cîl
cîl
[FO]
-
s.m.
spazi alt parsore de superficie terestre, che viodût de tiere al pâr come un volt limitât dal orizont:
la Bielestele, sù, tal cîl, e visave che prest al varès cricât il dì (Roberto Ongaro, Il muc);
al jere propit un dì celest; un altri frêt mês di Març cul cîl di un blu stupent e la nêf su lis monts (Checo Tam, Il dì celest);
al prin ramaç di un lamp, al prin ton che si scjaveçave tal cîl, lui al cjalave pui atent, al spiçave la orele (Maria Forte, La rive di Sant Pieri);
vâs di canelons in butul e basili fresc sui barcons, emolârs florîts, svoi di cisilis sui cjamps a grandis strissis di zâl lusint di ravice o di ros infogât dal cerfuei in flôr: dut une grande fantasie di colôrs sot un cîl trasparent come un lambri (Pieri Somede dai Marcs, Clâr e scûr);
e jere une zornade di paradîs; net il cîl come un voli di uciel, cjants e profums tal aiar (Catarine Percude, Lis âfs);
il soreli là vie al insanganave za il cîl a mont e il colôr grîs de sere al començave a cucâ fûr dai sgoifs dal flum, abàs, e tal bosc daûr dal cimitieri cidin (Dino Virgili, La aghe da pît la cleve)
Sin. firmament
-
s.m.
complès dal spazi cosmic:
al jere un dissen formât di un trapezi cuntune stele celestine une vore luminose, tra lis plui sflandorosis dal cîl… insome … chê stele che nô europeans o clamìn REGULUS (Checo Tam, Regulus)
Sin. cosmi
, firmament
, spazi
, univiers
, volt celest
-
s.m.
tal sisteme tolemaic e in altris sistemis presientifics, ogni volt o sfere concentriche che si pensave che al fos ator de tiere, dominât di un planet o di altris elements:
daûr di Pistis Sophia la trasmigrazion de anime e sucêt passant par cinc cîi: Cron, Ares, Ermes, Afrodite, Zeus. Parsore di chei al è il cîl des costelazions, là che la anime e rive dome cu la tindince al ben, dopo che si à diliberade tai cîi parsot de tindince al mâl (Giovanni Battauz, Flavio Cossar, Renato Iacumin, I mosaics de basiliche di Aquilee)
-
s.m.
sît des divinitâts, di Diu:
Crist al è il Salvadôr, parcè che al è sentât a la diestre dal Pari, parcè che al è lât sù in cîl (Francesc Placerean, Il popul furlan al à ancjemò nostalgjie des robis bielis e santis)
Sin. paradîs
-
ancje cun iniz. maiusc., Diu, la Providence, il destin:
[om e femine ben maridâts] ju assist la Providence, ju console, / ju benedìs il cîl, / cjatin confuart te prole (Pieri Çorut, Pes gnocis Mucjut-Antivar);
«Dut chest no ti parial propit un biel svindic dal Cîl?». Ester e seguitave a cjalâlu, sence bati cee, no jere dal dut sigure di capî ben (Mario De Apollonia, Il timp par ledrôs)
Sin. Diu
, Providence
, Signôr
-
s.m.
part parsore di un spazi vueit, di un ambient e v.i., che e fâs di cuviertidure o di sufit:
jo o crôt che al popul furlan i zovi une vore fevelâ di sperance. Parcè che fintremai cumò a 'nd à vude tant pocje che si è sierât sot la nape e al viôt pôc plui di là dal cîl de nape (Francesc Placerean, La Glesie universâl, cence lis Glesiis particolârs, e je un Glesie cence muse)
Polirematichis e espressions idiomatichis
Proverbis:
- a cîl turchin si nete il cjamin
- bisugne dâsi lis mans ator e no spietâ la mane dal cîl
- bramazion di mus no rive in cîl
- ce che al è scrit in cîl, nissun no lu disfe in tiere
- cîl a piorelis, aghe a fontanelis; cîl a piorons, ploie a selons
- cjar di cûl no va in cîl
- cuant che il cîl al è dut a lane, la ploie no je lontane
- cuant che la fam e je a mieç il cîl, la polente a sa di mîl
- cuant che la lodule e va in cîl, il pan di sorc al sa di mîl
- il cîl al è dut a lane, la ploie no je lontane
- l'arbul si sglove prin di rivâ al cîl
- nissun mestri nol è colât dal cîl
- par seren che al sedi il cîl, al è simpri un bâr di nûl
- pêl ros e pêl di flôr, sot dal cîl no 'nd è piôr
- preiere di mus no va in cîl
- si scomence ben nome dal cîl
- vôs di mus no rive in cîl
- vôs di mus no va in cîl
