Dizionari de Lenghe Furlane

arie¹  /à-/  a|ri|e  [FO]

1. s.f. misture di gas, pe plui part azot e ossigjen, che e forme la atmosfere de Tiere
   Sin. aiar¹ , atmosfere
   
   1. chê misture di gas daûr des sensazions e de percezion che si à cul vê contat cun jê o cul respirâle:  scjampâ, lâ vie, jù pes scjalis e fûr de puarte, a respirâ arie buine (Carlo Tolazzi, La salamandrie tal fûc); circondâts da lis montagnis / dai siei boscs che mandin fresc; / aghe buine, arie sane: / ce volêso miôr di chest? (Arturo Zardini, Il confin); la arie e jere avonde frescje: Airolo al è un paîs sui mil e cent metris sore il nivel dal mâr (Agnul di Spere, Fieste di inaugurazion)
   2. la atmosfere cemût che e ven viodude e sintude:  il cîl limpit come la aga di un diamant. La aria trasparent, senza una bava che disturbàs il spi (Federigo Comelli, Il me paîs)
      Sin. aiar¹ , atmosfere , cîl
   3. spazi percepît come libar e vueit che al è parsore de superficie de tiere, là che si viôt e si sint:  i glons di duti li cjampani da li vili a svualavin pa la aria glaçada (Novella Cantarutti, Scûr e lusour)
2. s.f. [TS] meteor. part di atmosfere caraterizade di une cierte temperadure e pression:  considerant une masse di arie, se si sta movint verticalmentri te atmosfere, e je par fuarce sogjete a une espansion […] o a une compression (Dario Bianchini Giaiotti, Fulvio Stel, La analisi des previsions di temporâi te planure dal Friûl-Vignesie Julie)
   Sin. aiar¹
3. s.f. moviment dal aiar atmosferic cemût che al ven viodût e sintût, ancje identificât daûr de direzion di dulà che al ven:  buliva il mâr plui furiôs, la aria no veva riten (Federigo Comelli, Il me paîs); mil voltis malandrete / sei la arie di garbin, dîs siore Bete (Pieri Çorut, Pronostic del 1827)
   Sin. aiar¹ , vint , tramontan ipon. , buere ipon. , buerin ipon. , rosean ipon. , levantin ipon. , sclâf² ipon. , sclavon ipon. , siroc ipon. , sirocâl ipon. , garbin ipon. , zefir ipon. , maistrâl ipon. , provence ipon. , provençâl ipon. , brise ipon. , ventisel ipon. , aiarin ipon. , aiarut ipon. , aiaron ipon. , aiarat ipon. , bave ipon. , codebave ipon. , codebuie ipon. , stravinte ipon. , bissebove ipon. , seon ipon. , stelmin ipon. , bovadice ipon. , buiadice ipon. , turgul ipon. , turguliç ipon. , turbin ipon. , turbit ipon. , torgule ipon. , trombe ipon.
4. s.f. flus di aiar:  e zire une arie pure che manten / il firmament seren (Pieri Çorut, Par lis gnocis Pecil-Rubin)
   Sin. aiar¹ , corint²
5. s.f. complès di cundizions climatichis tipichis di un lûc:  vivi intun paîs di montagne là che la arie e je plui fine e pure (Roberto Ongaro, Cretevierte)
   Sin. aiar¹ , atmosfere , clime
   
   1. [BF] complès di cundizions che a vegnin prime o che a fasin previodi un fenomen atmosferic:  e je arie di temporâl
      Sin. aiar¹ , cîl , timp
6. s.f. (fig.) atmosfere psicologjiche o morâl di un complès di personis, di un ambient, di une situazion:  in cjase di Rose Marsut la arie e jere eletriche (Roberto Ongaro, Il muc)
   Sin. aiar¹ , clime , ande
   
   1. complès di cundizions che a fasin previodi alc:  e veve dute la arie di une zornade nuie legre (Agnul di Spere, Chê dì che al neveà a Vignesie)
7. s.f. (fig.) maniere di jessi, di fâ, di vistîsi, di stâ che e da une cierte impression:  jere tornade come amie, cence chê arie di spreç su la muse (Zuan Lurinçon, La Madalene); cemût che a mi cjale chê siorine, dal alt al bas […]! Se o viodessis cun ce arie di pietât, di mufe… No pues viodile, eco… (Anute Fabris, A passe la scalmane); al ero zirât a cjalâ la maestât des monts cun ario nostalgjico (Fulvio ReddKaa Romanin, Geologicamente impossibile)
   Sin. aiar¹ , aspiet¹ , ande
8. s.f. [BF] soredut tal pl., ande di braùre e di superioritât:  cjale li ce ariis!
   Sin. mierde , pofardie , presunzion , scaghe , suficience , svant , svantarie , vant , aiar¹
9. s.f. [CO, TS] mus. composizion o toc di composizion melodiche:  cetantis formazions corâls che a àn recuperât e tornât a proponi ariis tradizionâls furlanis (Walter Colle, Musiche furlane)
   Sin. aiar¹ , motîf
10. s.f. [TS] autom. intai veicui a motôr, dispositîf che al covente par inricjî la missele
    Sin. starter , aiar¹
11. s.f. (eufem.) gas intestinâl:  mai dismenteâsi dal orâr che al va simpri insieme ai fasûi, parcè che al jude a contrastâ chel teribil efiet colaterâl di chest liùm di causionâ arie te panze (Margherita Timeus, Mignestre di fasûi, la ricete definitive)
    Sin. aiar¹ , pedeade , pêt , flât , flatulence , coree , flandrine , fusete , lofe , slofe
12. inter. [BF] (fig., enf.) tant che comant par mandâ vie, par slontanâ:  se i va ben cussì bon, se no… arie! (Jolanda Mazzon, Fûr di timp)
    Sin. vie

Polirematichis e espressions idiomatichis

• butâ par arie loc.v.
• cambiâ arie loc.v.
• cambiâ la arie loc.v.
• canâl da la arie loc.s.m.
• par arie loc.av., loc.adi.inv.