an 1836)
7. s.m. (coloc.) sente di gabinet, implant igjienic dulà che si va a fâ i dibisugns
   Sin. cagadôr
   Var. comet
   Cfr. cabôt , gabinet , necessari
8. s.m. sostance derivade dai escrements umans doprade par coltâ:  il frut al jere colât te vascje dal comut e lu à salvât nome un miracul, insoçât come che al jere te cache e tal pissin (Alan Brusini, Par stradis lungjis); al è un odôr spaventôs di comut ta chel curtîl (Checo Tam, Minigonis)

Proverbis:

• no si à di lamentâsi dal comut