Dizionari de Lenghe Furlane

lusorôs  lu|so|rôs  [AF]

1. adi. che al ilumine, che al fâs lûs:  [il planetari] nus insegne a orientâsi tal cîl e a cjatâ lis costelazions e lis stelis plui lusorosis, nus fâs viodi il soreli e i planets (Gloria Angeli, Il Strolic furlan pal 2013)
   Sin. slusint , luminôs , sflandorôs
   
   1. che al è plen di lûs:  al viodeve chei luncs curidôrs lusorôs, chei camarons blancs e cidins, chês scuelis, chei curtîi plens di ligrie e di vite (Pieri Somede dai Marcs, O mi ricuardi); e cui che al torne / al cjate ducj, par saludâ / su la place curiose / o sul sagrât lusorôs (Maria Forte, Te mude di fieste); il dormitori al jere lusorôs e net (Alan Brusini, Come tai romançs)
      Sin. iluminât , slusorât , luminôs , clâr
   2. che al è clâr, che al riflet la lûs:  intun cuadri lis robis claris a parin plui lusorosis se a son dongje lis ombris e lis maglis (Josef Marchet, Lis predicjis dal muini)
      Sin. clâr , inceôs , sflandorôs
   3. che al à un colôr une vore slusint, vîf:  la butilie dal vin, di un ros lusorôs, e sierave il segret dal so vivi, e lui al deventave legri, legri, … simpri plui legri (Maria Forte, La tiere di Lansing)
      Sin. vîf , vivaç , vivarôs
2. adi. (fig.) di espression, cjalade e v.i., plene di serenitât, ligrie, felicitât, entusiasim e v.i.:  Nita e jere une fantacine cui voi bogns e lusorôs che, tal ridi, e faseve vignî tal cjâf cualchi conte di agnui (Dino Virgili, La aghe da pît la cleve); la muse dal Pelegrin si fasè ridinte e lusorose, come se al ves grandis robis di dî sun chel argoment (Carlo Sgorlon, Il dolfin)
   Sin. luminôs , slusint , sflandorôs
3. adi. (fig.) che si pues paragonâ cu la lûs, par une cualsisei cualitât positive:  de Svuizare nol covente fevelâ: al è il plui lusorôs, il plui fortunât, il plui persuasîf esempli di ordenament federâl dal mont (Josef Marchet, Trê salts tal scûr: costituzion - republiche - autonomie)
   Sin. sflandorôs , luminôs
   
   1. une vore positîf, une vore favorevul:  Diu al pues vierzi puartis ancje li che no ‘nd è. Lui al cambiarà la tribulazion di îr intun doman seren e lusorôs (Tonin Cjapielâr, Un regâl misteriôs)
4. adi. (fig.) fat cun pompe, cun spese, cun ricjece:  eco i cjantôrs e lis confraternitis e il plevan cul piviâl tiessût di fîi di aur, contornât dai zaguts, che al puarte il Santissim sot il baldachin lusorôs (Pieri Somede dai Marcs, Corpus Domini)
   Sin. pompôs , siôr , lussuôs , ric , sontuôs , sflandorôs