Dizionari de Lenghe Furlane

ponte  /pò-/  pon|te  [FO]

1. s.f. part finâl fine e spiçade di un imprest, di une struture e v.i.:  la none e preparave lis cjastinis, prime lis taiave cu la ponte dal curtìs (Paolo Bortolussi, Lis cjastinis); doi cuars intorteâts come pontis di furducje (Carlo Tolazzi, La salamandrie tal fûc); [Palme] fo progjetade tant che une stele a nûf pontis (Luca Zoratti, Passât gloriôs, avignî dubiôs)
   Sin. spice , spiç
   
   1. toc di piere spiçade o di metal metût insom des frecis e des lancis:  la piche e podeve sei une ponte di lance langobarde (Lucio Perès, Une lance longobarde cjatade a Baracêt)
2. s.f. (fig.) sensazion di dolôr fuart e concentrât:  une tossite che i cjoleve il respîr […] i faseve sintî une ponte di dolôr daûr la schene (Pieri Somede dai Marcs, Nardon e Vigjute di Nani)
   Sin. fite , spine , stocade
3. s.f. part finâl, ancje no spiçade:  la mestre nus mostrave cu la ponte de cjane gargane, figuris picjadis sul mûr (Alan Brusini, Come tai romançs); fâsi ghiti cu la ponte dai dêts (Pieri Menis, Tinut di Libro); si sentà suntune ponte di bancje (Dino Virgili, La aghe da pît la cleve)
4. s.f. part plui alte di alc:  al viodeve nassi la sere da pît des cisis, i cjamps si scurivin, lis pontis dai arbui si indoravin (Pieri Somede dai Marcs, La cjarande); monts de Cjargne cu lis pontis blancjis di nêf (Alan Brusini, Par stradis lungjis)
   Sin. cime , spiç , spice , pic , çuc , cuc³ , piche
   
   1. (fig.) part plui alte di une liste, di une classifiche e v.i.:  un Triest cence nancje une betoniere e cence nancje un strop di cesarons al è invezit in ponte de graduatorie de bondance (Riedo Pup, Tanto cjapo e tanto magno)
5. s.f. (fig.) fase plui alte, di plui intensitât di un fenomen:  pontis di totalitarisim che a metin in evidence la crisi cicliche di ogni sisteme (Fabian Ros, La invenzion dal stât); la emigrazion e je stade continue intai secui 1500, 1600 e 1700, cun pontis di cressite tai moments di cjaristie (Adrian Cescje, Liniis di storie sociâl e economiche dal Friûl 1500 - 1800)
6. s.f. in cusine e in erboristarie, estremitât di une plante, cu lis fueis e in cualchi câs ancje cu lis rosis e lis pomis:  dislidi inte spongje e vueli la cevole e daspò fâ dislidi lis pontis di sclopit taiuçadis (Giorgio Pascoli, Il Litum: jerbis salvadiis te cusine)
   Sin. cime
7. s.f. estremitât di un teritori:  par secui, intant che la Furlanie e fo une code dal mont gjermanic, Grau si tignì in bon di sei une ponte dal mont latin (Josef Marchet, Cuintristorie dal Friûl fin sot la Italie); di Vee, isule grande, viodevisi dome la ponte estreme di miezegnot, par un toc no plui lunc di uns cinccent metris (Agnul di Spere, Int no consumade)
8. s.f. (fig.) cuantitât piçule, sedi di alc di concret che di alc di imateriâl:  a la none si puartave un scartossut di fritulis, che i plasevin. Ma jê e cerçave nome une pontute a pene (Riedo Pup, I furlans e Sante Catarine); mi veve cjalade cuntune ponte di delusion (Gianni Gregoricchio, Trê feminis); o savevi che ti varès fate contente par une ponte di timp (Pieri Piçul, Vieri e gnûf); Minut al alçà il cerneli, e il stomi infûr cuntune ponte di braùre (Dino Virgili, La aghe da pît la cleve)
   Sin. bave , bavele , bec¹ , fregul , ombre , piç , piçade , prese
9. s.f. [TS] artes. sorte di scarpel par lavorâ la piere:  sot la cragne di aghe a vignivin fûr altris peraulis, come se a nassessin fûr gnovis sot la ponte dal spicepiere (Dino Virgili, La aghe da pît la cleve); lis mans a tremavin e no rivavin a tignî fer il scarpel o la ponte (Roberto Ongaro, Cretevierte)
10. s.f. [TS] edil. trâf di len o di metal gruesse, o ancje opare murarie, metude tant che poie par impedî sdrumadis o slacs:  par tantis pontis e cuardis e cjavilis che i vebin metudis intor par tignîle adun, e je restade une barache plene di sfesis (Josef Marchet, La unitât cuintri la unitât)
    Sin. pecol , pidignûl , predul , predule , ripoi , soponte , spraiç
    
    1. (fig.) element che al ten sù:  la zoventût di bessole e cjate pontis par tignîsi sù (Maria Forte, Cjase di Dalban)
11. s.f. [TS] artes. sorte di claut slis e cun spice a coni:  breis che no tignivin plui ni clauts ni pontis (Maria Forte, La tiere di Lansing)
12. s.f. [TS] artes. curtissut par rompi tocs di formadi dûr
13. s.f. [CO, TS] sport tal balon, atacant che al zuie devant de puarte aversarie:  propit la ponte polache e siere cuntun gol la prime manovre puartade indenant cul so compagn di repart, che i da une bale golose tal mieç de aree (Marc Stolf, Pordenone - Monza 1-1)
14. s.f. [CO, TS] med. inflamazion de pleure:  dopo une vite fruiade tal fum dal stancol fasint il prenar, une ponte lu veve cjapât e al jere restât là sù, tes Gjermaniis, a fraidî i siei vues intal forest (Roberto Ongaro, Il muc); si sgrisulin di frêt e Diu vuardi che no ur vegni une ponte! (Josef Marchet, Lis predicjis dal muini); el mâl lu à cjapât / je stade une ponte / che lu à ruvinât (Romeo Battistig (?), Ai Piombi)
    Sin. pleurite
    
    1. (loc.) viôt peritonite
    2. (loc.) viôt apendicite
15. s.f. [TS] becj. viôt ponte di pet
16. s.f. [TS] enol. savôr garp cjapât dal vin cuant che l'acit etilic al tache a mandâlu in asêt

Polirematichis e espressions idiomatichis

• a ponte loc.av., loc.adi.inv.
• a ponte di gusiele loc.adi.inv., loc.av.
• a pontis loc.av., loc.adi.inv.
• cjapâ di ponte loc.v.
• in ponte di pît loc.av.
• in ponte di pîts loc.av.
• vê su la ponte de lenghe loc.v.

Proverbis:

• il curt al è simpri in ponte
• la lenghe no à vues ni ponte ma tant e taie e a cûs
• la pale e à la ponte di aur parcè che la tiere vergjine e je un tesaur
• no mai fâ un mûr se si viôt un clap cu la ponte infûr
• vuarditi di cui che al cjale la ponte des scarpis