Dizionari de Lenghe Furlane

dentri  /-é-/  den|tri  [FO]

1. av., prep., adi.inv. intun spazi, ambient, puest e v.i. sierât o limitat:  lu vevin metût sul so jet. Al jere tant lunc che dibot nol stave plui dentri (Agnul di Spere, Istât); une Patrie no tant grande e nancje masse piçule, ma ce che al baste par che al vivi dentri, cence pierdisi, il nestri popul (Josef Cjargnel, Il Friûl al è nassût cussì); vierte la bocje dal sac, i metevin dentri un mezut di forment (Pieri Somede dai Marcs, Fra Silvio); la ombre de gnot ven jù dentri il vagon (Enrico Fruch, Chatillon)
   Var. drenti
   Cfr. dentri a , dentri di , dentri in
   
   1. ancje cun riferiment a cualsisei robe, ancje astrate che e puedi vê un contignût:  a strucâ lis cjacaris dai nestris aversaris si reste simpri cu lis mans vueidis: se o cjatassin dentri un sôl fregul di sostance positive, o saressin ancje bogn di ricrodisi (Josef Marchet, Ce che a vuelin); mi cjali dentri il cûr e o tremi (Ercole Carletti, Su la albe)
   2. in riferiment a alc che al pues vê ingredients o components:  bêf chest brulè; i ai metût dentri un tic di canele e un biel pôc di zucar, ti smolarà la tos (Pieri Somede dai Marcs, Un pugn di moscjis)
2. av., prep., adi.inv. de bande interne o de bande plui dongje rispiet a un limit:  dentri i cunfins de Regjon a restaressin - par tant che al pâr - i paisuts de vecje Sclavanie furlane e de Resie e i paîs sclâfs dal Gurizan (Josef Marchet, Autonomie e lengaç)
3. s.m.sing. part interne:  il dentri, cui siei bancs carulâts, lis colonis di marmul ros, lis statuis di Sant Valantin e di Sant Josef, al jere chel di cuant che Lissandri al jere lât (Franca Mainardis, Il sium di Lissandri); a son stadis tornadis e jevâ sù cuatri colonis, altris a son restadis a mieç o cuntun pâr di rondui, la base de cele e je ben evidente, tant che si percepìs ben il dentri e il fûr dal templi e la sô armonie costrutive (Adrian Cescje, Viaç aes origjins dal Logos)
   Sin. didentri
4. av., prep., adi.inv. in cjase, intun ambient, a sotet:  vignît, vignît dentri, no stait a stâ li sot de ploie (Cristina Noacco, Faliscjis); i zovenats dal paîs a disevin di lâ a messe e invezit a stavin dentri dome cinc minûts tes ultimis riis des bancjis o dongje de puarte. Po dopo a levin ducj te ostarie (Checo Tam, Mater Tenebrarum)
5. av., prep., adi.inv. intun ciert ogjet, materiâl, intune cierte struture e v.i., cuntune cierte profonditât:  a plene si la darà mediant une plere fasint lâ jù il pipul fin dentri del vin (Giuseppe Ferdinando del Torre, Il contadinel. Lunari par l'an 1867)
   Sin. dentri vie , par dentri , indentri
6. av., prep., adi.inv. intal cuarp, massime in cualchi orghin interni:  al sintive come une fasse di dolôr dentri tal stomi che i lave jù fin ai rognons, il brusôr di un riscjalt che al jere par nassi (Amedeo Giacomini, Tal ospedâl); i voi che i brusavin come se e ves vût dentri une sgrafute di savalon (Pieri Menis, Chei di Muraie)
   
   1. s.m.inv. lis vissaris di une bestie macelade:  une sere e veve di fâ la porchete, alore copât il purcit di un so amì, dopo e je metude a gjavâ il dentri dal purcit (Mario Beltramini, Jo e Graziella)
      Sin. didentri
   2. in cualchi part dal cuarp, par esempli tal cjâf o tal stomi, che si capìs dal contest o che al ven segnât cuntun mot, ancje cun riferiment aes funzions inteletivis o ai sintiments che si loghin tal cerviel, tal cûr, e v.i.:  «Doman si cope il purcit».[...] «Eh no, mate da la ostie, che il purcit no si copilu! Là al sta, fin Nadâl...». «E jo alore o copi il gno mieç!». «Il to mieç? Ma ce âstu ledan alì dentri?». (Meni Ucel, Mieç purcit); ce isal che ti bruse li dentri, tu? ... il rimuars che tu âs fat murî to pari di crepecûr? (Dino Virgili, La aghe da pît la cleve)
7. av., prep., adi.inv. inte anime:  chel cori di ca e di là al è plui di dut un scjampâ dal vueit che si à dentri (Maria Forte, Cjase di Dalban)
   Sin. dentri vie
8. av. (coloc.) in preson:  se mi vessin fermât i carabinîrs mi varessin di sigûr metût dentri (Checo Tam, Sense); al jere stât dentri par vincjesiet agns (Carlo Sgorlon, Prime di sere)
9. av., prep., adi.inv. par esprimi partecipazion, cognossince, relazion:  fîs e zinars che a jerin dentri in chei fats, a mandarin a dî di partî di strade cence pierdi un sôl lamp (Maria Forte, Cjase di Dalban); Degasperi al à butât fûr i liberâi, anzit a son lâts fûr di bessôi. A son lâts fûr parcè che a san di podê intrigâlu ancjemò plui, stant in bande, che no di dentri (Josef Marchet, La scrassigne)
   Sin. indentri
10. prep. prime che un ciert tiermin di timp al passi o al finissin:  bisugne che o disvuedi / dentri il mês il magazen (Pieri Çorut, Cjârs furlans soi disperât); dentri un an e un dì i vês di savêmi dî i siet ponts da veretât (Popolâr - Giovanni Tavoschi, I siet ponts da veretât - Racconti popolari friulani IV)
    Sin. in , prime di , prin di , dentri di

Polirematichis e espressions idiomatichis

• butâ dentri loc.v.
• ca dentri loc.av.
• chi dentri loc.av.
• cjapâ dentri loc.v.
• culì dentri loc.av.
• dâ dentri loc.v.
• dâi dentri loc.v.
• dâsi dentri loc.v.
• dentri vie loc.av.
• in dentri loc.av., loc.adi.inv.
• jentrâ dentri loc.v.
• lâ dentri loc.v.
• meti dentri loc.v.
• par dentri loc.av., loc.adi.indef., loc.s.m.
• parâ dentri loc.v.
• sclopâ dentri loc.v.
• sierâ dentri loc.v.
• stâ dentri loc.v.
• tirâ dentri loc.v.
• tirâsi dentri loc.v.
• tornâ dentri loc.v.

Proverbis:

• beade chê cjase che e à un vieli dentri
• e va tant la sele al poç, fin che e reste dentri
• fûr sanc, dentri mistîr
• il mulinâr al met il Signôr difûr par che nol viodi ce che al fâs dentri
• o dentri o fûr