Dizionari de Lenghe Furlane

intrigôs  in|tri|gôs  [AF]

1. adi. dificil di capî, di frontâ, di risolvi, di fâ e v.i.:  chest [il 1848] al è un slambri de nestre storie tant intrigôs che mai, di contâ. Il Paschin nol à olsât meti lis mans daprûf (Josef Marchet, Cuintristorie dal Friûl fin sot la Italie); i vieris documents a son dispès dificii di lei, stant che a son mâl tignûts, scrits cun ingjustris che a valin pôc, fruçâts, cun grafiis intrigosis e vie indenant (Barbara Cinausero, Ermanno Dentesano, Sanctus Jegorius: ce sant isal chest?)
   Sin. dificil , intrigât , problematic , sfadiôs , spinôs , complicât , intorteât , imberdeât , complès , incrosât , ingredeât , lambicât , delicât , imbroiôs
   
   1. caraterizât di dificoltâts, problemis, complicazions e v.i.:  une zornade, denant dì, dopo une gnot passade tor di un part intrigôs, [la comari] e tornave a cjase, strache e plene di sium (Pieri Menis, Il forest); il troi de autonomie al è lunc e intrigôs e par otignî cualchi risultât concret si scugne dome tignî dûr cun ustinazion e no fâsi inceâ des impromissions e des lusinghis (Renzo Balzan, Autonomie cjargnele)
2. adi. di cdn., che al da fastidi, che al è dûr di sopuartâ:  e la Mabile no lu freolave; pitost e deventave simpri plui intrigose, scuasit par gjavâi savôr ae polente (Maria Forte, Mabile la Lunghine)
   Sin. bibiôs , dispetôs , rognôs , tenticul , fastidiôs , ledrôs , fetôs , osteôs , dificil
   
   1. di alc, che al da fastidi e che al fâs fâ fadie:  si inzegnave a taiâ cuntun vecjo massanc cualchi manel di agacie, che po al ingrumave ai pîts dai çocs dai arbui grancj seâts l'an prin. E jere une vore intrigose, che al veve scugnût fâ par contentâ so pari (Franca Mainardis, La liende dal riûl)
      Sin. rognôs , fastidiôs , ledrôs , brut , dûr
3. adi. che al à curiositât pes robis e in particolâr pai afârs di chei altris:  jo, che o jeri une frute curiose e intrigose, o vevi cjatât un scagnut e o jeri lade a sentâmi propit tacade dai pîts di Otmar (Paule di Scjecât, Otmar)
   Sin. curiôs , inframetent , sbisighin , furighin
4. adi. che nol fâs stâ comuts, che al fâs vergognâ:  peraulis di simpri, di ducj i inamorâts di chest mont. Ma che il sogjet di lôr e fos mê mari come femine, mi meteve intor un malstâ intrigôs, nancje che o fos daûr a cognossi une vergogne (Gianni Gregoricchio, Trê feminis)