Dizionari de Lenghe Furlane

toc¹  /-ò-/  toc  [FO]

1. s.m. part plui o mancul piçule di materiâl solit:  su la taule a jerin ancjemò il pan, il salam, un toc di formadi, il fiasc di vin (Cristina Noacco, Faliscjis); a àn traficât dute une zornade a inclaudâ tocs di len (Maria Forte, La tiere di Lansing)
   Sin. bocon , part¹
   Cfr. blec , sclese , tic¹ , porzion , bloc , grop
   
   1. part di alc di rot:  butiliis cence cuel, o cence fonts, miezis tacis e tocs di damigjanis cul veri penç e scûr (Maria Forte, La fortune di Folope); il cuviert si disbletave, al colave a tocs tal fûc disveant sù un nûl di faliscjis e di fum (Dino Virgili, La aghe da pît la cleve)
   2. frazion ancje di alc di imateriâl:  la glesie e restà dividude in doi tocs, cuntun patriarcje a Grau e un a Cormons (Josef Marchet, Cuintristorie dal Friûl fin sot la Italie)
2. s.m. part di une robe, di une estension, di une cuantitât:  [i nestris vecjos] a cognossin la Gjermanie toc par toc (Riedo Pup, La civiltât dal fum); la piergule de ue e jere un ricam in trasparint, che al cuvierzeve di vert un toc dal curtîl (Maria Forte, Cjase di Dalban)
   Sin. pieç , bocon
   
   1. lungjece o estension gjeneriche, che si capìs dal contest:  Mie Cudin e 'Sese Gri a smontarin di colp, par tornâ un toc indaûr par domandâ a cualchi anime se a vessin viodude une frute cussì e cussì (Maria Forte, Sul cjar di Pauli Gurin); il miedi […], dade une voglade a chê gjambate, al cjapâ il seghet in man e al scomençà a seâ un toc plui in sù dal sbridinât (Alan Brusini, Il coragjo de sclope)
   2. estension o cuantitât ancje di alc di imateriâl, spec. di timp:  Rosane lu spiete un biel toc, prime di viodilu a rivâ dut imbarlumît (Cristina Noacco, Faliscjis); al è un toc che a i buliea, stu pinseir tal cjâf (Novella Cantarutti, Paron Salvadi)
3. s.m. ogni part che adun cun altris e forme un complès organic e unitari:  a cirî il puest pal ripetidôr, comprâ i tocs, montâ la antene e dut il rest a jerin dai socis de cooperative (Max Mauro, Un Friûl difarent: i 90 mhz di Onde Furlane)
   Sin. part¹
4. s.m. singul esemplâr di un prodot:  i contà che e jere stade la file dai prucs a menâ vie il modon. Zuan i domandà «Cemût âstu cumbinât?» «Mi soi fat judâ dai maltarûi che a àn contât a un a un, ducj i tocs» (Maria Forte, La tiere di Lansing)
   
   1. singul element che insiemi cun altris, ancje cun ciertis diferencis, al forme un cumplès, un servizi o sim. cuntune funzion unitarie:  [tai scacs] la regjine e je il toc plui fuart e che al pues controlâ plui caselis (Nilde Teresa Negro, Zuìn di scacs)
5. s.m. ogjet artistic o artesanâl:  lis sculturis di len de prime metât dal XV secul in Friûl, no presentin nissun rinovament, parcè che i pôcs tocs restâts a ripetin ancjemò il gust gotic dal ’300 (Bepi Agostinis, Storie de art in Friûl); al cirive plui di dut mobilie antighe, e par chê si jere fat il voli e la man. […] Al puartave i tocs te buteghe dal vecjo marangon, ju meteve in sest e ur dave di lustrifin (Carlo Sgorlon, Prime di sere)
6. s.m. cuntune specificazion daûr, par dî di une persone grande, biele:  al veve fate amicizie cuntun talianot, il «Gjigjo», come che lu clamavin; un toc di fantat cuntune batule che al incjantave ducj (Pieri Menis, Lis çuculis dal Gjigjo); un toc di fantate, cetant biele more, che no rive a vincj agns (Ivano Urli, Storie di Vera)
   Sin. tocat , pieç , bocon
7. s.m. cuntune specificazion, in espressions di insult:  o vevi ben viodût che tu mi fasevis di voli. E cui no ti vevial viodût, toc di macaron? (Josef Marchet, Lis predicjis dal muini)
   Sin. pieç , bocon
8. s.m. part di une opare tant che un film, un libri, une cjançon e v.i.:  o ai let il toc de prime letare a chei di Corint (c. 13), dulà che Pauli al fevele de caritât, di ce che a disin, cuntune peraule greghe, la agape (Francesc Placerean, Cuant che tal matrimoni al è l'amôr cristian, li al è verementri Diu)
   Sin. bocon
9. s.m. singul scrit che si publiche tun gjornâl, tue riviste e v.i.:  tal numar di Març intun toc sul nestri gjornâl o vevin fat indevant dai dubis rivuart ae leç regjonâl pe tutele dai dialets dal Friûl - Vignesie Julie (Redazion La Patrie dal Friûl, La leç pai dialets venits dal F-VJ impugnade dal Guvier)
   Sin. articul
10. s.m. cjançon:  al tacà il gramofon e al metè sù il toc plui biel dai Spiders From Mars, "Starman" (Checo Tam, Sense)

Polirematichis e espressions idiomatichis

• a tocs loc.av., loc.adi.inv.
• butâ il toc loc.v.
• butâ in tocs loc.v.
• fâ a tocs loc.v.
• lâ a fruçons loc.v.
• lâ a tocs loc.v.
• lâ in tocs loc.v.
• mandâ a tocs loc.v.
• parâ a tocs loc.v.
• parâ in tocs loc.v.
• toc di cjarte loc.s.m.
• toc di coni loc.s.m.
• toc di mone loc.s.m.
• toc di pan loc.s.m.
• toc di picjât loc.s.m.

Proverbis:

• la fede che e sbeghere e piert il toc