Dizionari de Lenghe Furlane

dificil  /-fì-/  di|fi|cil  [FO]

1. adi., av. di alc, che al domande fadie, sfuarç, abilitât:  l'azot […] nol jere disponibil intai laboratoris di scuele stant la tecniche di produzion dificile e costose (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); la veretât al è che [fâ traduzions] al è un lavôr lunc e dificil, al covente metisi in zûc e vê cussience de dificoltât de sfide (Walter Tomada, Pierluigi Cappello: «L’om plui concret? Il poete»)
   Sin. complès , complicât , delicât , dulinciôs , dûr , faturôs , grivi , imberdeât , impegnatîf , incrosât , ingredeât , ingropât , intrigât , intrigôs , laboriôs , lambicât , ledrôs , sfadiât , sfadiôs , spinôs , travaiôs
2. adi. che al à o al da problemis di realizazion, che al à pocje pussibilitât di rivâ a un risultât bon o sigûr:  in ocasion di Pentecostis al è dificil cjatâ une sistemazion a Leipzig (Checo Tam, La maree nere); tes gjavis di piere e di marmul, par esempli, al è dificil cjatâ lavoranzie dal puest (Francesco Micelli, La emigrazion dal Friûl - Vignesie Julie te Belgjiche); dificil dî ce che al passave pal cjâf e tal cûr di Lissandri in chei moments (Franca Mainardis, Il sium di Lissandri)
3. adi. che nol è facil di capî:  un banc, cuatri cjadreis, la vetrine dai bombons e la scrite difûr: «Offelleria» une peraule dificile come chês des oparis che gno pari al cjantave (Alan Brusini, Come tai romançs); argoments filosofics, masse dificii par me (Carlo Sgorlon, Il dolfin); bisugnarès viodi se la trascrizion greghe de peraule ebraiche e je juste e po il significât precîs di un tiermin di dificile interpretazion (Antoni Beline, Sant Jacum, là che al finìs il mont)
   Sin. artificiôs , grivi , incomprensibil , involuçât , ledrôs , scûr¹ , sfuarçât , studiât , ricercjât , lambicât , ingredeât , intorteât
4. adi. che al da problemis, fastidis, soferencis e v.i.:  butâle in ridi tai moments plui dificii (Cristina Noacco, Faliscjis)
   Sin. complès , complicât , critic , dûr , faturôs , grivi , imberdeât , incrosât , ingredeât , ingropât , intrigât , intrigôs , ledrôs
5. adi. che al è plen di problemis, conflits, complicazions e v.i.:  la stesse New York e je une citât dificile (Oscar Puntel, Mario Collavino: une bandiere furlane parsore il gnûf World Trade Center di New York); no sai cumò, ma in chê volte Piluver al jere un paîs dificil. Buine int, stentadore e lavoradore, ma par cont di glesie tant che semenâ tes gravis (Antoni Beline, Pre Pitin)
   Sin. complès , complicât , critic , dûr , faturôs , grivi , imberdeât , incrosât , ingredeât , ingropât , intrigât , intrigôs , ledrôs
6. adi., s.m. che, cui che si suste, rabie, ufint cun facilitât, che no si sa ben cemût cjapâlu:  Doro, il pupà di Mario, al jere un om dificil e scjaldinôs, […] vuai se a vessin dit alc (Meni Ucel, Fam)
   Sin. gropolôs , impussibil , incontentabil , intratabil , intrigôs , ledrôs , osteôs , problematic , scontrôs , ors , salvadi , ruspi , ruspiôs
   
   1. adi., s.m. che, cui che al è plen di esigjencis, che no si contente, che al vûl fâ lis robis precisis e v.i.:  "Sù sù, che nol stedi a fâ il dificil e che nus cumbini un biel tai." (Roberto Ongaro, Cretevierte)
      Sin. incontentabil , ledrôs , lichigne , lichignôs , lichignot , massepassût , musichin , nasic , stomeghin , storpeôs , straneôs
7. adi. di frut o zovin, cun compuartaments o ancje problemis che a domandin atenzion particolâr o ancje assistence
   Sin. insiliôs , ledrôs
8. adi. cun scjarse probabilitât:  o pensi che al sedi dificil vinci: o viôt miôr Brasîl, Ingletiere, Spagne… a son dutis scuadris fuartonis (Christian Romanin, Dino Zoff: «O vin lidrîs buinis, o vin di tignîlis di cont»)
   Sin. dubiôs , improbabil , dûr , grivi
9. s.m. ce che al à lis carateristichis des acezions parsore:  il dificil al è capî ce che si plate sot dai simbui (Sandri Carrozzo, Il miluç de magne); par merits a son ducj un miôr dal altri. Il dificil al sta nome tal sielzi (Guido Antonioli, Florean dal Palaç, I, 1)

Proverbis:

• al è facil di direzi lis cjasis di chei altris, al è la sô che al è une vore dificil
• al è facil di ofindi, dificil al è di sopuartâ
• il prin miâr di florins al è dificil di fâ, chei altris daspò a vegnin bessôi
• se si semene un sac di plumis, al è dificil di racueilis