Dizionari de Lenghe Furlane

sutîl  su|tîl  [FO]

1. adi. pôc grues:  une fetute sutile di pan blanc (Ivano Urli, Storie di Min); e coventave la cjane gargane! Chê e jere lungje, sutile e lizere (Lucio Perès, A pescje tal suei); i fîi lizêrs e sutîi de la jarba dei prâts (Federigo Comelli, Il me paîs); piel sutile come la sede (Alan Brusini, Come tai romançs)
   Sin. fin¹
   Var. sotîl
   
   1. formât di elements rârs o pôc grues:  par strade, tornant a cjase, e rizinave une ploiute sutiline (Alan Brusini, Gian Paolo Linda, I forescj)
2. adi. di cdn. o di part dal cuarp, magre:  la maestre Teresine, une signorine alte e sutile, delicade, che di Istât e vignive a scuele cul ombrenin par parâsi dal soreli (Pieri Menis, A scuele); la agna, a jodala, duta sutila, vistida simpri di lana grisa, a podeva parê di latisin e invessit a era di rovri (Novella Cantarutti, La agna Mariana)
   Sin. fusât , magri , scarmulin , scjarnît , sec , sut , zentîl , fin¹
3. adi. (fig.) di sun, no tant fuart e cuntune tonalitât alte:  l'ucielut le compagnave cul so strît sutîl (Alan Brusini, Come tai romançs); Tonine de More cu la vôs sutile e tacà une cjante (Maria Forte, Sul cjar di Pauli Gurin)
   Sin. fin¹
4. adi. (fig.) di odôr, no tant penç ma penetrant:  un profum sutîl di tabac si spandeve par dute la cjase e al jessive parfin tal curtîl (Pieri Menis, La gjate)
5. adi. (fig.) dal aiar, che al da sensazion di lizêr tal respirâlu, che al è fresc, sut e net, o ancje srarît de altitudin:  sedi stade la aghe, sedi la ploie o l'aiar plui sutîl o ce saio jo, no si inmalial lui e di bot i pete sù une fierice che dut lu consume (Josef Cjargnel, La liende di Dimponç)
   Sin. fin¹
6. adi. (fig.) di sensazion fisiche o psicologjiche, che e rive fin indentri, ancje se in mût no scjassôs:  al jere un frêt sutîl in chel dì di Nadâl (Pieri Menis, Il «pigjama»); un malstâ sutîl i vignive sù dal fonts, indulà che alc al jere stât sierât (Maria Forte, La tiere di Lansing); e jere rivade a insedâ ancje dentri di me la incuietudin e la pôre sutile pai mil pericui dal mont (Carlo Sgorlon, Il dolfin)
   Sin. sordin
7. adi. (fig.) inteligjent, inzegnôs e prudent, che al rive ai siei fins cence imparêsi masse:  furducjâ sot vie, cuntune politiche paziente e sutile (Josef Marchet, Cuintristorie dal Friûl fin sot la Italie); un sant om, pre Nocent, ma furnît di une diplomazie des plui sutilis (Arturo Feruglio, Viaç a Vignesie); un om tant discret e sutîl di inzen che mi palesave dut ce che al saveve cence dîmal a vôs (Alan Brusini, Gian Paolo Linda, I forescj)
   Sin. fin¹
8. adi. (fig.) che al va une vore insot intai detais plui specifics, fasint distinzions ancje dificilis:  a diserin alc di une vore sutîl, vadì masse, e no rivai a capî dut a fat nuie (Agnul di Spere, Un de maiorance)
   Sin. fin¹
9. adi. (fig.) dificil di contentâ
   Sin. dificil , incontentabil , sofistic

Polirematichis e espressions idiomatichis

• cjalâ pal sutîl loc.v.
• lâ pal sutîl loc.v.
• lâ tant pal sutîl loc.v.
• mangjâle sutile loc.v.

Proverbis:

• cuant che la ue e nas di avrîl, si bêf par sutîl
• no si file mai tant sutîl che il cjaveç nol salti fûr