Dizionari de Lenghe Furlane

prese  /prè-/  pre|se  [AF]

1. s.f. cuantitât di alc cjapade cu lis pontis dai dêts:  al veve metût tal sachetin de gjachete une prese di vanilie par nasâ bon (Meni Ucel, La ombrene); e cjapà sù dal platut di leton une prese di cinise e le poià, sfreolantle, sul cerneli de Vire, sul ôr dai cjavei (Meni Ucel, La cinise)
   Sin. piçade , ponte , piç
   
   1. (par anton.) piçule cuantitât di tabac:  al tirà sù une prese sul ledrôs de man e al ste li un pôc cu la bocje vierte che i vignive di starnudâ (Dino Virgili, La aghe da pît la cleve); pre Nocent che mi dedi, cjare lui, une prese par che mi sclarissi la melonarie! (Arturo Feruglio, Viaç a Vignesie)
2. s.f. (fig.) cuantitât minime, ancje di alc di imateriâl:  un fregul di coragjo e une prese di fantasie (Antoni Beline, Tal grim de fede e de storie)
   Sin. fîl , fregul , fruçon , ombre , pêl , piç , ponte , rascje , sclip , tic¹ , ninin , tininin
   
   1. cuantitât ancje no tant piçule:  mateant e magari cuntune buine prese di peraulatis parsore vie (AAVV, Sul florî)
      Sin. man , grampe
3. s.f. il cjapâ, il trignî strent e il so risultât:  o restavi ingrampât al gno puest procurant di no pierdi la prese (Enrico Martina, Ricuarts e inlusions)
4. s.f. (fig.) il vê incisivitât, fuarce, efiet:  i mucs a jerin aromai cence prese (Maria Forte, Cjase di Dalban)
5. s.f. ce che al ven cjapât e cuantitât di ce che al ven cjapât, soredut te cjace:  vuê si à fat une buine prese (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
6. s.f. [TS] sport te scjalade, toc di cret che si pues cjapâ cui dêts o li che si puedin pontâ i pîts:  al môf la man a palpon, al cjate une buine prese, si tire sù. Rimpinâ al è come balâ cu la montagne e cirî a ogni pas di lâ daûr de sô musiche (Cristina Noacco, Faliscjis)
7. s.f. [TS] sport mosse te lote di plui gjenars par blocâ l'aversari
   
   1. tal balon, azion al portîr che al cjape la bale
   2. tal rugby, azion di cjapâ un aversari
   3. te natazion, azion dal nadadôr che al tocje l'ôr de pissine par virâ o par rivâ
   4. te gjinastiche, il tignî l'imprest
8. s.f. il deventâ dûr di un materiâl e il mantignî la adesion:  doi trê dîs, e il ciment al fâs prese, si indurìs (Dino Virgili, La aghe da pît la cleve); zes di prese
9. s.f. tai zûcs, il cjapâ lis cjartis, lis pedinis o i tocs dal aversari
   Sin. pie , piade
10. s.f. dispositîf che si pues regolâ pe jessude di fluits:  la prese dal gas
11. s.f. [TS] eletr. dispositîf li che si tache la spine par cjapâ la corint di une rêt di distribuzion:  une volte colegât a la prese di corint di colp l'aparât al veve tacât a sgrasaiâ… ondis AM… vôs lontanis… ondis FM… cjançons di musiche pop (Checo Tam, I nemîs)
12. s.f. [TS] idraul. costruzion par derivâ aghe intun canâl o intun circuit artificiâl:  e ven fate sù ancje un prin toc de roste sul Tiliment par parâsi des plenis e pôc dopo la prese de roie un pôc plui disore di dulà che cumò al è Ospedâl Piçul (Rino Gubiani, Studi da la evoluzion dal paisaç mediant i toponims); il tsunami al à distrut i implants di prese de aghe dal mâr che a alimentavin i sistemis di disfredament [de centrâl nucleâr] (Alessandro Pascolini, Il disastri de centrâl nucleâr di Fukushima Dai-ichi)

Polirematichis e espressions idiomatichis

• fâ prese loc.v.

Proverbis:

• daspò cene une prese di tabac e fâs la plene
• daspò mangjât e bevût, une prese di tabac e ten passût
• daspò mangjât e bevût, une prese e ten passût