Dizionari de Lenghe Furlane

timp  timp  [FO]

1. s.m. dimension li che si sucedin i events, articolade in passât, presint e futûr, percepide in maniere istintive e misurade daûr di fenomens naturâi regolârs o cun sistemis convenzionâi:  ricostruint la storie passade dal univiers, lant indaûr tal timp o vin un univiers simpri plui piçul fin a ridusisi a un pont (Sergio Cecotti, Teologjie algjebriche); no cate lis grandis scuviertis de fisiche moderne, il concet di timp al reste pe plui part discognossût (Franc Fari, Neurosiencis dal dolôr)
2. s.m. durade di une azion, di un procès e v.i., misurade par convenzion in seconts, minûts, oris, dîs, mês, agns e v.i.:  al pâr di viodilu, […] cul orloi simpri in man par controlâ i timps de gare (Valentina Pagani, Edi Orioli: la braùre di rapresentâ il Friûl)
   Sin. dade , durade
   
   1. cuantitât di timp, distance, ancje indefinide o aprossimative, jenfri doi tiermins cronologjics:  la sô vite, blocade e vueide par tant timp, dome li e podeve tornâ a vê un fregul di significât (Carlo Sgorlon, Prime di sere)
   2. cuantitât di minûts, oris, dîs e v.i., disponibile par fâ une cierte azion:  a son nome trê e mieze, o vin avonde timp par lâ in stazion prime che al partissi il tren par Cividât (Carlo Tolazzi, La salamandrie tal fûc); "Vuê no ai timp, tornait doman" (Pieri Somede dai Marcs, Un pugn di moscjis)
3. s.m. ancje pl., tiermin destinât par fâ alc:  cumò al tacave a fâ i plans, a calcolâ i timps, i riscjos (Roberto Ongaro, Il muc); un ordin di prioritâts, che a son determinadis de bisugne di superâ il status di crisi atuâl de lenghe furlane intal timp plui curt (Adrian Cescje, Memoriis di politiche linguistiche)
   Sin. scjadince , tiermin
4. s.m. ancje tal pl., stagjon o periodi individuât di ciertis carateristichis:  al torne il timp dai lavôrs tai vignâi (Alan Brusini, Par stradis lungjis); al è timp di aventari, chel ca, che fra un mês e mieç a tachin i scrutinis (Gianni Gregoricchio, Trê feminis); si jere in timp di vuere, si sa, se i zove a cualchidun, pai puars e je une disgracie orende (Antoni Beline, Pre Pitin); al jere il timp che lis fantatis a ziravin cui bregons strents a lis cjavilis e la permanente tai cjavei, e i fans dai "Duran Duran" a someavin vignûts fûr dal "videoclip" di "Wild Boys" (Checo Tam, Cocteau Twins su Netun (ma no il planet))
   Sin. dade , ete , periodi , moment , ore
   
   1. moment just par alc, dedicât a alc o caraterizât di alc:  Eme e disè che la cene e jere pronte, che al jere timp di sentâsi intor de taule ancje par nô (Carlo Sgorlon, Il dolfin)
   2. ancje tal pl., ete storiche:  no son lâts cuintri lis leçs, ma a àn dome vantât un lôr dirit, che ur spiete ancjemò dai timps dai patriarcjis di Aquilee (Alviero Negro, Int di masnade); la steme di famee fate sculpî di so bisnono, uficiâl dal regno di Italie ai timps di Napoleon (Pieri Menis, Il tesaur di done Cheche)
      Sin. epoche , ere¹ , ete , etât , volte , agns
5. s.m. etât di cdn. o di alc:  cetant timp aial chel frutin? (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. etât
   Cfr. an
   
   1. cuantitât di timp di gravidance:  "In trop timp sêstu?" i domandà cun vôs ingropade. "Un mês…? Doi…?" (Gianni Gregoricchio, Trê feminis)
6. s.m. fase di une operazion, di une ativitât, di un lavôr e v.i.:  il program di ricercje si è davuelt in doi timps (Alessandra Burelli, Educazion plurilengâl tes scuelis furlanis)
   Sin. bocon , bot , butade , dade , flât , moment , part¹ , toc¹ , trate
   
   1. [TS] mec. fase di un moviment di un mecanisim, spec. di un motôr:  une Guzzi Falcone dal '54: 500 cc, motôr a cuatri timps monocilindric (Antescûr, Il svol dal Falcone)
7. s.m. part di un film, di un spetacul, di un event sportîf e v.i.:  al jere il minût cuarantesim cuart dal prin timp (Agnul di Spere, Usgnot partide di balon); l’Udin al partìs cul pît just ancje tal imprin dal secont timp. (Marc Stolf, Udinese - Lazio 0-1)
   Sin. dade , part¹ , frazion
8. s.m. [TS] gram., ling. categorie de coniugazion verbâl:  imparâ in maniere automatiche il plurâl, il singolâr o a meti i verps tal timp just (Franc Fari, Il cjâf dai furlans)
9. s.m. [TS] mus. velocitât di esecuzion di un toc musicâl o ben ritmi:  Ragnhild, a lis tastieris, e cree une biele atmosfere mintri Monica e bat il timp come un autentic metronom (Checo Tam, La maree nere)
   
   1. indicazion ritmiche de misure di ogni batude
10. s.m. complès des cundizions meteorologjichis:  chel maledet di un timp nol vûl metisi a bon e intant ducj i lavôrs si ingrumin (Pieri Somede dai Marcs, Resurezion a Pontinie); al jere vignût frescot, umit, al jere un timp di fumate (Checo Tam, I nemîs); l'aiar al menave par insù, che il timp si rompeve (Maria Forte, La tiere di Lansing)
    
    1. in ciertis espressions, brut timp, temporâl:  juste in chel, di tal curtîl, si à sintût la vôs de femine clamâlu. «Ustin, al ven sù il timp» disè 'Sese (Ivano Urli, La musiche); al fâs timp (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
       Sin. brut timp , trist timp , temporâl² , burlaç , stratimp , timpat

Polirematichis e espressions idiomatichis

• a timp loc.av., loc.adi.inv.
• a timp di musiche loc.av.
• a timp e lûc loc.av.
• a timp indeterminât loc.av., loc.adi.inv.
• a timp pierdût loc.av.
• brut timp loc.s.m.
• dâ timp al timp loc.v.
• dâsi il bon timp loc.v.
• fâ a timp loc.v.
• fâ il bon timp e la ploie loc.v.
• fâ in timp loc.v.
• lassâ timp al timp loc.v.
• o timp o tart loc.av.
• pierdi timp loc.v.
• pierdi timp in cjacaris loc.v.
• timp o tart loc.av.
• trist timp loc.s.m.
• vê timp di pierdi loc.v.

Proverbis:

• a cui che al vûl, no i mancje il timp
• a fâi la barbe al mus, si piert timp e fadie
• a paiâ e a murî, al è simpri timp
• al è passât il timp che a colave la mane
• al è passât il timp di lâ a moris
• al è plui timp che no vite
• al timp e al cûr nissun no i comande
• al timp, al cûr e al cûl nissun no i comande
• altris timps, altris usancis
• biel il timp; e je la int che e je carogne
• bisugne dâi timp al timp
• bisugne fâ la barbe prin par se e po, se al vanze timp, ancje a chei altris
• ce che al ven cence fadie, in pôc timp ancje al va vie
• copâ int, palâ nêf, sbroiâ morârs e spacâ coculis, al è dut timp pierdût
• cuant che al è timp di fâ, fâs cence stâ a spietâ
• cuant che il timp al à bruntulât, si sfoghe
• cuant che si ingrumin lis feminis, si mude il timp
• cui che al à timp che nol spieti timp
• cui che nol sa sbassâsi a timp e lûc le finìs cul cjâf sbûs
• cui che si cjale se stes no i vanze timp di cjalâ chei altris
• cul timp al mûr il mus cun dut il peçotâr
• cul timp dut si po superâ
• cul timp e cul lavôr il morâr al devente sede
• cul timp e la fadie si madressin i gnespui
• cul timp e la fadie si madurìs la int
• cul timp e la paie si madressin i gnespui
• cul timp si fâs dut: ancje il mont al è fat un pôc par volte
• cul timp si madurìs la int
• dal bon timp e de buine int no si stufisi mai
• dal bon timp no si stufisi mai
• daspò dal bon timp e torne la ploie
• daspò dal trist timp al ven il soreli
• daspò de ploie al torne il bontimp
• daspò tancj agns e tant timp la aghe a torne al so mulin
• dut a timp e lûc
• fumate basse, bon timp e lasse
• fumate basse, bon timp e lasse; fumate alte, al plûf cuant che i salte
• fumate e lasse il timp che e cjate
• fumate la sere, bontimp si spere; fumate la doman, la sere al è pantan
• garbin al lasse il timp che al cjate
• gjoldi simpri fin che si po, no i mancje mai timp al patî
• i avocats a vendemin di ogni timp
• i scherçs a vuelin fats a timp e lûc
• il cjaval nol piert timp co al mangje la vene
• il Signôr nol paie ogni sabide, al va ben planc ben planc, e vie pal timp al va tacant
• il timp al consume dut
• il timp al è galantom
• il timp al è preziôs
• il timp al è un bon testemoni
• il timp al è un grant rimiedi
• il timp al juste dut
• il timp al madurìs i rôi
• il timp al mene judizi
• il timp al passe e la muart e ven
• il timp al passe e no si po fermâlu
• il timp al sane ogni plaie
• il timp al scuvierç grant cjossis
• il timp al spieghe dut
• il timp al svole
• il timp al ven par chel che al sa spietâ
• il timp che al cor a Sant Suan al cor dut l'an
• il timp che si fâs di gnot nol dure trop, chel che si fâs a misdì al dure dut il dì
• il timp che si piert no si lu cuiste mai
• il timp e la muart a rompin i dissens
• il timp fat di gnot al dure tant che l'amôr dai viei
• il timp fat di misdì al dure dut il dì; il timp fat di gnot al dure tant che un cjaval di trot
• il timp nol puarte spade
• il timp pierdût no si lu cjate plui
• impare la art e metile de bande, il timp al vignarà che la art e valarà
• in timp di vuere di cent une di vere
• in timp di vuere nissune di vere
• in timp di vuere ogni arme e scuse
• la stagjon e va ben avonde fin che il timp le seconde
• la vore fate ben nissun domande cetant timp che si à stât a fâle
• lavôr mâl fat al è timp pierdût
• lis cuatri temporis a mudin il timp
• lis robis grandis a fâlis ben trop timp al conven
• mats, feminis, paron, timp e cûl fâs ce che al vûl
• ni dal bon timp ni de buine int no si stufisi
• no je mai stade ploie che il bontimp nol sei tornât
• nol è miluç tant dûr che cul timp nol deventi madûr
• nol è plui il timp che Berte a filave
• nûl lizêr la sere, bon timp si spere
• o timp o tart si pailis dutis
• ogni cjosse a timp e lûc
• ogni mincjon al sa lâ pal biel timp
• ogni puar om, al sa lâ pal timp bon
• ogni robe e à il so timp
• par fâ une fote al è simpri timp
• ploie che e sune a mene bon timp
• ros la sere, bon timp si spere; ros la matine, la ploie e je vicine
• se a Sant Bartolomiu al è bon timp, al è bon timp dute la vendeme
• se al è bon timp a Sant Zorzon, siet bogns timps e un bon timpon
• se al è bon timp il dì di Sant Zorzon, la vendeme a va benon
• se al è bon timp il prin martars di lune, al è bon timp dute la lune
• se il gjal al cjante daspò di misdì, il bontimp al è par finî
• se il timp al è seren, ancje cu la borse flape si sta ben
• se tu ti cjalis te, no ti vanze timp di cjalâmi me
• timp fat di gnot, se al dure une ore al dure trop