Dizionari de Lenghe Furlane

avâr  a|vâr  [CO]

1. adi., s.m. che, cui che al è une vore tacât ai bêçs che al à, che nol vûl spindiju:  cheste è la tombe di chel avaron, / che in vite par fâ bêçs al stentâ tant, / mangjâ mâl, bevi piês, in rest galant, / cjapiel frust, abit rot, e trist scufon (Ermes di Colorêt, I, 70)
   Sin. barbin² , carogne , carognôs , cragne , crodie , crumîr , esôs , pedoglôs , sparagnin , speculant , spelorc , spelorcje , sticin , stitic , strent , strice , stricecrodie , striçot , tacagn , tangar , tegne , tegnôs , tichign , tichigne , tirât , cragnin , cragnine
   
   1. (fig.) che, cui che al stente a dâ o che si straten, no dome bêçs o robis materiâls:  si sa che a fâ auguris nol coste nuie e alore parcè sei avârs? (Roberto Ongaro, Il muc)
2. adi., s.m. che, cui che al è bramôs di bêçs e ricjecis:  al jere tant avâr che al cjalave simpri bas cu la sperance di cjatâsi bêçs par tiere (Alan Brusini, Come tai romançs); e l'avâr insaziabil, che in passât / al bisognôs l'à tirât jù la piel, / […] / che la finissi pûr cul laç al cuel (Pieri Çorut, Pronostic del 1824)

Proverbis:

• agricultôr avâr nol fo mai ric
• avâr agricultôr, no si è mai fat siôr
• avâr al è dut il mont
• dal muart no rispueste, dal avâr no gratitudin
• di un avâr tu puedis sperâ alc, di un lôf no stâ sperâ nuie
• dôs robis a son buinis daspò muartis: avâr e purcit
• l'avâr al coparès lis moscjis par vendi la piel
• l'avâr al cope il pedoli par vendi la piel
• l'avâr al cope il pulç par vendi la scusse
• l'avâr al sclape la moscje par vê la piel
• la tiere no vûl ni puars ni avârs
• par cuinçâ ben il lidric al vûl: pal vueli un avâr, pal asêt un moderât e a messedâlu un mat