Dizionari de Lenghe Furlane

salvadi  /-và-/  sal|va|di  [FO]

1. adi. di plante o animâl, che al vîf libar in nature, cence jessi coltivât o arlevât o tignût dal om:  tal mieç dai pins, a colp, si cjatave un prât florît di rosutis salvadiis (Pieri Menis, Cemût che o soi restât caporâl); un scjap di uciei neris a traviersavin il cîl, svolant in rie come gruis o razis salvadiis (Carlo Sgorlon, Prime di sere)
   Sin. spontani
   Var. selvadi
2. adi. di bestie di cjase, pôc mugnestre:  cualchi cjanat salvadi al urlave di lôf vie pe taviele (Dino Virgili, La aghe da pît la cleve)
3. adi. di un puest, che nol è tignût in culture, che nol à int a vivi o che a 'nd à pocje, che al è lontan di altris puescj dulà che e vîf plui int, che al da pocjis risorsis par vivi o par stâ cun comoditât:  dîs oris di cjaminade, intun ambient salvadi e cence aghe (Cristina Noacco, Faliscjis); [rivâts in Carintie] dopo lis streturis salvadiis dal Cjanâl dal Fier, ur pareve come di dismovisi intun zardin (Dino Virgili, La aghe da pît la cleve); il «Cuel de tese», une cuche salvadie, plene di clapigne, cun cisis bassis di çamars (Pieri Menis, Destins)
   Sin. pustot
4. adi., s.m. (ancje spres.) che, cui che al vîf in maniere primitive:  [I Langobarts] no jerin salvadis vignûts fûr dai boscs: une vore di lôr a jerin stâts in Italie a batisi cuintri i bizantins, dongje dai gotics, e a cognossevin benon il paîs e lis usancis (Josef Marchet, Cuintristorie dal Friûl fin sot la Italie); blestemis intun lengàs di salvadis (Ugo Pellis, Catinuta)
   Sin. indigjen , primitîf
   
   1. che, cui che al vîf o si compuarte in maniere libare, istintive, ferbinte, pôc o nuie limitade di regulis e convenzions:  il zardin par me al jere misure uniche dal mont, pai zûcs, pe vite che o menavi, di frut salvadi e fantasiôs (Alan Brusini, Come tai romançs); i fantats a son selvadis cuant che a plombin tal amôr (Giorgio Ferigo, Dal pruc)
5. adi., s.m. (fig.) che, cui che nol à o nol mostre afiet, compassion, sintiments positîfs, che nol à rispiet pes normis di convivence:  chel altri al jere simpri stât, cun ducj, un salvadi prepotent (Maria Forte, Varc di confin)
   Sin. barbar , incivîl
   
   1. une vore trist:  chei salvadis cence inficje di uman a rivavin sui cjavai sbrenâts, e tun zigon plui fuart, a sburtavin i cjavai fin dentri dal lât te uce de concuiste; e po a jentravin, a brusavin lis cjasis e il fûc e chei urlons a jemplavin il cîl e la tiere (Dino Virgili, Cuel Valâr)
      Sin. barbar , crudêl
6. adi., s.m. che, cui che nol à plasê di stâ tant dongje di chei altris:  [lis aganis] no jerin tristis, ma nome un tic salvadiis (Josef Cjargnel, Lis aganis); Luzie no veve mai cjolt un centesim di chei bêçs, ma i plaseve di viodi, di savê cetancj che a 'ndi veve chel salvadi di cugnât vedran (Pieri Menis, A uciei cu lis archetis)
   Sin. asociâl , ruspi , ruspiôs , storpeôs
   
   1. dificil di tratâ, pôc formâl, pôc creançôs, che no si sfuarce di complasê chei altris:  ca sù nancje nol met pît, parcè che al dîs che chest al è un paisat di salvadis (Josef Marchet, Lis predicjis dal muini)
      Sin. asociâl , grubian , incivîl , ruspi , ruspiôs , durion¹ , malcreançôs , malegraciôs , malincreançât , musan , ombrôs , parmalôs , ruviers , scontrôs , storpeôs
7. adi. (fig.) che nol à limits, che nol rispiete regulis:  Saro-Wiwa al veve vuidât une lote no violente par difindi il so popul cuintri des multinazionâls dal petroli […] responsabilis dal sfrutament salvadi e dal incuinament de regjon dal delta dal Nigjer (Carli Pup, Teritoris - Oms di Libertât)
8. s.m. dome sing., puest là che e je une vegjetazion spontanie:  al varès cambiât la muse a chel teren rampit e glereôs. […] Al sarès rivât a fâ florî chel salvadi (Galliano De Agostini, Semenant tal salvadi)
9. s.m. dome sing., complès des bestiis salvadiis, spec. in riferiment al fat di cjaçâlis e mangjâlis:  lâ a cjace. Chê sì, che si svariisi tai cjamps e si torne dongje cu la sgoife sglonfe di salvadi par meti te cite (Alan Brusini, Par stradis lungjis); boscs che a i dismovevin tal pinseir il gust seneous da li ori di cjaça, li vuaiti, i trims dal salvadi socorât, li bracadi dai cjans (Novella Cantarutti, Il sâr Menon)

Polirematichis e espressions idiomatichis

• cafè salvadi loc.s.m.
• ceredan salvadi loc.s.m.
• fenoli salvadi loc.s.m.

Proverbis:

• no bisugne pierdi il dumiesti pal salvadi
• no stâ mai pierdi il dumiesti pal salvadi