Dizionari de Lenghe Furlane

indentri  /-è-/  in|den|tri  [FO]

1. adi.inv., av. intune posizion o direzion che e va te profonditât:  i menaus a batevin colps […] Une lungje procession di colps, e la manarie simpri plui indentri te feride, a coni, blancje e precise (Maria Forte, La tiere di Lansing); a passa la strada da li Clausini che a brinca Colventous e a menava una volta a cjapâ li vili par di ca da la Miduna fin a Cjevuli e pi indrenti (Novella Cantarutti, Stradi pa la val da la Miduna); di Postumie indentri, si viodin jù pal dì, ca e là pe ferade, i convois ribaltâts pes scarpadis (Ivano Urli, Storie di Min)
   Sin. dentri , insot
   Var. indrenti
   
   1. (fig.) te profonditât di alc di imateriâl o astrat:  lant plui indentri inta chescj temis, al po stâi ancje che si puartaressin dongje gnûfs ponts inte cuistion ladine (Zorç Cadorin, Cualchi ipotesi sul furlan di prin di scrivilu); il displasê i jere lât a Pieri simpri plui indentri (Pieri Menis, Sul agâr)
      Sin. dentri , insot
   2. di une part dal cuarp, che e je o che e somee jessi plui infondade dal normâl:  nol jere nuie di jê, e veve i voi plui indentri e la muse plui blancje che mai (Dino Virgili, La aghe da pît la cleve)
2. adi.inv., av. a un nivel alt di informazion, di comprension, di competence e v.i.:  nissun mi à sgresade la anime, nissun mi à insegnât a capî lis robis plui indentri di cussì (Josef Marchet, Lis predicjis dal muini); vignarà il timp che i miei fradis, i filosofs, tu e noaltris ducj podarìn penetrâ un pôc plui indentri tal plan da la creazion (Zuan Luîs Filli, Il farc)
   
   1. adi.inv. che al à buinis informazions, che al à competence o esperience in alc:  no sai rispuinditi, no soi tant indentri in chestis cuistions
      Sin. espert , pratic , informât

Polirematichis e espressions idiomatichis

• cjapâ indentri loc.v.
• lâ indentri loc.v.