Dizionari de Lenghe Furlane

piçul  /-ì-/  pi|çul  [FO]

1. adi. che al à pocje grandece o di grandece che e je mancul di ce che si calcole normâl:  a drete de muraie si podeve lumâ une piçule puarte di len, cuntun clostri rusin e simpri tirât (Franca Mainardis, A ôr dal flum); il Friûl - si sa - al è un piçul campion dal univiers: montagnis, culinis, magredis, aghis, mâr: nol mancje nuie (Riedo Pup, I furlans e la cjace)
   Sin. minût , picinin , stret , curt
2. adi. che al è di misure mancul grande rispiet a altris pussibilitâts de stesse sorte:  une bire piçule
3. adi., s.m. che, cui che al è mancul alt de medie:  un omenut piçulut cuntun fregul di panzute e vistût a sioret vie (Roberto Ongaro, Il muc)
   Sin. bas , mucul , micul , curt
4. adi., s.m. che, cui che al à pôcs agns o mancul agns rispiet a cdn. altri:  si veve bêçs in cjase e Zuan ju mostrave a ducj i fîs, massime ai piçui e ur racomandave che i bêçs si à di tignîju cont, cun tancj sudôrs che a costin (Riedo Pup, Zuan Gjeremie); so pari al jere muart e lui al veve scugnût cjatâsi di vore par mantignî la mari e i doi fradis piçui (Gianni Gregoricchio, Trê feminis)
   
   1. s.m. persone tai prins agns di vite:  siore Lise i racomandà tant di no dismenteâ i ritrats di cjase e dute la robe dai piçui (Maria Forte, Cjase di Dalban)
      Sin. frut¹ , frutin , canai , nin¹
   2. s.m. animâl tai prins mês o agns di vite, cuant che al dipent ancjemò dai gjenitôrs:  prime dai cent dîs di vite, un piçul di franzel al pues imparâ une cualsisei lenghe dai franzei (Franc Fari, Il cjâf dai furlans)
5. adi. che al dure pôc:  jo o vevi voie di une piçule polse te citât (Checo Tam, Sense)
   Sin. curt , svelt
6. adi. formât di pôcs elements:  i Turcs a passarin di là, si dividerin in piçui trops, a devastarin ducj i paîs, a coparin miârs miârs di furlans e a tornarin a cjase lôr cjamâts di robe e di presonîrs (Josef Marchet, Cuintristorie dal Friûl fin sot la Italie); une piçule antologjie di poetis furlans (Adrian Cescje, Memoriis di politiche linguistiche)
7. adi. che nol à tante impuartance, tant pês, tante influence e v.i.:  o speri di vê rivât a dâ un piçul contribût pe valorizazion de nestre art e de nestre maraveose lenghe (Erika Adami, O ai scrit pal gno popul)
   
   1. che nol à grant valôr, che al coste pôc o che al rint pôc:  al tirave une piçule pension par no sai ce invaliditât (Meni Ucel, Credit)
8. adi. di bas nivel economic o sociâl:  i flamants no sopuartin masse la presince e i intervents dai agjents de monarchie francese, a un tant che il popul piçul, i lavoradôrs e lis associazions dai mistîrs sostignudis dal cont Guy de Dompierre si ribelin (Fabian Ros, La invenzion dal stât); la int piçule no capìs lis ideis diferentis, no lis sopuarte (Dino Virgili, La aghe da pît la cleve)
   Sin. minût , bas
   
   1. di imprese, che e à un faturât e un numar di dipendents avonde bas:  in Friûl e je la imprese piçule e cheste impostazion imprenditoriâl e risulte plui elastiche e e reagjìs miôr di une grande industrie devant de crisi (Christian Romanin, Sandra Pizzolitto Pupatello: «Furlan is better! Il Friûl? La puarte de Europe pal Canadà»)
   2. adi., s.m. cui che al à pocjis ricjecis, pôc podê, spec. rispiet a altris:  il gleseam al varès di vê un misurin diferent, midiant che al varès di ispirâsi al vanzeli, che al puarte i piçui a preference dai grancj (Antoni Beline, Pre Pitin); sigurâ la indipendence dai piçui cuintri la prepotence dai grancj (Josef Marchet, Moviment Autonomist Furlan pe Federazion dai Popui)
9. adi. in relazion cun nons di personis e di lûc, par significâ carateristichis ridusudis rispiet al origjinâl:  a Colonia Caroya i disin "Piçul Friûl" in Argjentine
10. adi. (fig.) di pôc nivel morâl, inteletuâl, uman e v.i.:  si è mostrât come un om malcontent, insigûr, malinfident, puartât a une cierte crudece e crudeltât […]: un om e un predi piçul (Antoni Beline, La fabriche dai predis)
    Sin. meschin , misar , miserabil
11. s.m. ce che al à pocje grandece:  va ben che tal grant al sta ancje il piçul ma Vera tai siei [çucui] e sta dentri dôs voltis (Ivano Urli, Storie di Vera)
12. s.m. dimension no grande o scjale ridusude:  a vevin di piturâ te abside: la Madone tal mieç dai martars di Aquilee. E dopo, plui in piçul, l'Imperadôr Corât II, la sô femine Gjisele […] e il so fantat Indrì (Diego Navarria, Popon, la basiliche gnove e la lote cuintri di Grau)
13. s.m. misure di une cierte robe mancul grande rispiet a altris:  si va la sere a bevi un piçul di bire che al coste cutuardis centesims (Vincenzo Luccardi, Florean dal Palaç, III, 30)
14. s.m. [TS] numism. monede che e valeve une di dodis parts dal solt e une di dusinte cuarante parts de lire:  la glesio di Rubignâs o vêr ju cjamerâs per un prât puest dongjo i mulins cu forin di Missin di Rubignâs paio soldi XIII e piçulj IIII (Anonim, Cuader de fradaie di Sante Marie dai Batûts di Cividât, 1426)

Polirematichis e espressions idiomatichis

• cjar piçul loc.s.m.
• dêt piçul loc.s.m.
• fradi piçul loc.s.m.
• papavar zâl piçul loc.s.m.

Proverbis:

• brut di piçul, biel di grant; biel di piçul, brut di grant
• ce che il piçul al ripet, i grancj lu àn biel det
• cjolimi di grant e tornimi di piçul
• cuant che i piçui a fevelin, i grancj e àn fevelât
• cuant che il gjal piçul al cjante, il grant al à za cjantât
• cuant che la polente e je piçule, tenti la tô fete in man
• cui che nol comede la piçule buse al comede la grande
• cui che nol ripare il mâl piçul al à di justâ il mâl grant
• fin che a son piçui, rosis e flôrs cuant che a son grancj, spins e dolôrs
• fîs piçui, fastidis piçui; fîs grancj, fastidis grancj
• i laris piçui si picjiju, i grancj si lassiju cori
• il lari piçul al va in preson
• il pes grant al mangje il piçul
• il Signôr al è piçul ma al cres ogni dì
• la glesie e je simpri plui piçule dal tor
• lari piçul no stâ robâ che il lari grant ti fâs picjâ
• lari piçul no stâ robâ che il lari grant ti picjarà
• mat di piçul, om di grant
• o ai dîs dêts tes mans e se mi tai il plui piçul, mi dûl
• ogni plui piçule magle e dissipe un tapêt
• ogni sant, piçul e grant
• piçule magle e ruvine un biel tapêt
• piçulis o grandis, lis patatis no àn vues
• plui piçul al è il cûr des feminis, plui lungje la lenghe
• se si lavore tal carnevâl piçul, si viôt madracs piçui; se si lavore tal carnevâl grant, si viôt madracs grancj
• srarissimi di piçul e ledrimi di grant
• vuarditi des piçulis spesis