Dizionari de Lenghe Furlane

complès  com|plès  [FO]

1. s.m. grup di personis, robis, elements che a àn carateristichis o finalitâts in comun o che a formin une struture sole:  ancje deventant cristiane, la popolazion e implantà un complès di cerimoniis diferentis di chês che si fasevin a Rome e a Milan e di li e nassè la liturgjie aquileiese, che e mostrave ce clime di indipendence che al regnave chenti ancjemò in chê volte (Josef Marchet, Cuintristorie dal Friûl fin sot la Italie); ah, la vite! Ce complès di siums, di delusions, di fantasiis e di realtâts che si incuintrin e si slontanin fasint e disfant lis sperancis dai oms, come ondis di flum che simpri si mudin di forme (Roberto Ongaro, Il muc)
   Sin. agregât , conession , cumbinazion , insiemi , struture , union , grup¹ , intun , intune
   
   1. grup di edificis:  si è garantide la costruzion dal complès plui impuartant e nomenât dal moment: la Freedom Tower, il gnûf World Trade Center (Oscar Puntel, Mario Collavino: une bandiere furlane parsore il gnûf World Trade Center di New York); cuant che a stevin fasint sù il Morena, ducj a restavin di stuc par chest complès residenziâl: une robe modernissime e biele (Alan Brusini, Amîs come prime)
   2. grup o union di plui robis, personis, elements e v.i. considerât inte sô totalitât:  la Relativitât Gjenerâl e puartà a la Cosmologjie Relativistiche - il ram de fisiche che e studie la evoluzion dal univiers tal so complès, intant di dute la sô storie (Sergio Cecotti, Teologjie algjebriche)
2. s.m. grup che al fâs musiche:  dut il program dal festival al è stât cambiât e no si sa cui che al sune… o miôr… tal daûr dai manifescj a son scrits a penarel i nons dai complès che a sunaran gratis dome intune des dôs alis, parcè che chê altre le àn sierade (Checo Tam, La maree nere); o fasìn part di un complès corâl
   Sin. grup¹
3. s.m. [TS] psic. insiemi di pinsîrs, ricuarts, desideris, in part o dal dut incussients, che si formin vie pe infanzie e che a condizionin in manieris diferentis la vite afetive e il compuartament dal om adult
4. s.m. probleme o malstâ psicologjic:  nô no podìn decidi il destin dal mont. O podìn dome fâ la nestre part. Cun dignitât e cence complès (Antoni Beline, Identitât e mondializazion); o vin di lavorâ ancjemò tant par che ce che o vin tal cûr al rivi a diliberâsi dai complès di inferioritât e di perifarie che o vin tal cjâf (Sandri Carrozzo, La autonomie e nas tal cûr, ma e cres tal cjâf)
   Sin. claut , fisse , inibizion , lambic , manie² , matetât , menade , ossession , paturnie , sbisie
   
   1. inibizion, bloc psicologjic:  chest al è juste apont il spirt che al à caraterizât chest gjenar di furlans pal mont. Int grande e cence complès, ancje cuant che a tornavin. Bertoia, par un esempli, al jere un che al saveve cemût puartâsi a New York e a Sant Laurinç (Luche Nazzi, Il plui grant designer furlan)
      Sin. claut , fisse , inibizion , lambic , manie² , matetât , menade , ossession , paturnie , sbisie
5. adi. costituît de union di plui parts, ancje in ecuilibri delicât tra di lôr:  un prin esempli di ce che al sucedeve fin a no tancj agns indaûr al è chel ploiis acidis che, tai agns '70 e '80 a jerin un probleme viodût nome de bande dal incuinament, cence pensâ che la atmosfere al è un sisteme complès, plen di retroazions (Dario Bianchini Giaiotti, Fulvio Stel, Clime e incuinament: prime l'ûf o la gjaline?); si à di vê biel clâr che la comunicazion in zornade di vuê e je une vore plui complesse di chê che e jere dôs gjenerazions indaûr, par vie che lis formis de comunicazion a son deventadis plui complessis par ducj, e no dome par une part minoritarie de popolazion (Adrian Cescje, Memoriis di politiche linguistiche); il procès di inricjiment dal urani al è une vore complès e al domande tecnologjiis sofisticadis di separazion dai isotops (Alessandro Pascolini, Un mont cence armis nucleârs. Sfidis sientifichis e tecnologjichis)
   Sin. componût , articolât¹
6. adi. che par vie de sô composizion, struture, articolazion e v.i., al pues jessi dificil di capî:  se o viodês un politic, un slogan o un comunicât complès, sigûr che si cjatais devant di un faliment (Sandri Di Suald, Comunicâ la autonomie); no je une preclusion ae idee che la lenghe minorizade e puedi veicolâ ancje concets complès (Carlo Cecchini, Matteo Fogale, Une esperience di plurilinguisim inte didatiche de matematiche)
   Sin. complicât , dificil , dûr , elaborât , imberdeât , incrosât , intorteât , intrigôs , problematic , involuçât , ingredeât , grivi
7. adi. [BF] di persone, che e à pês in plui, che e je gruesse
   Sin. gras , grues , complen , tont , taront , toful , stolf