Dizionari de Lenghe Furlane

ore  /ò-/  o|re  [FO]

1. s.f. unitât di timp che e corispuint a une des vincjecuatri frazions compagnis de dì solâr, formade di sessante minûts prins:  a volevin dôs buinis oris di timp, gjambis sanis e flât, par rivâ là sù, ta chel paîs da pît de Mont Grande (Roberto Ongaro, Cretevierte); la comedie e durave une ore e cuarante, ma jo e Bartolini o sin lâts vie dopo 30 minûts (Pierluigi Visintin, Friûl e furlans te Histoire de ma vie di Giacomo Casanova)
   
   1. ognidun dai vincjecuatri moments de zornade li che e tache une di chês vincjecuatri frazions di timp:  une cjampane lontan e sunà la ore di gnot. Anute si alçà par piâ la lûs (Pieri Menis, Sul agâr); la sere prin, sotsore par vie dal viaç, si jerin indurmidîts a dîs oris (Gianni Gregoricchio, Îr e doman)
   2. timp che al passe:  lis oris i puartarin un spi di clâr e la nêf e cjapà alc come di lune (Maria Forte, L'avôt)
2. s.f. dade di timp, ancje no precise di sessante minûts:  a passavin oris bielis a zuiâ, a pensâ, a discori (Riedo Pup, I furlans e la ostarie)
   
   1. timp di une lezion, che al pues jessi ancje di un timp un pôc plui curt o plui lunc di sessante minûts:  intune classe cuinte o fasei une ore di lezion […] su la tematiche de "dialetiche tra il sclâf e il paron" de Fenomenologjie dal Spirt di Hegel (Adrian Cescje, Memoriis di politiche linguistiche)
   2. moment de zornade:  o sai che ti plasin lis oris dolcis e celestis dal amont (Dino Virgili, Letare di Avost); la matine si sveisi a cinc oris e si talpine a vore a sîs (Ivano Urli, Storie di Min); Sant Martin al torne a inviâsi, e al capite a Resiute tant che une sclopetade, propri su la ore di gustâ (Luigi Gortani, Sant Martin); a ore di cene, Min si jere sentât tal solit taulin (Franca Mainardis, Aiar di cjase)
   3. sun o altri segnâl che al segne une ore juste:  su la tor dal cjistiel di Zeà a batevin lis oris, planchin planchin (Pieri Menis, Cjasute dai ricuarts)
   4. moment just o miôr o obleât par fâ alc, ancje in espressions retorichis:  a di chei che a àn vût il taramot ur dîs une robe: che a no stedin a cuietâsi, che a no stedin a tasê; che a tachin. E je ore di scomençâ! (Francesc Placerean, La Glesie e à di lassâ i popui come che a son e fâur di levan seont la lôr paste); no ise ore di finîle di proclamâsi bessôi puartevôs di dut un popul, cuant che si fevele nome daûr des propris personalissimis opinions o interès? (Josef Marchet, Cuarde e savon)
3. coniun. par introdusi un discors gnûf, o par leâlu tant che consecuence a ce che si à za dite o ancje dome cun valôr enfatic:  ore, al viveve in chei agns a Biliris Mondo Picando, un bon om, dut di cjase e di glesie (Meni Ucel, Mondo birbo); ore, cuantizâ la gravitazion al vûl dî cuantizâ la gjeometrie dal spazi e dal timp (Sergio Cecotti, Teologjie algjebriche)
4. av. viôt ore presint

Polirematichis e espressions idiomatichis

• a ore di fen loc.av.
• a oris brusadis loc.av.
• a oris pierdudis loc.av.
• a oris straoris loc.av.
• biade la ore loc.inter.
• cuart di ore loc.s.m.
• denant da la ore loc.av., loc.adi.inv.
• devant da la ore loc.av., loc.adi.inv.
• fidâ la ore loc.v.
• mieze ore loc.s.f.
• mieze orute loc.s.f.
• no fidâ la ore loc.v.
• no tignî la ore loc.v.
• no viodi la ore loc.v.
• ore presint loc.av.
• par ore tant loc.av.
• passâ la ore loc.v.
• su la ore brune loc.av.

Proverbis:

• a Sant Laurinç la cocule e scree il dint: screâ o no screâ, e je ore di sgjaruiâ
• cent oris di malinconie no pain un centesim di debit
• cuant che e je la sô ore, nol vâl nuie dî di no
• cuant che il purcit al è gras, e je ore di copâlu
• daspò muarts no si vîf une ore
• denant da la ore ni che si nas ni che si mûr
• denant da la ore no si po ni nassi ni murî
• e vâl plui une ore di ben che no cent di mâl
• e vâl plui une ore di ligrie che no cent di malinconie
• il piruç co al è madûr e je ore di mangjâlu
• il zurament dal lôf se al dure une ore al dure trop
• la ore di gustâ pai siôrs e je cuant che a àn fam, pai pitocs cuant che a nd' àn
• la ore di gustâ pai siôrs e je cuant che a àn fam, pai puars cuant che a nd' àn
• la ploie di buinore a dure une ore
• lis oris de matine a son la mari dai mistîrs, lis oris da la sere a son la mari dai pinsîrs
• nol conte jevâ adore, baste rivâ su la ore
• pan di une dì, ûf di une ore, lat di un minût e vin dut l'an
• Sant Antoni di Zenâr une ore bielavuâl
• Sant Gregori pape la cisile a passe la aghe, passâ o no passâ e je ore di arâ
• si vîf une volte sole e daspò muarts no si campe une ore
• timp fat di gnot, se al dure une ore al dure trop
• un pecjât fat int une ore, in cent agns no si ripare
• une ore di bon soreli e suie plui di une lissie
• une ore ogni mat al lavore
• vegnie tarde la Pasche o a buinore, di là a durmî daspò gustât e je simpri ore