Dizionari de Lenghe Furlane

ispirazion  /-òn/  is|pi|ra|zi|on  [AF]

1. s.f. inflùs di une potence divine o sorenaturâl su cdn., che e influence la sô volontât e la sô azion:  a Sant Jacum, che nus à dade la buine ispirazion di lâ a venerâlu e nus à compagnâts fin là vie, i domandìn che al compagni il viaç dal nestri popul (Antoni Beline, Sant Jacum, là che al finìs il mont)
   Var. inspirazion
   
   1. inflùs ancje no divin che al puarte a un ciert compuartament, a une cierte azion, a une cierte maniere di jessi o di fâ:  i prins agns '90 a viodin in pratiche la muart dal MAO (Moviment Autonomista Occitan) il moviment politic ocitanist fondât tal 1968 su ispirazion di François Fontan (Carli Pup, Ocitanie in moviment)
   2. vision culturâl, artistiche, filosofiche, politiche, economiche e v.i. che e fâs di fonde a di une cierte azion o che le influence a fuart:  [dopo dal 313] o vin une fuarte produzion artistiche di ispirazion cristiane (Bepi Agostinis, Storie de art in Friûl); un gjornalisim di aree o di ispirazion autonomiste (Adrian Cescje, Memoriis di politiche linguistiche)
2. s.f. intervent di une divinitât protetore de art, che e concêt a cdn. la sô gracie par che al fasi la sô opare te maniere miôr
   
   1. cundizion di cui che al rive a dâ la espression miôr al so talent:  a jerin telis par ogni bande: cuadris finîts e di finî, vadì lassâts a mieç par vie che e jere vignude a mancjâ la ispirazion (Roberto Ongaro, Cretevierte)
   2. sburt creatîf o element che al invie o che al è la fonde di une opare artistiche o di altre sorte:  [Antonio Coceani] al restave dispès a Grau, dulà che al cjatave cun plui facilitât ispirazions par lis sôs oparis (Bepi Agostinis, Storie de art in Friûl)
3. s.f. sensazion o idee produsude di alc, di cdn., di circostancis o che e ven tant che reazion spontanie:  se al ves dât bade a la prime ispirazion al varès implantât manarie e manarin e al sarès scjampât a cjase (Luigi Gortani, Un paîs misteriôs); a un ciart pont al lôf i vignì la ispirazion di cjapâ la strade de puarte e di tovâle di chê bande (Renzo Balzan, La bolp, il lôf e la arcje dal Slessar)