Dizionari de Lenghe Furlane

claut  claut  [AF]

1. s.m. toc di metal sutîl e a ponte par solit cuntun cjavut slargjât che si bat tal len o in altris materiâi par fissâ, picjâ e v.i.:  al passave il so timp a gjavâ i clauts des breis e a dreçâju, par podê doprâju ancjemò (Antoni Beline, La fabriche dai predis); di un claut de parêt al pindulave l'imprest neri, cu lis mantiis lungjis, par brustulâ il vuardi (Carlo Sgorlon, Il dolfin); un Criston grant e grues, che al veve clauts tai pîts e tes mans (Riedo Pup, Vigji Strassanît)
   Cfr. ponte , stecheton , brucje
2. s.m. ponte di metal fissade sot di suelis, a gomis di machine e v.i., par no sbrissâ, soredut su la glace:  Dreute al partì [soldât], vistût di pano gnûf e cuntun pâr di scarpons, che a scugnivin vinci la vuere nome cui clauts che a vevin intor (Riedo Pup, Dreute)
3. s.m. (fig.) ce che al cause une soference:  e voleve savê là che e jere [sô fie], ce che e faseve, par Agnese al jere un torment: Indulà âstu la frutate? Ce fasie? Ise a servî? Vegnie a cjase ogni tant? Ducj clauts ta chê puare anime (Roberto Ongaro, Il muc)
   Sin. spine
4. s.m. (fig.) idee fisse:  o vin pôre di jessi une altre volte bessôi, o cuasi, a tignî dûr il claut de libertât furlane (Josef Marchet, Legnadis e pidadis); "Batês simpri chel claut, vô!" (Anute Fabris, A passe la scalmane); o vevi un claut tal cjâf, un pinsîr sôl: chel, chel, simpri chel… (Ercole Carletti, L'amôr vieri)
5. s.m. (fig.) sume di bêçs che e reste di paiâ o di tornâ:  mi è restât ancje un claudut, che o ai scugnût sparagnâ altris trê cuatri agns par finî di stropâlu (Josef Marchet, Lis predicjis dal muini)
   Sin. debit
6. s.m. (fig.) sensazion improvise di pericul:  al à vût un claut (Giulio Andrea Pirona, Ercole Carletti, Giovanni Battista Corgnali, Il Nuovo Pirona); e pardut al è un spavent / un claut trement (Fabio Simonutti Masolini, Lunari furlan cun regâi par l'an 1901)
   Sin. spavent , pôre , spac , spaghet , sbigule , fufe

Polirematichis e espressions idiomatichis

• mastiâ clauts loc.v.

Proverbis:

• a volê gjavâ i clauts cui dincj si reste sdenteâts
• cui che al semene clauts che nol ledi discolç
• di une cjase brusade a restin almancul i clauts e la cinise
• dulà che il pari al met il claut il fi al picje il cjapiel
• il claut vieri al sparagne chel gnûf
• magari picjât a un claut ma vivi
• par un claut si piert un fier e par un fier si piert un cjaval
• picjâts suntun claut ma vîfs
• une bree che no ten claut e je dome di brusâ
• une femine ur fâs gloti clauts ai oms
• une ridade e gjave un claut de casse