Dizionari de Lenghe Furlane

lamp¹  lamp  [FO]

1. s.m. lûs fuarte e improvise produsude di scjariis eletrichis jenfri i nûi o jenfri cîl e tiere:  i lamps a sfrissavin di fûc i nûi e i tons a stocavin e a sglovavin mieç mont (Maria Forte, La rive di Sant Pieri); plovisine minudine / lizerine, / tu vens ju cussì cidine / senze tons e senze lamps, / e tu dâs di bevi ai cjamps (Pieri Çorut, La plovisine)
   Sin. tarlup
   Cfr. folc , saete¹ , fulmin , lampâ
2. s.m. cualsisei lûs fuarte, improvise e curte, ancje ripetude:  il tren aromai al coreve a lunc tal scûr. Cuant che si passà parmìs di une autostrade, a jentrarin lamps di lûs (Agnul di Spere, In viaç di domenie)
   Sin. barlum , incei , lampade¹ , slusicament , tarlupade , tarlup , slusorade , stralûs
   
   1. lûs che e ven ribatude di une superficie lustre:  un biroç di citât, di chei che a butin lamps di lustrifin (Maria Forte, Cjase di Dalban)
   2. [TS] fotogr. emission di lûs fuarte e improvise par iluminâ tal moment che si vierç il diaframe e fâ fotografiis cuant che no je avonde lûs naturâl
      Sin. flash
3. s.m. (fig.) timp une vore curt:  a galop, intun lamp, e à fate la strade e si è fermade dongje di lui (Pieri Somede dai Marcs, Fra Silvio); al pareve che a vessin vût lis tarmis di no podê stâ fers un lamp e tasê nancje un moment (Pieri Menis, Nadâl ancje par Gjelmin); spietait un lamp, che o ai di contâusint une di gnove (Josef Marchet, Lis predicjis dal muini); a lavoravin di un scûr al altri cence un lamp di padin (Meni Ucel, I Catanas)
   Sin. moment , amen¹ , credo , istant , nuie , jesus
4. s.m. (fig.) persone, bestie o robe une vore svelte:  âstu za finît? Tu sês un lamp!
   Sin. frece , fuset , saete¹
5. s.m. (fig.) espression vive dai voi che e mostre un ciert sintiment, intindiment e v.i.:  e fevelave cun lôr e un lamp di inteligjence al comparive tai siei voi (Pieri Somede dai Marcs, Nardon e Vigjute di Nani); a i era scjampât dai voi un lamp di gust (Novella Cantarutti, Li clâfs); il frutat al rivà cuntun lamp di salvadi te cjaladure e l'odôr garp di chel pastiel di vin tal flât (Dino Virgili, La aghe da pît la cleve)
   Sin. lûs , ombre
   Cfr. lampâ
6. s.m. [BF] cjalade svelte, viôt lampade² :  o voi a dâ un lamp su la fieste e o torni dal moment (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. voli , voglade , cuc² , cjalade , cjalon
7. s.m. (fig.) rivelazion improvise, il pandisi improvîs di une idee, di une comprension:  [la statue de Madone e veve] la muse dolce come tal ricuart. Dolce come la uve. La uve!… Un lamp… une idee… Sì, chê e veve di sei «la Madone de uve»! (Maria Forte, Il Bide di Miot)
   Sin. iluminazion , intuizion , ispirazion , idee
8. s.m. (fig.) moment di vite che si torne a vivi te memorie:  a sintî chê cjançon mi è vignût un lamp di cuant che o jerin fruts
   Sin. ricuart

Polirematichis e espressions idiomatichis

• dal lamp loc.av.
• dal lamp al ton loc.av.

Proverbis:

• cuant che a son fûr madracs e carbons, si è sigûrs di lamps e tons
• daspò dal lamp il ton
• ogni lamp al à il so ton
• Sante Barbare e Sant Simon vuardaitnus dal lamp e dal ton