Dizionari de Lenghe Furlane

curt  curt  [FO]

1. adi. di pocje estension intal spazi, di pocje lungjece:  il jet par Laurinç al jere masse curt, e lui nol rivà a indurmidîsi par un biel toc (Agnul di Spere, I prâts des Savodagnis); il Templi al jere un periptar doric cun 6 colonis sui lâts curts e 13 su chei luncs (Adrian Cescje, Viaç aes origjins dal Logos)
2. adi., s.m. di vistît, che al lasse discuviertis lis parts che par solit a son cuviertis:  al someave ancje lui un dai lôr, vistût a la todescje, cul cjapiel muc furnît, par daûr, di une scovetute di plumis. Dome i bregons curts no ju veve mai doprâts, nancje tal plui grant Istât (Maria Forte, La tiere di Lansing); vistude di fâsi cjalâ, ma no masse, cotule curte, tacs a spiç (Luciano Rocco, La foghere)
   Sin. minim , staronzât
3. adi. di colp o tîr, o sim., che al rive pôc lontan e di pocje potence:  mantignî il possès dal balon cun lungjis fasis di passaçs curts e precîs
4. adi. che al dure pôc timp:  purtrop il timp de gjonde al è simpri curt (Gianni Gregoricchio, Trê feminis); al veve une grant presse: curte e jere la zornade e lungje la strade (Pieri Somede dai Marcs, Clâr e scûr); di Invier, cu lis mans e il respîr su la lastre dal barcon, cuant che i dîs a son curts e l'an scuasit finît (Cristina Noacco, Faliscjis)
   Sin. svelt , svoladi
5. s.m. film che al dure avonde pôc, pal solit mancul di cuindis minûts:  dongje di chescj luncmetraçs che o vin citât no son di dismenteâ i curts, tant che i bascs dal progjet Kimuak o i galizians metûts adun di autôrs tant che Alfonso Camarero e Jairo Iglesias (Fabian Ros, La Mostre dal Cine e devente europeane)
   Sin. curtmetraç
6. adi. [TS] fon. di sun, par plui di vocâl, che al à durade minime:  inglês e furlan no àn consonantis lungjis ma a àn lis vocâls lungjis (dut il contrari dal talian), e il significât di une peraule al pues cambiâ dome pal fat di vê dentri une vocâl curte o une lungje: il pas ≠ la pâs, brut ≠ brût; cussì ancje in inglês: full [ful] «plen» ≠ fool [fu:l] «stupit», cot [kot] «jetut» ≠ caught [ko:t] «cjapât» e v.i. (Franco Finco, Se tu sâs il furlan tu imparis l'inglês!)
   
   1. di silabe, che si fonde suntune vocâl curte:  l'ultin pît [dal esametri grêc] al è simpri formât di dôs silabis, dôs lungjis, o ancje une lungje e une sole curte (trocheu); il penultin pît al è scuasi simpri formât di une lungje e dôs curtis (Sandri Carrozzo, Pierluigi Visintin, Jentrade de Odissee)
7. adi. di discors, scrit e v.i., dit o scrit in pocjis peraulis:  daspò di une introduzion curte dal assessôr che mi à indicât tant che coordenadôr de Comission, o ai cjapade la peraule (Adrian Cescje, Memoriis di politiche linguistiche); i messaçs, par funzionâ, a àn di sei curts e capîts di ducj (Sandri Di Suald, Comunicâ la autonomie)
   Sin. di pocjis peraulis , sintetic , sut , sut di peraulis , svelt
8. adi. piçul di stature:  «Poo-stii-noo! …» al sberlave par talian il puestin di Waidhofen, un om curt e grues, che si varès podût cjapâlu par un sac di stope che i vessin metût parsore, par ridi, un cjavon ros come il fûc (Pieri Menis, Une letare par Bepo)
   Sin. cracagnot , cracul¹ , fracadiç , minût , trepul , bas , piçul
9. adi. di part dal cuarp, mancul lungje de medie o di ce che e podarès jessi:  e veve manonis che a parevin sglonfis e i dêts curts e mucui (Pieri Menis, La maghe no fale); vê i cjavei curts pe naie (Sandri Di Suald, Ah! la provincie)
   
   1. di cdn., caraterizât dal fat di vê une part dal cuarp mancul lungje de medie:  favite sbite, / curte di gjambis, / lungje di vite, / strope cjarandis (Zuan Nazzi Matalon, Ottorino Burelli, Sacheburache)
10. adi. (fig.) di une cualitât, insuficient o mendôs:  al veve la viste curte come nissun. Par lei al scugnive puartâ i libris a cuatri dêts dai voi (Carlo Sgorlon, Il dolfin)
    Sin. clop , debil , limitât , mancjant , mendôs , scjars
    
    1. (fig.) di cdn., che al à une cierte cualitât, segnade da un complement di limitazion:  une femenute scarmuline e curte di sintiment (Maria Forte, Cjase di Dalban); cualchi biât dordel, ignorant e curt di comprendoni (Josef Marchet, Autonomie dal spirt); Ce aial dite? soi un pôc curte di orele (Pieri Somede dai Marcs, L'avocat e la luianie)
11. adi. di cafè o di brût o sim., concentrât, fis:  camarîr, par plasê un cafè curt e doi capucins
    Sin. cjariât , concentrât , penç , strent , ristret , fis

Polirematichis e espressions idiomatichis

• fâle curte loc.v.
• mangjâle curte loc.v.
• meti a lis curtis loc.v.
• par fâle curte e dîle dute loc.av.
• taiâ curt loc.v.
• tignîle curte loc.v.
• une curte e une lungje loc.s.f.pl.
• une lungje e une curte loc.s.f.pl.
• vêju curts loc.v.
• vêle curte loc.v.

Proverbis:

• a Sant Tomâs e je la zornade plui curte
• cui che al à pocje tele che al fasi curte la cjamese
• il curt al è simpri in ponte
• il curt al reste da pîts
• il maridâ al è curt, il stentâ al è lunc
• la falsetât e à il tabâr curt, par tant che e ciri di taponâsi, i reste simpri cualchi part scuvierte
• la strade drete e je la plui curte
• la strade plui curte a je chê che si cjape daurman
• lis bausiis a àn i pîs curts
• lis cjacaris lungjis a fasin la gnot curte
• lunc o curt, un baston al è simpri un baston
• no meti e gjavâ, dut cuant in curt al va
• vît curte, vendeme lungje