misteriôs
mis|te|ri|ôs
[FO]
-
adi.
di fat, fenomen e v.i., che al à alc di segret, ancje di magjic:
o che e jere striade o pûr che une fuarce misteriose plui fuarte di jê le comandave (Pieri Menis, Chei di Muraie)
Sin. enigmatic
Var. mistereôs
-
che al à aspiets fantasiôs o inventâts:
tes cunvignis de Aidlcm a jerin passâts e a passavin ogni sorte di visionaris des identitâts, dai restauradôrs dai camuns, dai nuragjics e dai paleovenits ai liberadôrs de misteriose Arpitanie alpine (Adrian Cescje, Memoriis di politiche linguistiche)
-
che al à elements o aspiets no sclarîts:
il famôs archeolic todesc […] Winckelmann […] al sarà copât di Francesco Arcangeli: une storie misteriose di bêçs e di rapuarts omosessuâi (Pierluigi Visintin, Friûl e furlans te Histoire de ma vie di Giacomo Casanova)
-
che nol è ancjemò cognossût:
lu veve puartât vie un mâl mistereôs che, ancjemò, nissun capive [la influence spagnole] (Maria Forte, Cjase di Dalban);
un troi che al podeve lâ pardut tant al jere mistereôs tai siei volts par ca e par là (Maria Forte, La tiere di Lansing)
-
adi.
di cdn., che no si sa cui che al è:
il pitôr, cjapât il so cjapel e il baston di cana di India, si incjamina cul om par lui misteriôs (Zuan Luîs Filli, Il diau sul Studeniz)
-
adi.
di cdn., che al à la ande di vê cualchi segret e che al sta atent di no pandilu:
"Ce curiose che [o] sês 'Sese." "E cjo, la mê anime, vuê [o] sês cussì misteriôs […]" (Pieri Somede dai Marcs, A la oselade)
-
adi.
che al da une sensazion indefinide di segret, di magjie, di misteri:
un sun di armoniche, malinconic e misteriôs, si spant pal aiar (Arturo Feruglio, Viaç a Vignesie)