Dizionari de Lenghe Furlane

gnervôs  gner|vôs  [AF]

1. adi. dai gnerfs, formât di gnerfs, che al à a ce fâ cui gnerfs, cu lis celulis dal cuarp che a trasmetin sensazions e comants:  lis struturis gnervosis dal lengaç a son localizadis su la superficie laterâl de scuarce dal cerviel (Giacomo Rizzolatti, Laila Craighero, Speculazions su la origjin dal lengaç)
   Var. gnarvôs , nervôs
2. adi., s.m. che, cui che nol è calm:  "[…] ma ce gnervôs che tu sês vuê, ce isal sucedût?" (Pieri Somede dai Marcs, Barbane); un trot di cjavai gnervous (Novella Cantarutti, Li samassi)
   Sin. ansiôs , aprensîf , irecuiet , preocupât , sbarlufît , stranît , tirât , gnervin¹ , agjitât , iritabil , malcuiet , spasimât , spirtât
   
   1. che al mostre mancjance di calme:  la Ulive e butà il lat te ramine cuntun spesseâ gnervôs e si invià filade cuintri la cjase di Ghite Cosset (Maria Forte, La tiere di Lansing)
3. s.m. umôr o sensazion di mancjance di calme:  a lui, Dalban, i veve cjapât il gnervôs. Ma Fidrì aromai nol taseve (Maria Forte, Cjase di Dalban); Gusto al scugnì sentâsi, di tant che i tremavin i zenoi pal gnervôs (Roberto Ongaro, Il muc); trê plans di scjalis al à fat, par fâsi passâ il gnervôs (Ivano Urli, Il progrès)
   Sin. ansie , ansietât , ecitazion , incuietudin , tension , gnervosetât , gnervosisim , gnervin¹ , fastidiôs , sustul , urtôs , irecuietece , malcuietece , sbisiament , sbisie , smanie
4. adi. che si môf o che al reagjìs ben svelt:  al amirave chel sbati e tornâ a sbati des piecis blancjis su la piere dal lavadôr e chês mans sutis e gnervosis che a tuarzevin, a insavonavin, a striçavin cun maestrie (Roberto Ongaro, Cretevierte)
   Sin. energjic , rapit , saltarin , svelt
5. adi. (fig.) di espression o di stîl creatîf, fat di formis curtis e di cambis imburîts:  cheste ancone e chê di Zui a son doi moments une vore impuartants te art di Domeni [di Tumieç], grafiche e gnervose chê di Sant Pieri, e maestose e essenziâl chê di For Disore (Bepi Agostinis, Storie de art in Friûl)
6. adi. dal cuarp o di une sô part, che si presente sut e al mostre lis fibris muscolârs:  Line e cresseve ben: une misture di soreli dal misdì e buere di tramontan. Gnervose tant che un cuargnolâr, tuartelice tant che un venc (Roberto Ongaro, Cretevierte)
   Sin. gnervin¹
   Cfr. cervin
   
   1. di cjar di mangjâ, cun tantis fibris duris
      Sin. gnervin¹ , stielôs
7. adi. (fig.) di cualsisei fenomen o agjent, che al à une ande incostante, cun cambis imburîts
   Sin. balarin , instabil