Dizionari de Lenghe Furlane

svolarin  /-ìn/  svo|la|rin  [CO]

1. adi. (ancje fig.) che al svole, soredut che al svole ben, cun facilitât, cun vivôr:  il vintulin lizêr e svolarin, che al svintulava dal bosc, al puartava ator via l'umidum e il parfum fuart dai cjamps (Ermidio Picco, La albe di Primevere)
2. adi. fin, lizêr, pôc penç:  «No va ben [la letare, no ise autentiche]? […] Cjalait la date, no?» «O ai viodût la date. Par chel la cjarte mi somee un pôc svolarine…» (Franco Marchetta, Il numar 1089)
   Sin. svintulin
3. adi. pôc consistent, pôc sigûr:  cori daûr a sperancis simpri plui svolarinis, siums impussibii (Graziano Urli, Vecje Cjargne)
   Sin. svoladi
4. adi. incostant, pôc stabil, che al mude o che si lasse mudâ cun facilitât:  un altri anel de cjadene lungje lungje de storie dal mont e di chê curte e svolarine di ognun di nô (Antoni Beline, L'an dal messâl)
   Sin. svolet² , svoletôs
   
   1. disponibil aes aventuris amorosis lizeris:  chê morate svolarine, / cjalde di sanc e plene di vivôr (Zuan Lurinçon, Ti spieti)