Dizionari de Lenghe Furlane

stâ dentri    [AF]

1. loc.v. jessi dentri intun spazi o in câs ancje intune dimension astrate, intune dade di timp, intun concet e v.i.:  cuant che je chê date ore, a sierin lis puartis, di mût che cui cu è dentri al scuen stâ dentri, e cui che si è cjapât difûr che al stei difûr (Giovanni Gortani, La cjargnele dal avout); cjalait che tantis voltis o vin crodût che il Cristianisim al fos une cuistion di comandaments o di leçs. Nol è just. E je une robe plui fonde. Il Cristianisim nol sta dentri dal dut tai comandaments (Francesc Placerean, Crist re cence prepotence)
   Sin. stâ
2. loc.v. vê puest, vê un spazi suficient par stâ in alc:  un bocon di om che i dave sot a Sant Cristoful di Glemone… tai siei stivâi i stave dentri, comut, un frut di sîs agns (Pieri Menis, Lis leiendis di Buie)
   Sin. stâ
3. loc.v. di numar, grandece, valôr e v.i., jessi plui piçul di un altri:  il trê al sta dentri tal siet dôs voltis e al vanze un
   Sin. stâ
4. loc.v. vê un margjin positîf intune situazion economiche, rivâ a paiâ lis spesis:  il contadin nostran al vuadagne pôc, rive e no rive a stâ dentri (Enos Costantin, Un virus te lidrîs); «Lavôr a ‘nd è, ancje masse, ma la int mi paie dopo mês e jo intant par cjoli il materiâl o voi sot in bancje. No rivi plui a stâi dentri […]» (Igor Londero, Delit in vie del Lavoro)

Components:

• dentri av., prep., adi.inv., s.m.sing., s.m.inv.
• stâ v.intr.