Dizionari de Lenghe Furlane

vîf  vîf  [FO]

1. adi. che al à vite:  dut il mulin si sdrumà te roie. […] Une jone cjadude a traviars dal jet e veve copât sâr Cecco. Done Ane le gjavarin fûr vive par miracul, jê e un frutin di tete (Catarine Percude, La mulinarie); [tornant dal cjamp di concentrament] al è rivât adore a fâi savê ae mame che al jere vîf e intent a tornâ (Ivano Urli, Storie di Min); al tirà sù i bregons e al lassà viodi la gjambe ancjemò fassade, lui le palpave come par sigurâsi che e jere ancjemò vive e no di len (Pieri Menis, Sul agâr)
2. adi. che al è ancjemò presint, in vore:  une ricercje su ce che al è restât in dì di vuê dai benandants e, plui in gjenerâl, su lis tradizions che a son restadis ancjemò vivis tal Friûl di vuê (Fabian Ros, Il cine furlan)
   Sin. corint¹ , presint
   
   1. di idiome, ancjemò fevelât:  pensait par esempli a la lenghe ebraiche, bielzà muarte in timp di Jesù Crist. Par volontât di un popul e je tornade a resurî daspò plui di doi mil agns, cumò l'ebraic e je une lenghe vive intal cerviel di plui di cinc milions di personis (Franc Fari, Il cjâf dai furlans)
   2. che al è caraterizât di vitalitât, di energjie, creativitât e v.i.:  la musiche furlane e je plui vive di simpri (ARLeF, Suns 2013); chê dal teatri par furlan e jere une risorse vive pe promozion de lenghe e de culture (Max Mauro, Un Friûl difarent: i 90 mhz di Onde Furlane)
3. adi. plen di snait:  fruts discolçs e peçotôs, ma vîfs e svelts come noglarûi (Maria Forte, La rive di Sant Pieri)
   Sin. brilant¹ , dinamic , ferbint , gjubiâl , imburît , morbinôs , pevarin¹ , spiritôs , spirtât , svelt , vitâl
   
   1. che al mostre o al comuniche fuarce, energjie, inteligjence, emozion e v.i.:  voi fonts, vîfs, che ti foropavin cuant che ti cjalavin (Lucio Perès, Gno barbe Sisto); nol rivave a diliberâsi des bussadis e des strentis vivis di afiet (Maria Forte, Cjase di Dalban)
4. adi. caraterizât di moviment:  se o vignîs une dì sù par ca, o lin a sentâsi dongjelaltris sul rivâl grant dal Luri, in cueste di soreli, a sintî cemût che e cjante la aghe vive de mê tiere furlane (Dino Virgili, La aghe da pît la cleve)
5. adi. caraterizât di energjie, fuarce, ancje contrast:  tante la int intervignude e une vore vîf il dibatit dopo de presentazion (Silla Stel, Atlant dai servizis sanitaris e sociosanitaris in Friûl)
   Sin. gnervôs , vivarôs , ferbint
6. adi. che al à un nivel, une gradazion fuarte intune cualchi carateristiche:  tal coridôr a jentravin i rais dal soreli di un barcon de bande dal amont, e il paviment al veve riflès cun colôrs vîfs (Agnul di Spere, I prâts des Savodagnis)
   Sin. brilant¹ , caric , cjalcjât , cjalt , cjariât , imbuît , infogât , penç , sflandorôs , slusint
7. adi. (fig.) che al è ben presint inte memorie:  il non di Fausto [Schiavi] al è ancjemò vîf intor pal Friûl, cundut che la sô azion politiche tal Moviment e je durade sì e no cinc agns (Adrian Cescje, Tal non di Fausto Schiavi)
   Sin. fuart¹ , presint
8. adi. [TS] sport de bale, in diviers sports, inmò in zûc
   Sin. bon
9. s.m. persone che e je in vite:  il predi al slargjava la binidission sui vîfs e sui muarts (Novella Cantarutti, I cjans di not); "Oh ce lusôr di lune plene, un vîf e un muart e cjaminin iniseme" (Popolâr - Istitût di Ricercje Achil Telin, El pat di sposâsi - Tiaris di Acuilee)
10. s.m. (ancje fig.) part sensibile dal cuarp o da la anime:  la tiere sbregade, come feridis sul vîf (Dino Virgili, La aghe da pît la cleve); il sanc i è lât sù tal cjâf e, come se le vessin scoreade sul vîf (Pieri Menis, Chei di Muraie)

Polirematichis e espressions idiomatichis

• a flame vive loc.av.
• a fûc vîf loc.av.
• anime vive loc.s.f.
• clamâ vîfs e muarts loc.v.
• fâsi vîf loc.v.
• plui muart che vîf loc.adi.
• tocjâ sul vîf loc.v.

Proverbis:

• al vâl plui un mus vîf che no un dotôr muart
• cui che al è muart al è in foran, cui che al vîf al mangje pan
• cui vîf su la cjar muarte, cui sun chê vive, cui sun chê rabiose
• dulà che no si va di vîfs, si va di muarts
• fin che si è vîfs no si è muarts
• fin che si è vîfs si à sperance di viodisi
• i mus si mangjiju vîfs
• l'aur al è la sepulture dal om vîf
• miôr un mus vîf che no un dotôr muart
• picjâts suntun claut ma vîfs
• si vîf une volte sole e daspò muarts no si campe une ore
• trê feminis par cjase: une vive, une muarte, une picjade daûr de puarte