Dizionari de Lenghe Furlane

minût  mi|nût  [FO]

1. adi. piçul di dimensions, spec. di cuarp:  a vore finide, no si sdrumie la tasse parsore di Beput, picinin, minût, scarmulin, sepulît sot i fassuts (Ivano Urli, Beput Cinisiti); il fantat, invezit, al tirave daûr di sô mari, massime inte figure minude e intal colôr palit de muse (Gianni Gregoricchio, Trê feminis); [Gargagnà disore] in union cun Gargagnà Disot, cun Lupignan e cualchi altri cjasâl plui minût, a formin il Comun di Scufons (Josef Marchet, Lis predicjis dal muini)
   Sin. minim , picinin , piçul , pitinin
   
   1. (fig.) pôc impuartant:  e jere la prime volte che Zuan al jentrave vulintîr tes robis minudis de famee (Maria Forte, La tiere di Lansing)
   2. (fig.) cence fuarce, cence podê:  a i impià drenti il gust rabin, antîc da jessi lari e paron da la zent minuda (Novella Cantarutti, Il Bolp)
2. adi. formât di particulis une vore piçulis:  la Cridule si fruçone e si sfreole, finint in glerie smamide e minude (Luciano Gaudenzio, Michele Zanetti, Dolomitis Furlanis. Lis vôs dal Cidin); traviars lis cjanis sclipignava una rosada minuda, che in part la ploia, in part lis ondis fasevin penetrâ fin là dentri (Federigo Comelli, Il me paîs); plovisine minudine / lizerine, / tu vens jù cussì cidine / senze tons e senze lamps, / e tu dâs di bevi ai cjamps (Pieri Çorut, La plovisine)
   Sin. fin¹ , sutîl
   
   1. fat di tancj piçui elements o detais:  la mê ativitât minude e continue fate di peraulis, di letaris, di azions di informazion […] e à fate semence (Adrian Cescje, Memoriis di politiche linguistiche)
3. s.m. unitât di misure dal timp, sessantesime part di une ore:  il tren al rivà te stazion cuntun intart di uns dîs minûts (Agnul di Spere, In viaç di domenie); a mancjavin pôcs minûts aes cuatri (Alan Brusini, Par stradis lungjis)
   Sin. minût prin
4. s.m. piçule cuantitât di timp:  no stave un minût ferme (Maria Forte, Cjase di Dalban); e jentrà une infermiere, e i metè un termometri e i riduçà. I domandà se al veve fam. "I puarti di mangjâ ca di un minût", i disè, lant fûr (Agnul di Spere, I prâts des Savodagnis)
   Sin. secont , secont di minût , moment , lamp¹
5. adi. di bêçs, in monedis di pôc valôr:  al tire fûr i bêçs minûts e ju bute sul taulin e al fâs di lâ vie (Alviero Negro, Int di masnade)
   Sin. svelt
   
   1. s.m. monede piçule:  al cîr se al à di minûts te sachete, e no 'nt cjate, che chei cuatri che al veve ju veve spindûts par chei bussui che a vevin bevût a buinore (Meni Ucel, La vacje); Eliseo al cjapave i bêçs cence contâju e cence mai protestâ. Al meteve tal tacuin chei di cjarte e i minûts te sachete (Carlo Sgorlon, Prime di sere)
      Sin. becin , svelt , monede

Polirematichis e espressions idiomatichis

• besteam minût loc.s.m.
• spacâ il minût loc.v.
• vignî sù chei cinc minûts loc.v.
• vignî sù i cinc minûts loc.v.

Proverbis:

• pan di une dì, ûf di une ore, lat di un minût e vin dut l'an