Dizionari de Lenghe Furlane

cjapât  cja|pât  [FO]

1. p.pass., adi. viôt cjapâ , viôt cjapâsi
2. adi. di bestie, che e je stade copade, o tignude in cundizion di no podê scjampâ, cjaçant o pescjant:  i pescjadôrs, contents pai pes cjapâts, ju poiavin su la piere, li dongje (Agnul di Spere, Int no consumade)
3. adi. di cdn., fat presonîr, sprivât de libertât:  a àn tes mans un cuatri, cinc dai vuestris… cjapâts pe strade e intai passons (Alviero Negro, Int di masnade)
4. adi. di cjarte di zûc, che e je tra chês in man, ancjemò di zuiâ, o tra chês vinçudis:  contâ lis cjartis cjapadis
5. adi. di toc o pedine dai scacs, de dame o di altris zûcs, che al è stât vinçût o eliminât di un dai zuiadôrs:  il toc cjapât al ven metût fûr de scachiere (Nilde Teresa Negro, Zuìn di scacs)
   Sin. mangjât
6. adi. che al è passât di proprietât o di possès daûr paiament:  la robe cjapade cence fadie tantis voltis no si rive a preseâle
   Sin. comprât , cuistât
7. adi. che al è rivât daûr di un dirit, di une volontât:  cu la ereditât cjapade di sô none al à sierât ducj i debits
8. adi. che al è rivât par pueste o daûr di une spedizion:  su la taule a son lis letaris cjapadis îr, ancjemò cence vierzi
9. adi. sielzût e paiât par fâ un ciert lavôr, une cierte funzion:  ae direzion di un o di plui servizis a son metûts dirigjents cjapâts, di regule, cun concors public (Aministrazion Publiche, Statût de Provincie di Udin)
   Sin. cjolt , cjapât sù , cjapât a vore
10. adi. che al è stât sielzût, determinât, metût in vore:  i uficis finanziaris dal Stât inte Regjon a scugnin dâ cont ae Zonte regjonâl dai proviodiments cjapâts su la fonde des indicazions che a àn vût de Regjon stesse (Aministrazion Publiche, Statût Speciâl de Regjon Autonome Friûl-Vignesie Julie)
    Sin. cjapât sù
11. adi. che al è impegnât a fâ alc:  operaris cu lis tutis rossis e la matricule personâl e dal stabiliment a ziravin cjapâts e no indreçavin mai i voi a cjalânus (Stiefin Morat, Kebar krossè)
    Sin. impegnât , sot
12. adi. dut concentrât in alc e distrat dal rest:  a tasevin ducj i doi fasint la stesse strade, cjapâts dai lôr pinsîrs discompagns (Maria Forte, La tiere di Lansing); [il gjat Vigji] al jere cjapadon tai siei siums: si insumiave di cori come un mat ator pai prâts, di rimpinâsi sù sù pai arbui, di svoletâ tant che une pavee, di saltuçâ come un crot (Daria Miani, Lis aventuris di Vigji)
    Sin. concentrât , pierdût , pierdût vie , straviât
13. adi. che al è tocjât o dominât di une situazion, sensazion, emozion e v.i.:  Anute e zuiave cun doi fantats discolçs, de sô vualece, che si lassavin sburtâ e tirâ, cjapâts ancje lôr te rêt dal so estri, de sô bielece (Alan Brusini, Come tai romançs); Minut e Rosute no diserin flât, cjapâts a colp te maravee di chê gnove (Dino Virgili, La aghe da pît la cleve)
    Sin. conturbât , turbât
14. adi. che al à tacât a vê un ciert colôr, savôr, odôr o une cualchi altre carateristiche:  i lavris colorîts cu la tinture di jodi e la sassare lustrade cul saìn cjapât di ranzit (Josef Marchet, Lis predicjis dal muini)
15. adi., s.m. che, cui che al à a ce fâ cuntun acjadiment, cuntun fenomen e v.i.:  une riunion cun dutis lis associazions cjapadis te iniziative
    Sin. cjapât dentri , tocjât , dentri , tirât dentri
16. adi. che al fâs part, che al è insiemi cun alc:  ma se mi veve parfin imprometût te sô ultime letare che mi varès puartât o mandât altris dissens che a vevin di piturà la vite dal nestri paîs te sô zoventût? Mi son restâts invezit nome i prins cinc, cjapâts in chê letare, e tante voie di fevelâ inmò cun lui (Lucio Perès, Gno barbe Sisto)
17. adi. che al à une cierte posizion, pal solit centrâl, rispiet a altris elements:  lis Alps cjargnelis a son chês cjapadis jenfri Sapade e Tarvis; par Ete di mieç si intint la ete storiche cjapade jenfri la fin dal Imperi roman e la scuvierte de Americhe
18. adi. che al è riprodusût intune cierte maniere:  tal prin compart o cjatìn la "mari" e i siei cuatri "fîs", cjapâts di devant, in suazis cuadris (Giovanni Battauz, Flavio Cossar, Renato Iacumin, I mosaics de basiliche di Aquilee); i ritrats dai sorestants cjapâts par denant, par daûr e par in bande (Riedo Pup, I furlans e la Vite Catoliche)
    Sin. cjalât , viodût , cjolt
19. adi. che al ven tignût intune cierte considerazion, intune cierte categorie, intune cierte funzion e v.i.:  [l'articul 6 de Costituzion] al dîs che la Republiche e tutele lis "minorancis linguistichis", cjapadis tant che sogjets coletîfs, e no i citadins di lenghe diferente, cjapâts tant che individuis (Adrian Cescje, Memoriis di politiche linguistiche)
    Sin. considerât , cjolt , calcolât , esaminât , individuât , cjalât , viodût
20. adi. di puest o mieç di traspuart, che nol è libar, che al è za doprât o al à di restâ par cdn. altri:  un scjalâr larc cu lis sentis parsore, di ca e di là par che si comedassin dutis. Une vore di puescj a jerin za cjapâts (Maria Forte, Sul cjar di Pauli Gurin)
    Sin. cjolt , prenotât , risiervât , ocupât
21. adi. vuadagnât:  cui carantans cjapâts e metûts vie al è rivât adore di cjoli un pâr di cjamputs di tiere e une barache che al à sdrumade par fâ sù une sô cjasute (Josef Marchet, Lis predicjis dal muini)
    Sin. cjapât sù , tirât , tirât sù , tirâ dongje
22. adi. otignût daûr di une elezion, designazion, concession di fiducie e v.i.:  se nô o fasìn il rapuart jenfri numar di iscrits e vôts cjapâts a lis elezions o viodìn come regule che il partît locâl al à un rapuart une vore plui alt (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
    Sin. otignût , vût
23. adi. di cdn., cetant inamorât:  al à tal cjâf dome la morose, al è propit cjapât
    Sin. cuet¹ , imberlît , inamorât , lât¹
24. adi. impegnât intune relazion sentimentâl:  ma chê tô amie che o ai cognossût nossere, ise libare o cjapade?
    Sin. impegnât , morosât , maridât , cjolt
25. adi. di sensazion fisiche o psicologjiche, che e je sintude a fuart, che e à efiet:  cu la pôre cjapade îr a passâ cul ros, al varà ben imparât di stâ atent; dal frêt cjapât, i è vignude fintremai la fiere
26. adi. di malatie, jentrade tal organisim:  al è muart cualchi an dopo tornât in Friûl, cu la silicosi cjapade tes minieris
    Sin. vanzât , cjapât sù , tirât dongje

Proverbis:

• daspò cjapât sù trê voltis il fûs a une fantate, si sclape la fave