Dizionari de Lenghe Furlane

paradîs  pa|ra|dîs  [FO]

1. s.m. [FO, TS] religj. te concezion cristiane, il puest di beatitudin eterne dopo de muart:  anìn là di Sant Pieri, a viodi se cumò che al è vuardian dal paradîs a si ricuarde dai amîs vecjos (Luigi Gortani, Meni Fari); vuei preâ la Bielestele / ducj i sants dal paradîs / che il Signôr fermi la vuere / e il gno ben torni in paîs (Popolâr, Vuei preâ la Bielestele)
   Sin. cîl , ream dai cîi , ream di Diu
   Cfr. purgatori , infier
   
   1. puest plui o mancul ecuivalent ancje in altris concezions
   2. in espressions che a vuelin dî la muart:  Diu lu veve compagnât, sì, ma in paradîs vie pe strade de Plâf e il camion cu lis sgripis par aiar tun fossâl (Dino Virgili, La strade come un destin)
2. s.m. lûc une vore biel e plasint:  o vês un paradîs, chenci, paron Cuesim, ma par rivâ sù! … - al fasè un mot cu la man par dî che e je garbe (Dino Virgili, La aghe da pît la cleve)
   
   1. lûc une vore bon par une cierte ativitât:  lis Dolomitis a son il paradîs dai alpiniscj
   2. ancje in metaforis e comparazion par dî bielece, plasê, amôr e v.i.:  il fantat, par stâi dongje ae frute, biele, tenarine, colôr di rose che e puartave ator il paradîs tai voi, al bandonave Udin (Alan Brusini, Come tai romançs)
   3. sensazion di plasê:  o soi stufe ancje jo di gloti grops! Dîs agns di infier, par un moment di paradîs! (Luciano Rocco, La foghere); tal indoman Zuan si sveà cu la anime plene di paradîs e frescje come la lûs di chê buinore (Maria Forte, La tiere di Lansing)

Polirematichis e espressions idiomatichis

• lâ in paradîs loc.v.
• lâ in paradîs cjalt loc.v.
• paradîs in tiere loc.s.m.
• strade dal paradîs loc.s.f.
• tocjâ il paradîs cui dêts loc.v.

Proverbis:

• a fâ ben, si va in paradîs
• bramazion di mus no va in paradîs
• di bessôi no si sta ben nancje in paradîs
• i bogns che a vadin in paradîs in tiere no si sa ce fâ di lôr
• i siôrs a àn il paradîs in chest mont e se a vuelin ancje in chel altri
• in paradîs no si va in caroce
• in paradîs si stufisi, tal infier si usisi
• la femine e je il paradîs dal cuarp, il purgatori de borse, l'infier da la anime
• lis feminis a son il paradîs dal cuarp, il purgatori de borse e l'infier da la anime
• no si po lâ in paradîs a dispiet dai sants
• preiere di mus no va in paradîs
• se sant Pieri nol vierç la puarte, no si po lâ in paradîs
• se tu fâs ce che ti dîs, tu larâs in paradîs; se tu fâs ce che o fâs jo, no tu vâs ni tu ni jo
• sôi no si sta ben nancje in paradîs
• vôs di mus no va in paradîs