Dizionari de Lenghe Furlane

sec  sec  [FO]

1. adi. che nol à plui la sô componente normâl di aghe o di umôrs, che al à pierdût idratazion dal dut o in part:  fra un circul di vecjis çocjis di cjastinâr e je une buse plene di fueis secjis (Pieri Menis, Lis leiendis di Buie); la Vierte e cuvierzeve la jerbe secje cun chê gnove e tenarine e cun violis di bonodôr (Maria Forte, Cjase di Dalban); pi da netâ four ramaçs secs e clusi a na vevin fat ta chel bosc e che ducj a lu vevin tignût come sacrât (Novella Cantarutti, I cjans di not)
   Sin. ardût , arsît , candît , disidratât , flapît , incandît , scridel , scridelît , sidiât , sut
   
   1. di robe di mangjâ, che par procès di conservazion o pal passâ dal timp al à pierdût umiditât:  "Âstu metût i fîcs secs, la ue passe, pignûi e fenoli?" (Luciano Rocco, La foghere); meti il pan sec in muel tal lat, une ore (Sandri Carrozzo, Cogorda e pan bagnat); ni mangjâ, ni bevi: cuatri cjastinis secjis e vie indenant (Alan Brusini, I ribei)
   2. di materiâl che in origjin al jere licuit o viscôs, che al à pierdût umiditât e al è deventât dûr:  no stâ tocjâ che la vernîs no je secje
      Sin. sut
2. adi. che nol à aghe:  al rivà l'an dal sut, che in dute la stagjon nol veve plot mai, e il riul al jere sec (Riedo Pup, Vergjilio)
   Sin. arsît , sut , secjât , suiât , candît , incandît
3. adi. dal timp, dal clime e v.i., cun pocje umiditât e ploiis:  su lis Alps e su la Italie al predomine l'anticiclon e al rive aiar frêt e sec de Russie (Stefano Micheletti, Marcellino Salvador, Notis di meteorologjie pal Friûl - Vignesie Julie); une altre volte Invier, sec, cence nêf, nome polvar tai cjamps e pocje zulugne (Alan Brusini, Par stradis lungjis)
   Sin. arit , ars , sut
4. adi., s.m. une vore magri:  Checut al è un biel frut: Al è biont e sec e al cjamine spedît cun sô mari, dongje de Tor, a lidrichessis (Checo Tam, Beromünster e Monteceneri); il baston gropolôs i tremave tes mans secjis, cu lis venis de «alterie» scuris e infûr, come une tele di ragn su la piel (Maria Forte, La aghe dal Ariul)
   Sin. fin¹ , incandît , lizêr , los , scarm , scarmulin , scjarnît , sclagn , sclendar , sec in cjandele , sfilât , smilç , sut , sutîl
   
   1. che al à pierdût la frescjece e la plenece de zoventût:  la vita suta, la musa secja, i cjaviei grîs, petenâts lis (Novella Cantarutti, Li clâfs)
5. adi. (fig.) dit o scrit in pocjis peraulis, ancje masse diretis:  il maressial, imbotonât tal so impermeabil vert a dopli pet, al da ordins secs e precîs (Alan Brusini, Par stradis lungjis); i vevi berlât un "No! " cussì sec, che lui si jere spaurît (Gianni Gregoricchio, Trê feminis)
   Sin. curt , sut , rampit , svelt
   
   1. adi., av. cun vôs e espression svelte e pôc cjalde, ancje cun mancjance di creance:  "O larai vie ancje jo, come la famee chi sot," al dîs lui sec (Maurizio Mattiuzza, La maiute di Zidane)
   2. ancje di espression no verbâl, essenziâl, cence bilisiis o ancje cence tenarece:  un realisim sec, e a voltis schematic des musis che a sugjerissin efiets cuasi caricaturâi (Bepi Agostinis, Storie de art in Friûl)
6. adi. (fig.) che al sucêt svelt, a colp:  no je drete nancje chê [strade] de costruzion de Europe unide, tra acelerazions, frenadis secjis e fasis di disorientament (Marc Stolf, Minorancis linguistichis); lis cjampanis a lassavin colâ ancjemò i lôr colps secs come clapadadis (Pieri Menis, Sflameadis); al cirì un moment tra lis cjartis, cu la muse tirade e i motos secs e gnarvôs (Carlo Sgorlon, Prime di sere)
   Sin. svelt , sut , imburît
7. adi. di spice, cjanton o sim., no taront e no larc:  in font dal retilini un svolt sec al mene a man çampe (Pauli Jacuz, L'apontament)
8. adi. di vin o licôr, che al à pôc zucar, contrari di dolç:  meti adun il rîs e messedâ e fogolâ, par che si insavorissi par ben; po dopo zontâ mieze tace di vin blanc sec e lassâ svaporâ (Giorgio Pascoli, Il Litum: jerbis salvadiis te cusine); bon il vin, sec, di bevidôr; e buine la sgnape che la fantate no finive mai di metimi tal bussul (Alan Brusini, Gian Paolo Linda, I forescj)
9. adi. [TS] zûcs intal lot, di zuiade, fate dome intune ruede, cence vê inte cartele altris cumbinazions di numars:  numars di zuiâ al lot par cjapâ il terno sec (Josef Marchet, Lis predicjis dal muini)
10. adi. (pop., zerg.) muart:  podessio restâ sec culì che o soi - che Diu mal perdoni - se jo o ai mai sintût un discors di chê fate (Josef Marchet, Lis predicjis dal muini); Eliseo al traè. Il jeur al marcolà dôs voltis e al colà jù sec (Carlo Sgorlon, Prime di sere)
    Sin. dûr
11. s.m. mancjance di umiditât e di precipitazions:  plui di una volta la tampiesta e al sec e la 'silugna tai cjamps e li malatiis e li disgrassiis in cjasa e ta stalis a distrusevin al so lavôr (Ugo Pellis, Catinuta); chest an al è il sec e tai cjamps nol ven nuie (Andreina Nicoloso Ciceri, Il re e la fantate furbe - Racconti popolari friulani I)
    Sin. secjarie , sute , sut
    
    1. lûc cun pocje aghe:  i foncs no vegnin sù tal sec
12. s.m. materiâl cence umiditât, spec. len muart:  tal bosc bandît no si pues taiâ, ma si pues cjapâ sù il sec
    
    1. frazions dai refudums che nol ven diferenziât te racuelte:  i plats rots si butin tal sec

Polirematichis e espressions idiomatichis

• a sec loc.av., loc.adi.inv.
• mûr a sec loc.s.m.

Proverbis:

• cuant che al plûf il prin martars di lune, no si à sec plui par chê lune
• gjave e no met, la fontane a va a sec
• un len sec al cjape plui prest che no un vert
• un len sec al cjape prime che no un vert
• vuê al è Sant Benedet se nol pie di vert al pie di sec