Dizionari de Lenghe Furlane

strent  /-è-/  strent  [FO]

1. p.pass., adi. viôt strenzi , viôt strenzisi
   Var. stret
2. adi. tignût dentri di alc che al cjape, che al siere, che al limite, che al fasse e v.i.:  cul cjâf strent jenfri lis mans, al stave pensant (Zuan Lurinçon, La Madalene); mi ven dongje ridint, lizere, il so pet strent tune cjamesute (Alan Brusini, Gian Paolo Linda, I forescj); al veve il braç dret fassât strent fin sul comedon (Amedeo Giacomini, Tal ospedâl)
   
   1. leât o dât dongje a fuart:  leadis lis mans daûr de schene cuntun filistrin strent di fâur mâl (Alan Brusini, Par stradis lungjis)
   2. sierât fuart:  i siet fruts di Cleve si plantavin denant cui pugns strents tes sachetis (Dino Virgili, La aghe da pît la cleve)
3. adi. di vistiari, scarpe, manece o sim., che al sta dongje dal cuarp:  al jere il timp che lis fantatis a ziravin cui bregons strents a lis cjavilis e la permanente tai cjavei (Checo Tam, Cocteau Twins su Netun (ma no il planet))
   
   1. che al è in tension tor di alc o che al è cjapât dentri cun tension:  la cjamese […] i sbicjave fûr dai bregons tignûts sù da une cinturie ofegade di corean, strente sot la panze (Pieri Somede dai Marcs, Al è muart Cercil)
4. adi. che al è metût o si met in mût di cjapâ pôc spazi, di stâ tacât di altris elements o di un limit:  al tornà indaûr sul pat, strent tal cjanton, spaurît (Pieri Menis, Nadâl ancje par Gjelmin)
5. adi. pôc pront a spindi o ancje a prestâ o a dâ:  no stait a crodi che a sedin tant gjenerôs, a son strents pai altris, e larcs par lôr (Pieri Somede dai Marcs, Un pugn di moscjis); par dî la veretât cumò, in famee nol mancjave nuie, ma la misure e jere restade. A stavin strents tal spindi ancje cumò (Maria Forte, La tiere di Lansing)
   Sin. avâr , sierât , tirât
   
   1. pôc bondant:  a va la anade strente (Fabio Simonutti Masolini, L'afituâl de lune. Lunari pal 1878)
6. adi. (fig.) che nol lasse pôc margjin, pocje pussibilitât di contradizion, contestazion:  al scolte cuant che i si fevele e al argomente cun logjiche strente e convinzion (Adrian Cescje, Memoriis di politiche linguistiche); [...] che la sô opare e smiràs a otignî plui autonomie, a diliberâsi dal control strent di scjafoiâ di Vignesie (Pierluigi Visintin, Friûl e furlans te Histoire de ma vie di Giacomo Casanova)
7. adi. di rapuart, relazion, parintât e v.i., dret, che al ten dongje:  i lôr rapuarts [dai inglês] cui stâts dal Commonwealth […] a son plui strents e plui impuartants che no i leams che a puedin vê cui popui di Europe (Josef Marchet, Federazion europee tra nazions o tra regjons?); o ai un leam strent cul Friûl (Christian Romanin, Sandra Pizzolitto Pupatello: «Furlan is better! Il Friûl? La puarte de Europe pal Canadà»)
   
   1. di cdn., dongje te parintât, te amicizie, te colaborazion e v.i.:  no veve parincj strents, e nancje amîs cussì cjârs che a vessin podût judâle e confuartâle (Franca Mainardis, Il sium di Lissandri)
8. adi. limitât tal spazi, spec. tal sens de largjece:  i flums imburîts e salvadis cul gravâr largjonon a ûs il Tiliment, o come chei strents e plens di aghe cuiete come la Livence (Josef Cjargnel, Il Friûl al è nassût cussì); a conosseva una par una li pieri dal cogalât e i scjalins, un larc e un strent, che a rivavin fin sul paoul di len (Novella Cantarutti, Il curtîf dai Cocs); a jerin cussì jentrâts intune des cjasis dal borc, cjase piçule e scure, cui barcons strents e sierâts cui gatars di fier (Franca Mainardis, Grivôr)
   Sin. piçul
   
   1. une vore limitât tal timp:  o viodarìn ca di cualchi dì se a saran problemis, parcè che i timps a son strents (Walter Tomada, Une anade buine pal Furlan)
      Sin. curt
   2. (fig.) limitât tant che viertidure mentâl, culturâl, tant che percezion psicologjiche e v.i.:  e restave a olmâ lontan, scuasit che fintremai di in chê volte i someàs masse strent l'orizont de sô campagne (Franco Marchetta, Madalene)
9. s.m. spazi piçul:  a si invià da la banda di cjasa, tal strent da la cal (Novella Cantarutti, Al era un anzal)
10. s.m. (fig.) pocje disponibilitât di risorsis:  scugnî someâlu [di jessi siôrs] par no sbassâ la famee. Piês che no vivi tal strent, cence la dibisugne di platâlu (Maria Forte, Cjase di Dalban)
11. av. cun fuarce, cun prese fuarte:  la cjape strent strent pai braçs (Dolfo Zorzut, La furlane)
    Sin. salt² , fuart¹ , a strent

Polirematichis e espressions idiomatichis

• a bocje strente loc.av., loc.adi.inv.
• a strent loc.av., loc.adi.inv.
• a strent di comedon loc.av.
• cui dincj strents loc.av., loc.adi.inv.
• stâ strent loc.v.
• tignî strent loc.v.

Proverbis:

• larc di bocje, strent di borse
• larc di bocje, strent di man
• no si po fâsi larc tal strent