Dizionari de Lenghe Furlane

secont  /-ò-/  se|cont  [FO]

1. adi.num., pron.num. che intune serie al ven dopo dal prin, che al corispuint al doi:  o scuen confessâ che e je la seconde volte che mi tocje di pintîmi (Riedo Pup, Rispueste: cjalâ e tasê); i malans a scomençarin cun Berengari, secont fi di chest Everart, che al deventà duche o margrâf dal Friûl dal 875 (Josef Marchet, Cuintristorie dal Friûl fin sot la Italie); al veve cjapât sù un claput, lu veve butât intai scûrs e al veve spietât. Po a 'nd veve butât un secont, po un altri, po un altri (Meni Ucel, La ombrene)
   Var. segont , seont , seiont
2. adi.num. che al rapresente il periodi madûr o finâl di une dade di timp plui lungje:  pitôrs furlans dal secont ’500 (Bepi Agostinis, Storie de art in Friûl)
3. adi.num. altri rispiet a ce che al è calcolât principâl, gnûf a pet di un prin:  a Vignesie i canâi a rapresentin une seconde cualitât di stradis (Arturo Feruglio, Viaç a Vignesie); in Cjargne - al diseve pre Antoni - o ai vude come une seconde nassite culturâl e spirtuâl, parcè che o ai tacât a volêi ben e a spindi la mê vite pal popul (Redazion La Patrie dal Friûl, Pre Antoni al è tornât in Cjargne)
   Sin. altri , gnûf
4. adi.num. mancul impuartant, secondari:  vendite di pomis e verduris a presit ridusût tant che prodots di seconde sielte (Barbara Cinausero, Simpri plui atenzion al consum "inteligjent" )
   Sin. secondari
5. s.m. unitât di timp che e vâl tant che la sessantesime part dal minût prin:  messaçs publicitaris che a durin dai trente seconts al minût (Max Mauro, Un Friûl difarent: i 90 mhz di Onde Furlane); il tren di Laurinç al jere partît miezore prin di chel di Barbure. L'inviament des ruedis, je li sul liston; cuatri seconts, e po un pilastri le veve platade pai voi di lui (Agnul di Spere, In viaç di domenie)
   Sin. minût secont , secont di minût
6. s.m. (fig., iperb.) timp une vore curt:  i pensà sore un secont, e al considerà di colp la mê situazion e chê di mê mari (Carlo Sgorlon, Il dolfin); "Ou, Pidins, ven achì un secont! […]" (Stiefin Morat, Donald dal Tiliment)
   Sin. atim , baticei , bativoli , bot , credo , flât , istant , lamp¹ , lampin , marilamp , marimoment , minût , moment , secont di minût
7. s.m. [TS] gjeom. unitât di misure dai angui che e vâl tant che la trê mil e sîscentesime part di un grât
8. adi.num., s.m. puartade principâl dal gustâ o de cene, pal solit di pes o di cjar, che tal ordin tradizionâl e ven dopo di une paste, rîs o mignestre:  se nol è un secont di cjar si pues "rinfuarçâle" [la salate di cjastinis] cun fetutis di formadi (Margherita Timeus, Cjastinis); in cusine a àn preparât jentradis, prins e seconts di pes di fâ vignî la aghegole (Daria Miani, Maman! 28-12-2018)
9. s.m. copari intun duel o persone de scuadre di un atlete impegnât intun incuintri, spec. di pugjilât
10. s.m. [TS] mus. cui che tal cjant a plui vôs al compagne il prin:  al tornà a cjapâ la sô cjantose, e chei altris daûr, ce di secont e ce di bas (Dino Virgili, La aghe da pît la cleve)
    Cfr. prin , bas
11. adi. [LE] che al jude, che al favorìs:  cussì tu âs avût il cîl seont (Ermes di Colorêt, I, 140)
    Sin. propizi , favorevul
12. av. tant che reson seconde, daspò, in ordin di elencazion e di impuartance:  «Felici ma Furlans» nol è dome un biel prodot pe television, ma tant altri. Prin, la cualitât e je alte […]. Secont, e je une idee fie dai zovins […] (Natascia Gargano, «Felici ma Furlans», une sfide al marcjât televisîf)
    Sin. daspò , dopo , po , po daspò , po dopo , secondariementri
13. prep. par segnâ une consecuence, une dipendence, une derivazion, un criteri e v.i.:  dute la planure sot i voi e nîts di cjasutis e, in bande, un slac clâr o scûr secont la ore (Dino Virgili, La aghe da pît la cleve); simpri però, dut legâl. Secont leç (Riedo Pup, I furlans e i confins)
    Sin. secontri , daûr , daûr di , seontri
    
    1. av. (coloc.) in espressions elitichis, spec. par rispuindi a di une domande e pandi une esitazion o une varietât di pussibilitâts:  ma i contadins ce disino? Secont. Se a son zovins a disin une robe; se a son anzians a disin une altre (Riedo Pup, Ocjo di no pintîsi)
14. prep. daûr de opinion di:  a nal voleva savêntin di cjacari parcè che la zent - secont lui - a spaçava, pa la pi part, mieza la vita a discori di robi che a na contavin nua (Novella Cantarutti, Barba Fodo e la muart)
    Sin. daûr , daûr di , par , secontri , seontri

Polirematichis e espressions idiomatichis

• a seconde che loc.coniun.
• a seconde di loc.prep.
• dâ di secont loc.v.
• secont che loc.coniun.

Proverbis:

• i bêçs a son il secont sanc dal om
• i vedui il prin dì a vain, il secont se passin, il tierç se ridin
• il fûc al è une seconde compagnie
• il prin al busse e imbrace, il secont nice e fasse, il tierç an il malan e la malepasche
• il prin dì di Inseri al è sant Pas, il secont sant Crepìn, il tierç sant Sclop
• la abitudin e je une seconde nature
• la educazion e je une seconde nature
• la prime volte si perdone, la seconde si tontone e la tierce si bastone