Dizionari de Lenghe Furlane

tirât  ti|rât  [FO]

1. p.pass., adi. viôt tirâ , viôt tirâsi
2. adi. che al è tignût o che al sta in tension, dret:  sul fîl di fier tirât di un barcon in chel altri a jerin simpri a suiâ peçots (Dino Virgili, La aghe da pît la cleve); La maie ben tirade e mostrave lis liniis di un rezipet a ponte che al armave un sen prospar (Antescûr, Il svol dal Falcone); e slissotave cu la man lis cuviertis ben tiradis (Alan Brusini, Come tai romançs)
   
   1. che al è metût in maniere di stâ displeât, di cjapâ dut il puest a disposizion, di jentrâ intun ciert spazi e v.i.:  al cirì di cjalâ dentri vie la cjase, fermantsi ai barcons dal plan de strade, ducj cu lis tendis tiradis (Carlo Sgorlon, Ombris tal infinît); a si sigure se il clostri al è ben tirât (Pieri Somede dai Marcs, Al fresc)
3. adi. di argoment, resonament e v.i., che nol à une buine fonde:  la etimologjie e je un pôc tirade, ma a 'nd è di piês, e cuindi in mancjance di rasons plui bielis jo mi contenti di cheste (Vincenzo Luccardi, Florean dal Palaç, III, 34)
   Sin. tirât pai cjavei , stentât , sfuarçât
4. adi. che al è obleât di une situazion, di une circostance, che nol è comut pe mancjance di alc, pe scarsetât di une risorse:  o sin un pôc tirâts cui timps
   Sin. strent
   
   1. di une risorse, che e je scjarse, che no 'nd è avonde o che e baste a pene a pene:  un cost, par chei timps, une vore alt par un belanç familiâr za tant tirât (Alida Pevere, La promesse mantignude)
5. adi. in tension par vie dal sfuarç, de emozion, de concentrazion e sim.:  i fantats a vevin i voi lusints e i muscui dai braçs tirâts (Dino Virgili, Il cûr te tiare); i uficiâi a corevin sù e jù tirâts in muse e a berlavin ordins un daûr di chel altri (Gianni Gregoricchio, Trê feminis); oms intimpâts di sessante agns e frutats di cuindis sedis che a batin il tac ducj tirâts e cu la sclope in man (Ivano Urli, Storie di Min)
   
   1. dai voi, une vore vierts e fis:  «Se tu lu disis a cualchidun, ti trai cu la sclope…» i veve dit Carlin cui voi tirâts di spirtât e la vôs ferme (Pieri Menis, Chei di Muraie); il malât al veve la muse zale e dute un sudôr, i voi tirâts che si viodevii dome che il blanc (Amedeo Giacomini, Tal ospedâl)
      Sin. viert , discocolât , spalancât
6. adi. che al sta atent di spindi mancul che al pues:  in sumis, di tirât che al jere, Luigi Torriano al jere deventât larc di sachete, fin che tal 1786 al fo interdet e i fo nomenât un tutôr (Pierluigi Visintin, Friûl e furlans te Histoire de ma vie di Giacomo Casanova); siore Marie e jere tirade sun dut, simpri plene di pôre dai debits e de miserie (Antoni Beline, Pre Pitin)
   Sin. avâr , pedoli , caìe , pedoglôs , cancar¹ , strent , sparagnin , tegne , tegnôs , venâl , stitic , strent di sachete , barbin² , carogne , carognôs , cragne , crodie , crumîr , esôs , speculant , spelorc , spelorcje , sticin , strice , stricecrodie , striçot , tacagn , tangar , tichign , tichigne , cragnin , cragnine
   
   1. pôc gjenerôs, ancje in cuistions che no son di bêçs:  i miei students a disin che intai judizis o soi tirade (Gianni Gregoricchio, Trê feminis)
7. adi. rifinît in maniere di dâ une cierte impression estetiche:  la façade e jere tirade a fin e blancje (Pieri Somede dai Marcs, Pre Josef)
   
   1. (zerg.) vistût e sistemât in maniere une vore atente ae mode:  tu, simpri dut tirât, dulà crodistu di lâ (DLH Posse, Fûr dai coions); tal salon centrâl a saran stâts un centenâr di lour, dute int ben tirade (Stiefin Morat, Kebar krossè)
      Sin. lecât

Polirematichis e espressions idiomatichis

• tirât sù in code loc.adi.
• tirât sù in codet loc.adi.

Proverbis:

• la suste simpri tirade e piert la fuarce
• par no deventâ splantâts, bisugne sei simpri tirâts