debit
/-è-/
de|bit
[FO]
-
s.m.
impegn di dâ o tornâ bêçs a cdn. e sume di bêçs che si à di dâ o di tornâ a cdn.:
no rivi plui a stâi dentri, fâ debits cu la bancje no je robe par me. E po, lis tassis! In curt, o moli dut e o voi sot paron (Igor Londero, Delit in vie del Lavoro);
dopo cualchi an che o tignivi lis redinis dal comun, paiâts une vore di debits e metude in sest la casse, o vevi pensât di fâ lis scuelis gnovis a Pantianins (Pieri Somede dai Marcs, Lis scuelis e la nêf);
al veve cjamât di un debit la sô cjasute (Maria Forte, "Nossent")
Cfr. talpe
, musse
, coni
, claut
, ipoteche
, prestit
-
s.m.
oblic, spec. morâl o juridic, di fâ alc par cdn., di tornâi un plasê e sim.:
al bruntulave cragnôs, sot vie, ancje se al jere in debit di un plasê (Maria Forte, Cjase di Dalban);
al veve di sigûr paiât, ancje cul interès, il debit di agrât che al veve fat agns indaûr in confront di Odile e de sô famee (Franca Mainardis, Il sium di Lissandri)
Proverbis:
- a prometi al è un debit
- cent oris di malinconie no pain un centesim di debit
- cent pinsîrs no pain un debit
- cu lis cjacaris no si paie debits
- cuant che a son fats i debits, lis surîs no ju mangjin
- cui che al à debit al à credit
- cui che al paie debits al fâs capitâi
- cui che nol à debits nol à nancje credince
- cui che nol à debits nol è nancje un galantom
- cuntun solt pocjis voltis si paie un debit
- i debits che si fâs par bondance, si ju paie par cjaristie
- i debits no si ju paie in chê dì che si ju fâs
- in chê dì che si paie un debit si vierç un credit
- mil fastidis no pain un debit
- no si paie i debits in chê dì che si ju fâs
- ogni promesse al è un debit
- par debits no mi picjin e nancje in galere no mi metin
- se tu fasis debits tu cuistis parons, se tu fasis credits tu pierdis amîs