ruspi
rus|pi
[AF]
-
adi.
che al à une superficie iregolâr, cun elements che a dan infûr e che a tocjâju a gratin, a bechin e v.i.:
la scusse ruspie dai pôi sul ôr da la aghe (Dino Virgili, La aghe da pît la cleve);
mi jeri impirât tun jet alt e glaçât jenfri doi linzûi ruspis (Alan Brusini, Gian Paolo Linda, I forescj)
Sin. ruvit
Cfr. becant
, grintôs
, ruspiôs
-
(fig.)
ancje di alc che nol à pardabon une superficie, dâ la sensazion di becâ, di gratâ:
une gnot che al ploveve a selis e al sglovave un aiarat ruspi, che no si varès lassât un cjan fûr de puarte (Maria Forte, Dome la cjampanute di Sant Bortul)
-
adi., s.m.
(fig.)
che, cui che al à formis o manieris pôc delicadis, pôc rispietosis, pôc creançosis:
al veve miôr dal sigûr une vite dure, cence fantasiis, cence fotis pluitost che une vite comude e sbrendulone; al veve miôr sì i siei montagnârs ruspis, scontrôs, ignorants - ma ancje bogns e ricognossints (Pieri Somede dai Marcs, O sielç lis stelis);
ma subit si inacuarzè che la sô vôs e jere masse ruspie e i someà di vê ancje mancjât di rispiet ae none (Pieri Menis, Sul agâr);
Gusto nol jere un ruspi o un malin. Par nuie! (Maria Forte, Cjase di Dalban)
Sin. gropolôs
, dûr
, ruspiôs
, salvadi
, grintôs
, ledrôs
, malegraciôs
, murgnon
, muriot
, mutrignot
, scabrôs
, scontrôs
, grubian
, ordenari
, vilan
-
adi.
che nol à gracie, finece, elegance:
dut il complès al da un messaç di preziositât lizere, in linie cu la influence joniche che e indolcìs la fature arcaiche des figuris e lis inricjìs di particolârs naratîfs e al fâs nete distinzion cu la essenzialitât ruspie des metopis dal Tesaur dai Sicions (Adrian Cescje, Viaç aes origjins dal Logos);
ai let cun plasê chisti storiutis, semplissis e scletis; pissuli rubutis, un pôc ruspiis par via dal fevelâ gurissan un pôc durut (Ugo Pellis, Dô peraulis di preambul a Storiutis gurissanis)
Sin. grês
, grubian
, ordenari
, rustic