Dizionari de Lenghe Furlane

spine  spi|ne  [AF]

1. s.f. struture legnose dure e spiçade di ciertis plantis, cun funzion di difese cuintri dai animâi che a podaressin mangjâle:  o capìs che la Rose vei la spine / par difindi, se po, il so flôr tant biel, / cuant che a crevâjal cualchidun si ustine (Emilio Nardini, La Rose e la Urtie); dispedant na cassia, una spina a ghi si è implantada tal deit poleâr lassant la puntuta implantada (Aldo Tomè, Barba Bortul - Il Strolic furlan pal 1999)
   
   1. (estens.) fuee fine e spiçade, soredut des angustifoliis:  si cjaminave sul muscli e su lis spinis secjis dai pins (Pieri Menis, Tal bosc di Kebespok)
      Cfr. riscle , gusiele
   2. element spiçât ancje artificiâl:  vuarît di bessôl di une spine rusine di reticolât e une gjambe cussì, dute nere (Alan Brusini, Il malât di Cime Undis)
2. s.f. plante cun tantis spinis:  [la strie] e veve fat nassi chel bosc di spinis e po chel grant lât di aghe (Andreina Nicoloso Ciceri, Blancje come la nêf - Racconti popolari friulani I)
   Sin. spin
3. s.f. (fig.) sensazion di dolôr fisic:  mi jere vignût un malstâ pardut, une colarie, spinis tal stomi, cûr mat che al lave a butadis (Giuliana Pellegrini, Gotis)
   Sin. ponte
   
   1. grant dolôr psicologjic, morâl o afetîf:  Però mi sint un ciart no sai ce! Chê ostrighe di mê sûr mi à metût une spine! (Arturo Feruglio, Un grop sul stomi); lui al mi à liberât di un torment, mi à gjavât une spine dal cûr! (Vittorio Vittorello, A ogni cost)
      Sin. cruzie , torment , carûl , claut , asei , lambic
4. s.f. (fig.) preocupazion, fat o element problematic che al fâs stâ malcuiets:  lis minorancis di altre nazionalitât a son simpri stadis une grande spine pal Stât talian (Josef Marchet, Minorancis)
5. s.f. struture a ponte dal cuarp di cierts animâi:  il riç che al arche dutes las spines conche davant da sô buse si presente il sborf (Pietro Cella, Idoneo)
   
   1. struture a ponte dal cuarp di un inset, fate par becâ, ancje cun velen:  "Cjo! Âstu pôre che [i avons] a mi molin la spine?" (Anute Fabris, A passe la scalmane)
      Sin. asei
6. s.f. vues de schene dal pes:  lis saradelis, gjavade la spine, si metin in padiele (Emilia Baldassarre, Ort e cusine)
   
   1. ognidun dai vues luncs e fins, o ancje des cartilagjins lungjis e finis di cierts pes:  o ai une spine di pes plantade jù pal cuel (Diego Navarria, Patriarcjis fûr dal ordenari)
7. s.f. canele cuntune bande spiçade che si impire te bote e chê altre regolade di un mecanisim che se si vierç al lasse vignî fûr il vin:  e meteve sot la semple e e zirave la spine par travasâ un pôc di most (Carlo Sgorlon, Prime di sere)
   
   1. element idraulic che al permet di vierzi, sierâ e regolâ la jessude di un licuit:  sul seglâr e jere la spine gnove: di pôc a vevin tirât dentri la aghe e cussì no si viodevin plui picjâts i cjandêrs cul cop a pendolon (Jolanda Mazzon, Di là de rêt); gambiâ le taniche de bire cuant che le spine no tire plui (Massimo Govetto, Bire su Pluton)
      Sin. spinel
   2. (fig.) ce che al compuarte une jessude, une distribuzion, soredut di bêçs, risorsis e v.i.:  la colpe, simpri daûr dai ambientaliscj, e sarès propite de politiche che prime no à limitât lis concessions, e daspò e à ancje "dismenteade" la spine vierte (Tiziano Gualtieri, Cjargne cence aghe); la Regjon e à decidût di fat di sierâ ai Comuns lis spinis dai finanziaments de leç di tutele des lenghis minoritariis (Roberto Pensa, Stop ai furbits dai sportei pal furlan)
8. s.f. [TS] tecn., mec. element mecanic a ponte:  lis ruedis a corevin a sbighet parcè che a si jerin sgobadis lis spinis dal cjarpint (Dino Virgili, Il cjaruç dai Bas)
9. s.f. [AF, TS] eletr. part di un dispositîf eletric che si impire intune prese par formâ un colegament:  al va li dal regjistradôr e al distache la spine (Laurin Zuan Nardin, Idee teatrâl)
   Cfr. atac , prese

Polirematichis e espressions idiomatichis

• cence spine ni vues loc.adi.inv.
• no jessi ni spine ni vues loc.v.
• stâ atent pe spine e pierdi pal cjalcon loc.v.
• tignî cont pe spine e pierdi pal cjalcon loc.v.
• tignî cont pe spine e spandi pal cjalcon loc.v.
• tignî pe spine e molâ pal cjalcon loc.v.
• tignî pe spine e pierdi pal cjalcon loc.v.

Proverbis:

• cui che al ten cont pe spine al piert pal cjalcon
• cui che al ten cont pe spine al spant pal cjalcon
• fra lis spinis e sta la rose
• nissune rose cence spine
• no bisugne tignî pe spine e pierdi pal cjalcon
• nol vâl tignî sierade la spine se il vin si spant pal cjalcon
• ogni garoful la sô spine
• prin dal matrimoni a son rosis e flôrs, po spinis e dolôrs
• tra lis spinis e nas la rose