Dizionari de Lenghe Furlane

aiar¹  /à-/  a|iar  [FO]

1. s.m. misture di gas, pe plui part azot e ossigjen, che e forme la atmosfere de Tiere:  la densitât dal aiar, ven a stâi il so pês par metri cubic, […] e je plui alte dongje de superficie e plui basse adalt (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. arie¹ , atmosfere
   
   1. chê misture di gas daûr des sensazions e de percezion che si à cul vê contat cun jê o cul respirâle:  o cjali i trois che di frut mi rimpinavi incorint, o respiri chest aiar bon (Alan Brusini, Gian Paolo Linda, I forescj); si sintive l'aiar cun chel odôr di nêf penze (Maria Forte, La tiere di Lansing)
   2. la atmosfere cemût che e ven viodude e sintude:  viodi ingrumâsi par aiar il burlaç (Ivano Urli, La musiche)
      Sin. arie¹ , atmosfere , cîl
   3. spazi percepît come libar e vueit che al è parsore de superficie de tiere, là che si viôt e si sint:  i grîs a sunavin une naine disperade che e foropave l'aiar avostan (Fabian Ros, La rambe); (lis âfs) a taiavin l'aiar par ducj i viers, cussì imburidis che a parevin saetis (Catarine Percude, Lis âfs)
2. s.m. [TS] meteor. masse atmosferiche caraterizade di une cierte temperadure e pression:  a chestis latitudins si cjatin e si messedin l'aiar frêt polâr, che si môf bande Sud e l'aiar cjalt tropicâl, che al va bande Nord (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. arie¹
3. s.m. moviment dal aiar atmosferic cemût che al ven viodût e sintût, ancje identificât daûr de direzion di dulà che al ven:  i lamps a sclapavin fûr par fûr il cîl plen di nûi, che a corevin a balons bas e neris, puartâts vie dal aiar (Pieri Menis, Il burlaç); l'aiar di tramontane al veve alçât sbufs di polvar te strade (Pieri Menis, Il miracul dal plevan di Trep)
   Sin. arie¹ , vint , tramontan ipon. , buere ipon. , buerin ipon. , rosean ipon. , levantin ipon. , sclâf² ipon. , sclavon ipon. , siroc ipon. , sirocâl ipon. , garbin ipon. , zefir ipon. , maistrâl ipon. , provence ipon. , provençâl ipon. , brise ipon. , ventisel ipon. , aiarin ipon. , aiarut ipon. , aiaron ipon. , aiarat ipon. , bave ipon. , codebave ipon. , codebuie ipon. , stravinte ipon.
4. s.m. flus di aiar:  o ai viert il barcon par che al jentri un freghenin di aiar (Costantino Smaniotto, Co l'amôr al cimie); cuant che un camarin nol conservave ben il salam lu clamavin lui a sistemâ i barconuts a tramontan e a buere e a regolâ i aiars (Riedo Pup, I furlans e il mestri)
   Sin. arie¹ , corint²
5. s.m. complès di cundizions climatichis tipichis di un lûc:  al veve mâl di cuel e fieradis, nus àn dit di puartâlu a Grau, l'aiar di mâr i fâs sigûr ben (Mario Beltramini, Jo e Graziella)
   Sin. arie¹ , atmosfere , clime
   
   1. complès di cundizions che a vegnin prime o che a fasin previodi un fenomen atmosferic:  il cîl al è come il plomp cheste gnot, / il gjal jeve la creste, / al è aiar di tampieste usgnot (Pantan, Aiar di burlaç); aiar di nêf (Giovanni Battista De Gasperi, Termini geografici dialettali della parlata friulana); aiar di ploie / e nûi moi, come bombâs (Maurizio Mattiuzza, Aiar)
      Sin. arie¹ , cîl , timp
6. s.m. (fig.) atmosfere psicologjiche o morâl di un complès di personis, di un ambient, di une situazion:  a son tancj in chest mont che a àn cjasis di lusso ma a son cence aiar di cjase (Francesc Placerean, Si savarìn a dî fra dîs agns!); tu disis di vê scugnût lâ vie dal paîs parcè che li tu ti sês simpri sintût a scjafoiâ e che tu vevis cirût aiar gnûf (Enrico Martina, Ricuarts e inlusions); la cjase, in sumis, e je dute in maneç e un aiar di fieste al pâr che al svintuli par ogni lûc (Pieri Somede dai Marcs, Fieste in famee)
   Sin. arie¹ , clime
   
   1. complès di cundizions che a fasin previodi alc:  "Ti dirai che ancje a mi il slangôr mi intorcole i budiei." Si jere lamentât, vignint indevant. "Ma ca nol tire aiar di mangjâ" (Gianni Gregoricchio, Îr e doman); al sofle par dute Europe l’aiar di indipendence pes nazions cence stât. Massime te Catalogne, tal Pais basc, in Scozie (Dree Valcic, Se fevelâ di indipendence al vûl dî dome stâ a cjalâ)
      Sin. arie¹
7. s.m. (fig.) maniere di fâ, di vistîsi, di stâ che e dâ une cierte impression:  al à muse patide, cui ocjâi che i dan aiar di studiôs (Checo Tam, La maree nere); al è vignût ae sentade cul aiar di cui che si complâs di vê vût reson (Adrian Cescje, Memoriis di politiche linguistiche)
   Sin. arie¹ , aspiet¹ , ande
8. s.m. soredut tal pl., ande di braùre e di superioritât:  il gno paîs al è un paîs tra i mancul impuartants, tra i mancul che si dan aiars, tra i plui minûts dal Friûl (Meni Ucel, La "Fieste dai Roncs"); ju âstu sintûts chê altre sere in file là di Zuan Temul, e ce aiars che àn, ma nancje nô, no si tignìn indaûr e savìn sunâlis (Pieri Somede dai Marcs, A la oselade)
   Sin. mierde , pofardie , presunzion , scaghe , suficience , svant , svantarie , vant , arie¹
9. s.m. [CO, TS] mus. composizion o toc di composizion melodiche:  cumò i ven in bocje un aiar di cjançon viere (Dino Virgili, Sabide di fruts)
   Sin. arie¹ , motîf
10. s.m. autom. intai veicui a motôr, dispositîf che al covente par inricjî la missele:  il pomul par tirâ l'aiar al jere dut fûr (Pieri Somede dai Marcs, Il Strolic furlan pal 1957)
    Sin. starter , arie¹
11. s.m. (eufem.) pedeade, pêt
    Sin. arie¹ , pedeade , pêt

Polirematichis e espressions idiomatichis

• butâ cui pîts par aiar loc.v.
• butâ par aiar loc.v.
• cambiâ aiar loc.v.
• cambiâ l'aiar loc.v.
• cui pîts par aiar loc.av., loc.adi.inv.
• cuintri aiar loc.av.
• cul cûl par aiar loc.av., loc.adi.inv.
• dâsi aiar loc.v.
• dâsi aiars loc.v.
• lâ cui pîts par aiar loc.v.
• lâ par aiar loc.v.
• pal aiar loc.av., loc.adi.inv.
• par aiar loc.av., loc.adi.inv.
• saltâ par aiar loc.v.
• tirâ l'aiar loc., loc.v.

Proverbis:

• aiar di fressure al puarte in sepulture
• i peçots a van par aiar
• se si semene aiar, si racuei tampieste
• soreli di veri e aiar di fressure a menin l'om in sepulture
• uciel pal aiar al cjante di ligrie, uciel in scjaipule al cjante di passion