lizêr
li|zêr
[FO]
-
adi.
che al pese pôc:
Taresie e durà pôc, tal jet, ma, in chel pôc, e finì di pierdi dut il so pês. Cussì lizere che e pareve fate di medole di saût (Maria Forte, La tiere di Lansing);
al provà la biciclete. No che e fos masse lizere, ma in sumis e lave vonde ben, par chei cuatri che e costave (Carlo Sgorlon, Prime di sere)
Var. lezêr
, lizîr
, liziar
-
che al fâs pocje pression, pocje fuarce:
une lizere pression sul scatarel e veve fat partî il colp (Cristina Noacco, Faliscjis);
si sveà come se une man lizere i ves cjareçât il cerneli (Pieri Menis, Nadâl ancje par Gjelmin)
-
adi.
ancje in funz. di av., pôc cjariât, che al puarte intorsi pôc pês:
viazâ lizêr
-
adi.
di tiessût, vistît e v.i., sutîl, fin, che nol ten cjalt:
la none e veve intor il solit cotulon e une cjamese lizere, cu lis maniis, a zîr di cuel (Gianni Gregoricchio, Trê feminis);
chel sial di sede lizere butât su lis sôs spalis (Gianluca Franco, Il solt di Arlunc)
Sin. fresc1
-
ancje di cdn., che al à sù robe che no ten cjalt:
e vignive ca pal troi, a planc, dispetolade e lizere (Dino Virgili, La massarie)
-
adi.
svelt e elastic tai moviments:
[la morose] i vignive incuintri cuntun pas lizêr che al someave che e cjaminàs su la aghe (Alan Brusini, Come tai romançs);
lizêr tant che un gjat, si rimpinà sul figâr (Roberto Ongaro, Il muc)
Sin. elastic
, spedît
-
adi.
di pocje intensitât:
si tacà a sintî un lizêr businôr tant che chel di un avon che, a man a man, al deventave simpri plui fuart (Roberto Ongaro, Il muc);
vâs di canelons florîts o di sclopons che a mandin un odorìn lizêr dut dulintor (Pieri Somede dai Marcs, Corpus Domini);
un ros lizêr i impià la muse (Maria Forte, La tiere di Lansing);
il pêl da la aghe, ingrispât di un baviç lizêr di buere (Gianluca Franco, Cuant che l'Istât al finìs - Ogni etât la sô maravee)
Sin. delicât
-
cun pocje concentrazion di une sostance, tant che alcul, cafeine, nicotine e v.i.:
cumò al vûl un plui lizêr […], un vin amabil, no mo? (Pieri Piçul, Vieri e gnûf);
che al provi… a son lizêrs. Jo no fumi mai robe fuarte (Pieri Piçul, Vieri e gnûf)
-
adi.
ancje in funz. di av., di mangjâ, che nol sta sul stomi, facil di digjerî:
une version plui lizere [de mignestre galiziane], e je chê di vilie, cence i vues e cence il strut e invezit cul vueli (Sandri Carrozzo, Caldo galego - Mignestre galiziane);
i tocjave mangjâ pôc e lizêr (Agnul di Spere, Un sorbet di limon)
Sin. digjeribil
-
adi.
di sium, che si interomp cun facilitât:
e durmive di un sium lizêr dongje di me (Carlo Sgorlon, Il dolfin)
-
adi.
(fig.)
che nol strache, che nol domande un impegn fisic o mentâl:
si jere adatât parfin a lavorâ cul pat che si fos tratât di une vore lizere e di pocje durade (Alan Brusini, Cercandui)
Sin. facil
-
che nol domande impegn economic:
rivâ a meti adun la produzion di une serie TV cuntune dotazion une vore lizere, sedi di bêçs che di imprescj (Fabian Ros, Interviste cun Giorgio Cantoni)
-
adi.
(fig.)
che al trate argoments pôc fonts o che al à nome il fin di straviâ:
o vin discorût ancjemò un pieçut. Domandis su la sô vite in Canada; rispuestis lizeris (Gianni Gregoricchio, Trê feminis);
lis fantacinis de sô etât, a fevelavin, cui lôr morôs o fra di lôr, di robis lizeris, vueidis di valôr (Roberto Ongaro, Cretevierte);
la musiche dal presint, no chê culte, ma chê "lizere" (Erika Adami, "Amôrs" in musiche)
Sin. di evasion
, disimpegnât
, divertent
, lizerin
-
adi.
(fig.)
di cdn., che al fâs cun pocje serietât e riflession:
un ciriviel lizeir come i uciei a vevin chê femini e li mans sbusadi (Novella Cantarutti, I voi di Miriscja)
Sin. superficiâl
-
di persone incostante e superficiâl tes relazions sentimentâls, o libertin:
chê mascare di femine lizere e bramade di tancj (Alan Brusini, Gian Paolo Linda, I forescj)
Sin. legri
, superficiâl
, svoladi
, svolarin
-
adi.
(fig.)
no cjamât di pinsîrs, di preocupazions:
intor, la lûs e rideve e lui si sintive lizêr come mai prime (Maria Forte, La tiere di Lansing)
Sin. libar
-
adi., s.m.
[TS]
sport
che, cui che al è intune cierte categorie di avonde pôc pês, che e pues cambiâ daûr dal ses e de singule dissipline, spec. tai sports di contat:
tal pugjilât dai diletants i lizêrs a rivin fin a 60 kg
Polirematichis e espressions idiomatichis
Proverbis:
- nûl lizêr la sere, bon timp si spere