Dizionari de Lenghe Furlane

curiôs  cu|ri|ôs  [FO]

1. adi., s.m. che, cui che al à gole di savê, massime pal so gust o par peteçâ:  o jeri une vore curiôs e o soi jentrât par viodi se la tô descrizion e jere juste (Enrico Martina, Ricuarts e inlusions); il frut le cjalave dute cul voli curiôs come par induvinâ alc (Dino Virgili, La aghe da pît la cleve); di glesie jessin fûr fra sbârs e ucadis / circondâts dai curiôs, che impazients / spietin la gnot par fâ lis lôr buladis (Pieri Çorut, La sdrondenade in Autun)
   Sin. atent , furcjumit , furighin , interessât , scrusignot
2. adi. che al fâs vignî voie di savê di plui:  al è curiôs il fat che il sacut amniotic par furlan e in putropis lenghis al sedi calcolât propit tant che un vistît (par esempli cjamese par furlan e par talian, scufe par inglês e francês), il vistît che un al à intor prime di nassi (Sandri Carrozzo, Jenfri vîfs e muarts)
   
   1. che al è cussì strani che al fâs ligrie, che al fâs ridi:  une sdrume di no crodi e jemplave place Sant Marc cui travistiments plui curiôs (Carlo Sgorlon, Ombris tal infinît)
3. adi. che al è fûr dal ordenari, che nol è normâl:  tal 2001, al Premi Friûl, al à partecipât parfin un grup inglês, che al à presentât un toc par furlan, Fat ancjemò plui curiôs, l'autôr e cjantant al è un zovin inglês studiôs di lenghis romanzis (Max Mauro, Un Friûl difarent: i 90 mhz di Onde Furlane); si emozionave di metisi a vaî tant che un disperât. Propit une robe curiose tun om cussì salt e ruspi (Alan Brusini, Par stradis lungjis)
   Sin. balçan , baroc , buf² , ecentric , estrôs , fûr dal vade , maturli , murlac , origjinâl , reful , ridicul , singolâr , strambalât , strani , particolâr , stramp
   
   1. che nol è corint, difondût, che al è tipic dome di un o di pôcs:  ator dal curtîl si è ingrumade une mostre curiose di cjasis, cjasutis, e casopis che si tegnin sù une cu la altre (Maria Forte, La rive di Sant Pieri); Il furlan […] al à une sô maniere di formâ il plurâl dai nons; al à un sisteme di pronons e averbis curiôs, cuntun tratament gramaticâl par so cont (Josef Marchet, Cuintristorie dal Friûl fin sot la Italie)
      Sin. carateristic , particolâr , tipic , ecentric , origjinâl , singolâr , speciâl
   2. che no si capìs la sô reson:  mi pareve di lâ indenant dentri di une fumate, e cheste e jere la robe plui curiose, che se jê si sfantave un pôc intor di me, nol jere par fâmi viodi lis robis plui claris, ma pluitost par visâmi di une lôr misteriositât, che fin cumò no le vevi notade (Carlo Sgorlon, Il dolfin); un om curiôs come la lune
      Sin. strani , misteriôs , stramp , singolâr , particolâr

Proverbis:

• il parcè al è dai curiôs