Dizionari de Lenghe Furlane

sflandorôs  sflan|do|rôs  [AF]

1. adi. che al ilumine cun intensitât, che al fâs une vore di lûs:  une zornade clare, cuiete, cuntun soreli sflandorôs (Pieri Menis, Chei di Muraie); da une viertidure che e cjape mieze parêt cu la vereade a cuadrei di cristal e jentre une lûs sflandorose (Pieri Somede dai Marcs, Un pugn di moscjis)
   Sin. slusint , luminôs , lusorôs
   
   1. che al è clâr, che al riflet la lûs:  une golaine di arint sflandorose come la lune (Angelo Floramo, Bortul e Ghite)
      Sin. clâr , inceôs , lusorôs
   2. che al à un colôr une vore slusint, vîf:  colôrs diviers unîts insiemi, vîfs e sflandorôs come un grant macet di rosis di prât (Pieri Menis, Une cotule pal dì de sagre)
      Sin. vîf , vivaç , vivarôs
   3. plen di lûs:  te cjamare al è inmò scûr, ma des fressuris dai barcons, e travane la lûs di une buinore sflandorose (Alan Brusini, Gian Paolo Linda, I forescj)
      Sin. lusorôs , luminôs , iluminât
2. adi. (fig.) che si pues paragonâ cu la lûs, par une cualsisei cualitât positive:  un popul di antighe e sflandorose civiltât (Josef Marchet, L'esempli di adalt)
   Sin. lusorôs , luminôs
3. adi. (fig.) fat cun pompe, cun spese, cun ricjece:  dut al jere deventât vêr te sô vite, ancje il matrimoni sflandorôs di un fi (Maria Forte, Cjase di Dalban); Indrì, te tribune di onôr, al è maraveât di chê liturgjie sflandorose (Diego Navarria, Patriarcjis fûr dal ordenari)
   Sin. pompôs , siôr , lussuôs , ric , sontuôs
4. adi. (fig.) une vore biel, che si mostre in dute la sô bielece:  la fantate e jere jevade sù denant di lôr in maniere maestose, se pussibil inmò plui biele e sflandorose (Raffaele Serafini, Soreli jevât a mont)
   Sin. maraveôs , splendit , magnific
   
   1. une vore positîf, une vore favorevul:  si son vierts senaris sflandorôs par fâ afârs (Riedo Pup, O cun Zico o cence Zico)
      Sin. lusorôs , luminôs
5. adi. (fig.) di espression, cjalade e v.i., plene di serenitât, ligrie, felicitât, entusiasim e v.i.:  "La int a contin la nestre liende sul clap di cjase…" e zontave Nita cui voi sflandorôs (Dino Virgili, La aghe da pît la cleve); un biel ridi, sflandorôs e sincîr, che i impiave i voi di une lûs di bontât (Roberto Ongaro, Il muc)
   Sin. luminôs , slusint , lusorôs