Dizionari de Lenghe Furlane

flât  flât  [FO]

1. s.m. aiar che si mande fûr cuant che si respire:  e sosseda, cliputa come al flât dai nemâi, una ariuta (Ugo Pellis, Al mandolâr); [un dragat] cul so flât impestât al intosseave la font a talmentri, che cui cu sedi, nemâl o cristian che al intivàs a bevint, al colave sec incandît cence vite (Josef Cjargnel, Il dragat dal Fontanon); cuant po che al mi ven dongje cun chel flât di bevaçone mi si ribalte il stomi (Pieri Somede dai Marcs, Al fresc)
2. s.m. il respirâ, la respirazion, la fuarce che e da il respirâ:  fintant che o varai flât, nissun mi cjaparà (Gianni Gregoricchio, Trê feminis); i veve dit di sì, ma cuntun cûr sglonf di fermâi il flât, e cun alc di dissipât dentri vie (Maria Forte, Cjase di Dalban); ancje il flât al pareve grivi cun dut chel pulvin jevât (Dino Virgili, La aghe da pît la cleve); Nita e sierà i voi spietant il ton cuntune pôre subitanie e il flât stratignût (Dino Virgili, La aghe da pît la cleve)
   Sin. respîr
   
   1. (fig.) moment che al dure un respîr:  chel pês cussì trement / che mai nol lasse un flât / di soste e di content (Fabio Simonutti Masolini, cit. in Dizionario biografico dei friulani)
3. s.m. aiar che si môf, pal vint o pe fuarce di cdn. o di alc:  nol tirave un flât di buere (Carlo Sgorlon, Il dolfin); sù dai cjamps e des cjarandis al rivave un flât di frescure (Gianni Gregoricchio, Trê feminis); al jere daûr a menâ il sfuei par dâi flât a di un fûc di stancol (Roberto Ongaro, Il muc)
   Sin. buf¹ , bave , bugade¹ , aiar¹ , vint , sofli , soflet , soflade
   
   1. (fig.) il slargjâsi di alc come se al fos aiar:  di Istât cul prin flât di lûs, si sveavin lis vôs dai lens e a sveavin la cjase (Maria Forte, Cjase di Dalban); un flât di albe sui pins e sui peçs dai zardins frescs e polsâts ad ôr de strade (Maria Forte, Sul cjar di Pauli Gurin)
4. s.m. (fig.) vôs:  al spesseà a berlâ cun dut chel pôc di flât che i jere restât (Roberto Ongaro, Il muc); jê, mo, siore parone e à flât di spaçâ (Maria Forte, Cjase di Dalban)
   
   1. capacitât, pussibilitât di fevelâ:  Jo… Beh, jo… - Al fasè une polse, come che al cirìs il flât par podê lâ indenant (Gianni Gregoricchio, Trê feminis)
5. s.m. [TS] mus. ogni strument che al sune par vie che l'aiar mandât dentri cul flât dal sunadôr al vibre intune colone
6. s.m. cuantitât di licuit che si glot intune volte:  eco: jo mi dispoi di ogni fastidi: / o bêf un flât, po un altri par prionte (Pieri Corvat, El cuarantevot); pan vanzât che a crugnavin cuntun flât di aghe cjolte tal cjaldîr cul cop (Alan Brusini, Come tai romançs)
   Sin. glotude , glut , cluc , sluc , got , sclip
   
   1. [BF] (fig.) piçule cuantitât di alc:  lu ten sù chel flât di dignitât sforadie che al à tal so cûr (Maria Forte, Fadie come ale)
7. s.m. [BF] jessude di gas intestinâl:  je solevade, / à fat un flât; / subit la panze / si à disglonfât (Pieri Çorut, La primarole)
   Sin. pêt , pedeade

Polirematichis e espressions idiomatichis

• dâ flât loc.v.
• fâ murî il flât intal cuel loc.v.
• movi flât loc.v.
• restâ cence flât loc.v.
• scludisi di flât loc.v.
• scolâsi di flât loc.v.
• spaçâ il flât loc.v.
• sparagnâ il flât loc.v.
• stâ jù il flât loc.
• straçâ il flât loc.v.
• stratignî il flât loc.v.
• tignî il flât loc.v.
• tirâ flât loc.v.
• tirâ il flât loc.v.
• vê flât loc.v.
• vê flât ta la anime loc.v.
• vê flât tai polmons loc.v.
• vê flât te coradele loc.v.
• vignî il flât loc.

Proverbis:

• al è miôr sparagnâ il flât par cuant che si à di murî
• cui che al mangje ai i puce il flât
• fin che al è flât e je sperance
• flât di cûl al va là che al vûl
• no si à di tirâ flât e gloti che e va pe scjavace