Dizionari de Lenghe Furlane

fusete  /-sè-/  fu|se|te  [CO]

1. s.f. [TS] tess. sorte di fûs, plui piçul o plui sutîl dal fûs normâl:  doi fûs e dôs fusetis, che lis nestris maris, lis nestri nonis, lis nestris avis a varan fat pirlâ cui sa cetant timp a dilunc par fâ sù il fîl di lane di piore (Nin dai Nadâi, Il cjanton de memorie)
2. s.f. [TS] arm. viôt fissete :  si met ne la cana la fuseta sença prima scartoçâ fûr il polvar (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
3. s.f. struture cilindriche jemplade di materiâl piric che al fâs di propelent, e in câs ancje cuntune cjarie che e pues sclopâ ae fin par fâ un bot o une esplosion di colôrs, doprade par zûc o par spetacui pirotecnics:  a traevin i mortalets; lis fusetis a levin in cîl (Catarine Percude, Il solt del Signôr); a saltaran fûr i premis de lotarie e a scloparan tal cîl di taponâsi lis orelis e di inceâ i voi bombîts, fusetis e zirandulis (Pieri Somede dai Marcs, L'ultin cordo)
   Sin. rochet
   Var. fissete
   
   1. (ancje fig.) in metaforis o paragons par dî di cdn. o di alc une vore svelt:  o traiarai une fusete che si impirarà li che il puartîr nol rivarà nancje tal miôr dai siei insiums! (Stiefin Morat, Donald dal Tiliment); el cjan come une fusete al torne a cjase sô a Udin (Arturo Feruglio, 15 di Avost)
      Sin. saete¹ , fulmin , folc
4. s.f. [CO, TS] arm. arme formade di un contignidôr di propelent e in câs di une testade esplosive, cence sistemis di comant a distance:  a jan jemplât il Friûl di casermis, di fuartins, di bunkers, di fusetis e di canons, dal Cansei fint a Monfalcon (Francesc Placerean, Cuintristorie dal Friûl dal 1866 fint in dì di vuê)
   Sin. rochet
   Var. fissete
5. s.f. piçul ogjet pirotecnic che si pues doprâ ancje in cjase, fat di un bachet cuviert di un materiâl che cuant che si pie al à une combustion che e fâs une vore di lusignis
6. s.f. (fig.) grande cuantitât di lusignis:  [l'ucefuarpis] i plantave dongje la cariole e i cjacarave tes fusetis de muele (Maria Forte, Il bal spisimât des ombrenis)
7. s.f. [BF] (fig.) emission di gas intestinâl
   Sin. pêt , pedeade , trombete