Dizionari de Lenghe Furlane

infogât  in|fo|gât  [AF]

1. p.pass., adi. viôt infogâ , viôt infogâsi
2. adi. che al prodûs o che al è caraterizât di temperadure une vore alte:  il soreli nel Istât / al sarà simpri infogât (Pieri Çorut, Il Strolic furlan par l'an 1848); i prenars a jentravin te cjamare infogade cuntun peçot imbombât di aghe sù pe muse (Dino Virgili, La aghe da pît la cleve)
3. adi. di colôr che al somee chel dal fûc:  cjamps a grandis strissis di zâl lusint di ravice o di ros infogât dal cerfuei in flôr (Pieri Somede dai Marcs, Clâr e scûr)
   Sin. ardint , di flame , di fûc , imbuît , lusignât , lusint , lustri¹ , sflandorôs , slusignât , slusint , vîf
4. adi. cjapât o caraterizât a fuart di passion, emozion, sensazion, voie, viamence e v.i.:  podês dome crodi trop infogât di amôr di Diu e di prossim che o jeri (Antoni Beline, Pre Pitin); une bussade dolce in prin, ma che e deventà simpri plui infogade e convulsive (Roberto Ongaro, Il muc)
   Sin. cjapât , ferbint , passionât , cjalt , imbuît , sfolmenât , ardint , bugât , fogât , fogôs , imbugât , imburît , sburît