Dizionari de Lenghe Furlane

coni  /-ò-/  co|ni  [AF, TS]

1. s.m. gjeom. figure gjeometriche solide che e ven fûr di une rotazion di un triangul retangul intor di un dai catets:  calcolâ il volum di un coni
   
   1. cualsisei robe che e vedi chê forme:  Pico, une des nûf isulis, si presente come un coni di vulcan distudât e sence un pêl di jarbe da cjâf a pîts (Vico Bressan, Cîl e aghe); [il mausoleu] cu lis sôs maestosis struturis di piere, i vivarôs leons de ancone e il coronament a coni […] al è databil al I secul d. C. (Bepi Agostinis, Storie de art in Friûl)
2. s.m. toc di len, o in câs di altri materiâl, fat a ponte, in mût di jessi doprât par jemplâ vueits, fâ spessôr, sfuarçâ sclapaduris e v.i.:  [il gan] al veve ficjât las çates tal sclap tignût viert par mieç di un coni (Luigi Gortani, Al marcjât di Vile); cui roui, cui faiârs, cui frasins taia, / che van jù stramaçant par chei valons: / cui cjaça il coni jù, cu lis maçuelis, / e il roul plui grues va separant in stielis (Zuan Josef Busiç, La Eneide di Virgjili)
   
   1. (fig.) ce che al covente par rompi o par jemplâ un spazi, ancje no fisic:  cirî lis ocasions di penetrazion inte muraie des dotrinis stereotipis di chês fuarcis che a jemplin i spazis a drete e a çampe par meti dentri il coni de cuistion identitarie (Adrian Cescje, Memoriis di politiche linguistiche)
3. s.m. sorte di biscot fat sù in forme coniche par meti il gjelât:  cuant che i miei amîs a jessirin dal cine, jo o jeri li sentât sul muret… scunît e cul coni vueit e slapagnât in man (Galliano De Agostini, Un daspomisdì di Istât)
   
   1. chel biscot cul gjelât dentri:  no si pues no jessi contents cuntun coni di gjelât in man (Spirt Anonim, Gjelât di cjocolate)
4. s.m. imprest e oficine par bati lis monedis di metal, lis medaiis, e tai stâts modernis ancje par stampâ i boi e i biliets di bancje:  dentri dal so ream a puedin circolâ dome i bêçs vignûts fûr dal so coni (Fabian Ros, La invenzion dal stât)
   Sin. cugn
5. s.m. (fig.) in metaforis o paragons, persone pôc inteligjente, ancje tant che ofese gjeneriche:  o fâs la figure dal basoâl, culì dûr tant che un coni, contentantmi di cjalâ tancj cjâfs di cuatri che a van sù e jù passantmi denant i voi e fasint alt e bas (Guido Antonioli, Florean dal Palaç, I, 1)
6. s.m. cuantitât di bêçs che si à di paiâ o di tornâ:  che no si infidavin a fevelâ par vie di cualchi coni che e vevin simpri cul paron (Dino Virgili, La aghe da pît la cleve); a jerin misars e a vevin conis di paiâ par dutis lis buteghis e ostariis (Antoni Beline, Pre Pitin)
   Sin. debit , claut , clostri , cuche² , gruse
7. s.m. agr. pît di blave, o in câs di soròs o altris grans, che al reste dopo taiade la gjambe
   Sin. clari , stoc¹ , stec , stecon , bersoli , scjatoc , scjaton , mussul , steule , stronc , stecaron , stecarot , stecheot , scjatùs , poc² , cjanoli , civoc , torcjoli

Polirematichis e espressions idiomatichis

• toc di coni loc.s.m.

Proverbis:

• il prin an di matrimoni o che si inmalisi o che si fâs un coni